കൊച്ചി:നടിക്ക് പകരം ഡ്യൂപ്പിനെ ഉപയോഗിച്ചെന്ന കേസിൽ നടനും സംവിധായകനുമായ ലാലിന്‍റെ മകനും യുവ സംവിധായകനുമായ ജീൻപോൾ ലാലും മറ്റൊരു യുവ നടൻ ശ്രീനാഥ് ഭാസിയും അറസ്റ്റിലായേക്കും. അറസ്റ്റ് ഒഴിവാക്കാൻ ഇരുവരും എറണാകുളം സെഷൻസ് കോടതിയിൽ മുൻകൂർ ജാമ്യാപേക്ഷ നൽകിയിട്ടുണ്ട്. ജാമ്യഹർജി കോടതി തള്ളിയാൽ ഇരുവരെയും അറസ്റ്റ് ചെയ്ത് ചോദ്യം ചെയ്യാനാണ് പോലീസ് നീക്കം നടത്തുന്നതെന്നാണ് ലഭിക്കുന്ന റിപ്പോർട്ടുകൾ.കേസിൽ അറസ്റ്റ് ഒഴിവാക്കാൻ ജീൻപോൾ ലാലും ശ്രീനാഥ് ഭാസിയും സമർപ്പിച്ച മുൻകൂർ ജാമ്യാപേക്ഷയിൽ കോടതി പോലീസിനോട് വിശദീകരണം തേടിയിരുന്നു. ജാമ്യാപേക്ഷയെ ശക്തമായി എതിർക്കാനാണ് പോലീസ് തീരുമാനം. യുവനടിയുടെ പരാതിയിൽ കഴന്പുണ്ടെന്നും കേസുമായി ബന്ധപ്പെട്ട് അന്വേഷണത്തിൽ ലഭിച്ച വിവരങ്ങളും കോടതിയിൽ പോലീസ് സമർപ്പിക്കും. കേസിൽ നിർണായക വിവരങ്ങൾ ലഭിച്ചുവെന്ന് പോലീസിന് കോടതിയെ ബോധിപ്പിക്കാൻ കഴിഞ്ഞാൽ ജാമ്യം ലഭിക്കാൻ സാധ്യത കുറവാണെന്നാണ് അന്വേഷണ സംഘത്തിന്‍റെ വിലയിരുത്തൽ. ജാമ്യം നിഷേധിച്ചാൽ ഇരുവരെയും കസ്റ്റഡിയിലെടുത്ത് ചോദ്യം ചെയ്യുകയും കൂടുതൽ വിവരങ്ങൾ ശേഖരിക്കാനും കഴിയുമെന്ന് പോലീസ് കണക്കുകൂട്ടുന്നു.