തിരുവനന്തപുരം: ബാലഭാസ്കറിന്റെ മരണവുമായി ബന്ധപ്പെട്ട് മൊഴി നല്‍കാന്‍ കലാഭവന്‍ സോബി ക്രൈംബ്രാഞ്ച് ഓഫീസിലെത്തി. ബാലഭാസ്കറിന്റെ മരണത്തിനിടയാക്കിയ അപകടം നടന്ന് അല്‍പസമയത്തിന് ശേഷം ദുരൂഹ സാഹചര്യത്തില്‍ രണ്ട് പേര്‍ പോകുന്നത് കണ്ടുവെന്ന് സോബി നേരത്തെ വെളിപ്പെടുത്തിയിരുന്നു.ഇതിന്റെ അടിസ്ഥാനത്തിലാണ് സോബിയെ ക്രൈംബ്രാഞ്ച് വിളിപ്പിച്ചത്.ബാലഭാസ്കറിന്റെ മരണത്തെക്കുറിച്ച്‌ അന്വേഷിക്കുന്ന ക്രൈംബ്രാഞ്ച് സംഘം ഇന്നലെ ഭാര്യ ലക്ഷ്മിയില്‍ നിന്നും മൊഴിയെടുത്തിരുന്നു. തിരുവനന്തപുരത്തെ വീട്ടിലെത്തിയാണ് ക്രൈംബ്രാഞ്ച് സംഘം ലക്ഷ്മിയുടെ മൊഴിയെടുത്തത്. അപകടസമയത്ത് കാറോടിച്ചത് ഡ്രൈവര്‍ അര്‍ജ്ജുന്‍ ആണെന്ന മൊഴിയില്‍ ലക്ഷമി ഉറച്ചു നില്‍ക്കുകയാണ്. ദുരൂഹത നീക്കാന്‍ വിശദമായ അന്വേഷണം നടത്തണമെന്നും ലക്ഷ്മി വ്യക്തമാക്കി.അതേസമയം ബാലഭാസ്കറിന്റെ സുഹൃത്തുക്കള്‍ പണം തിരിമറി നടത്തിയെന്ന ആരോപണത്തെ തുടർന്ന് ബാലഭാസ്കറുടെ ബാങ്ക് അക്കൗണ്ടുകള്‍ ക്രൈം ബ്രാഞ്ച് പരിശോധിക്കും.ബാലഭാസക്കറിനോട് അടുപ്പമുള്ള പ്രകാശന്‍ തമ്പി സ്വര്‍ണക്കടത്തില്‍ അറസ്റ്റിലായതോടെയാണ് മരണത്തില്‍ വീണ്ടും ദുരൂഹത ഉയര്‍ന്നത്.