കണ്ണൂര്‍:കണ്ണൂര്‍ കോര്‍പ്പറേഷന്‍ ഡെപ്യൂട്ടി മേയര്‍ തെരഞ്ഞെടുപ്പ് ഇന്ന് നടക്കും. രാവിലെ 11ന് കലക്ടറേറ്റ് കോണ്‍ഫറന്‍സ് ഹാളില്‍ വരണാധികാരി കൂടിയായ ജില്ല കലക്ടര്‍ ടി.വി. സുഭാഷിന്റെ അധ്യക്ഷതയിലാണ് തെരഞ്ഞെടുപ്പ്.86 ദിവസമായി ഡെപ്യൂട്ടി മേയര്‍ സ്ഥാനം ഒഴിഞ്ഞു കിടക്കുകയായിരുന്നു.നേരത്തേ ലീഗ് അംഗത്തെ കൂടെക്കൂട്ടി അവിശ്വാസത്തിലൂടെ എല്‍.ഡി. എഫ് പുറത്താക്കിയ പി.കെ രാഗേഷാണ് യുഡിഎഫ് സ്ഥാനാര്‍ത്ഥി.രാഗേഷിനെ പുറത്താക്കാന്‍ എല്‍.ഡി.എഫിന് ഒപ്പം നിന്ന ലീഗ് അംഗം ഇപ്പോള്‍ എല്‍.ഡി.എഫിനൊപ്പമില്ല. പാര്‍ട്ടി നേതൃത്വത്തിനൊപ്പമാണ് അദ്ദേഹമിപ്പോള്‍. അതിനാല്‍ പി.കെ രാഗേഷിനുതന്നെയാണ് വിജയസാദ്ധ്യത. എല്‍.ഡി.എഫിന് 27 അംഗങ്ങളും യു.ഡി.എഫിന് 28 അംഗങ്ങളുമാണുള്ളത്. അതേസമയം മേയർ സുമ ബാലകൃഷ്ണനെതിരെ എൽ.ഡി.എഫ് നൽകിയ അവിശ്വാസ പ്രമേയം ഈ മാസം 19നും പരിഗണിക്കും.മുസ്ലിം ലീഗുമായുള്ള ധാരണപ്രകാരം സുമ ബാലകൃഷ്ണൻ വെള്ളിയാഴ്ച മേയർ സ്ഥാനം രാജിവയ്ക്കും.ഇതിനിടെ മേയര്‍ക്ക് എതിരെ അവിശ്വസ പ്രമേയത്തിന് കളക്ടര്‍ക്ക് എല്‍ഡിഎഫ് നേരത്തെനോട്ടീസ് നല്‍കിയിരുന്നു. ലോക്ക്ഡൗണ്‍ നിയന്ത്രണങ്ങള്‍ നിലനില്‍ക്കുന്നതിനാല്‍ അവിശ്വസ പ്രമേയം ഇനിയും ചര്‍ച്ചയ്ക്ക് എടുക്കാന്‍ സാധിച്ചില്ല. മേയര്‍ രാജിവെക്കുന്നതോടെ അവിശ്വാസ പ്രമേയം ചര്‍ച്ചയ്ക്ക് എടുക്കില്ല.