ബെംഗളൂരു:ഐഎസ്എൽ ഫൈനൽ മത്സരം ഇന്ന് നടക്കും.കരുത്തരായ ചെന്നൈയിന്‍ എഫ്‍സിയും ബംഗളൂരുവും തമ്മിലാണ് ഫൈനല്‍.ബംഗളൂരു ശ്രീ കണ്ഠീരവ സ്റ്റേഡിയത്തില്‍ വൈകീട്ട് 8 മണിക്കാണ് പോരാട്ടം.നാലു മാസം നീണ്ട ഐഎസ്എല്‍ ആവേശത്തിന് ഇന്ന് കൊടിയിറങ്ങുമ്പോള്‍ അറിയാനുള്ളത് കപ്പുയര്‍ത്തുന്നത് ആരാണെന്നു മാത്രം.സീസണിലെ ഏറ്റവും കരുത്തരായ ടീമുകളാണ് ബംഗളൂരുവും ചെന്നൈയും.ചെന്നൈയിൻ ഒരു തവണ കിരീടം സ്വന്തമാക്കിയിട്ടുണ്ട്. രണ്ടാം കിരീടമാണ് അവരുടെ ലക്ഷ്യം. 2015ൽ ഗോവയെ കീഴടക്കിയായിരുന്നു ചെന്നൈയിന്‍റെ കന്നി കിരീട നേട്ടം.അതേസമയം, ഐഎസ്എലിലെ കന്നിക്കിരീടമാണ് ബംഗളൂരു ലക്ഷ്യംവയ്ക്കുന്നത്. നായകന്‍ സുനില്‍ ഛേത്രിയുടെ മികച്ച ഫോമാണ് ബംഗളൂരുവിന്റെ ശക്തി. സെമിഫൈനലിന്റെ രണ്ടാം പാദത്തില്‍ ഹാട്രിക്ക് നേടി ഛേത്രി അത് തെളിയിച്ചു. രണ്ടാം പാദത്തില്‍ ജെജെ നേടിയ ഇരട്ട ഗോളിന്റെ മികവിലാണ് ചെന്നൈയിന്‍ ഫൈനലിലേക്ക് എത്തുന്നത്.സെമിയിൽ നിർണായകഗോൾ നേടിയതോടെ ജെജെ ഫോമിലേക്ക് തിരിച്ചെത്തിയിരിക്കുകയാണ്. ഒന്പതു ഗോളുമായി ജെജെയാണ് ചെന്നൈയിന്‍റെ ഗോൾവേട്ടയിലെ പ്രധാനിയും.ഐഎസ്എല്ലില്‍ കന്നിക്കാരായ ബംഗളൂരുവും രണ്ടാം സീസണില്‍ ജേതാക്കളായ ചെന്നൈയിനും ഫൈനലിനെത്തുമ്പോള്‍ മികച്ച പോരാട്ടത്തിനായി കാത്തിരിക്കുകയാണ് ആരാധകര്‍.