ബെംഗളൂരു:ഐഎസ്എൽ ഫുട്ബോൾ കിരീടം ചെന്നൈയിൻ എഫ്‌സിക്ക്.കലാശപ്പോരില്‍ രണ്ടിനെതിരെ മൂന്നു ഗോളുകള്‍ക്ക് ബംഗളൂരുവിനെ തോല്‍പിച്ച് ജെജെയും സംഘവും കിരീടം സ്വന്തമാക്കി. ഇത് രണ്ടാം തവണയാണ് ചെന്നൈയിന്‍ എഫ്സി ഐഎസ്എല്‍ കിരീടം ചൂടുന്നത്. ഇതോടെ ഐ. എസ്.എല്ലില്‍ രണ്ട് തവണ കിരീടം നേടുന്ന ടീം എന്ന നേട്ടം കൊല്‍കത്തക്കൊപ്പം പങ്കിടാനും ചെന്നൈയിനായി. അത്യന്തം ആവേശകരമായ മത്സരത്തിൽ സുനിൽ ഛേത്രിയിലൂടെ ആദ്യം ലീഡ് നേടിയത് ബംഗളൂരു ആയിരുന്നു. എന്നാൽ, തുടരെ മൂന്നു ഗോളുകൾ നേടി ബംഗളൂരുവിനെ തളർത്തുന്ന ചെന്നൈയിൻ വീര്യമാണ് പിന്നീട് കളത്തിൽക്കണ്ടത്.ചെന്നൈയിനുവേണ്ടി മെയിൽസണ്‍ ആൽവസ്(17, 45 ആം മിനിറ്റുകൾ), റാഫേൽ അഗസ്റ്റോ (67 ആം മിനിറ്റ്) എന്നിവർ ഗോളുകൾ നേടിയപ്പോൾ ബംഗളൂരുവിനു വേണ്ടി ക്യാപ്റ്റൻ സുനിൽ ഛേത്രി (ഒന്പതാം മിനിറ്റ്), മിക്കു(90+രണ്ടാം മിനിറ്റ്)എന്നിവർ ലക്ഷ്യം കണ്ടു.കന്നി ഐഎസ്എലിൽത്തന്നെ കിരീടം നേടാമെന്ന മോഹത്തോടെയാണ് ബംഗളൂരു സ്വന്തം തട്ടകമായ കണ്ഠീരവ സ്റ്റേഡിയത്തിൽ ഇറങ്ങിയത്. ആദ്യം ഗോളടിച്ച് ബംഗളൂരു എഫ്സി ആരാധകരുടെ പ്രതീക്ഷ വാനോളമെത്തിക്കുകയും ചെയ്തു. എന്നാൽ, അതിന്‍റെ വീര്യം കെട്ടടങ്ങുന്നതിനു മുൻപ് ചെന്നൈയിൻ പകരം വീട്ടി.