കൊച്ചി:ഐഎസ്എല്ലില്‍ ഇന്ന് കേരളാ ബ്ലാസ്റ്റേഴ്സ് കൊച്ചിയിലെ സ്വന്തം മൈതാനത്ത് നിര്‍ണായക പോരാട്ടത്തിനിറങ്ങുന്നു.ചെന്നൈ എഫ്‌സിയെയാണ് ബ്ലാസ്റ്റേഴ്സ് ഇന്ന് നേരിടുക.കൊച്ചിയിലെ ജവഹർലാൽ നെഹ്‌റു സ്റ്റേഡിയത്തിൽ ഇന്ന് രാത്രി എട്ടുമണിക്കാണ് മത്സരം.സീസണിലെ അവസാന ഹോം മത്സരത്തിനിറങ്ങുമ്പോൾ കലാശ പോരാട്ടത്തെക്കാൾ സമ്മർദത്തിലാണ് സന്ദേശ് ജിങ്കനും സംഘവും. ജയിച്ചാൽ കണക്കുകളിൽ വിശ്വസിച്ചു കളത്തിൽനിന്നു കയറാം,അല്ലെങ്കിൽ സ്വന്തം കാണികൾക്കു മുന്നിൽ കണ്ണീരോടെ ലീഗിന്റെ പുറത്തേക്കു പോകാം.ഐഎസ്എൽ നാലാം സീസണിന്റെ സെമിഫൈനലിലേക്ക് മുന്നേറാൻ ജയത്തിൽ കുറഞ്ഞതൊന്നും ബ്ലാസ്‌റ്റേഴ്‌സിനെ സഹായിക്കില്ല.സ്വന്തം ജയത്തിനൊപ്പം മറ്റുള്ളവരുടെ ജയങ്ങളും തോൽവിയും മുന്നോട്ടുള്ള യാത്രയ്ക്ക് ബ്ലാസ്റ്റേഴ്സിന് ആവശ്യമാണ്.നിലവിൽ 16 കളികളിൽ നിന്നും 26 പോയിന്റുമായി അഞ്ചാം സ്ഥാനത്താണ് ബ്ലാസ്റ്റേഴ്സ്.