ന്യൂഡൽഹി:24 മരുന്നുകളുടെ കയറ്റുമതി നിയന്ത്രണം നീക്കി ഇന്ത്യ.കോവിഡ് 19 പ്രതിരോധ പ്രവർത്തനങ്ങളുടെ ഭാഗമായി കയറ്റുമതി നിയന്ത്രണം ഏർപ്പെടുത്തിയ മരുന്നുകളുടെ നിയന്ത്രണമാണ് നീക്കിയത്.26 മരുന്നുകളും അവയുടെ ഘടകങ്ങളും വിദേശത്തേക്ക് കയറ്റി അയക്കുന്നതില്‍ മാര്‍ച്ച്‌ മൂന്നിനാണ് ഇന്ത്യ നിയന്ത്രണം ഏര്‍പ്പെടുത്തിയത്. പാരസെറ്റാമോളും ഈ പട്ടികയില്‍ ഉണ്ടായിരുന്നു. എന്നാല്‍ വിലക്ക് നീക്കിയ മരുന്നുകളുടെ പട്ടികയില്‍ പാരസെറ്റമോൾ ഉള്‍പ്പെട്ടിട്ടില്ല.കോവിഡ് പ്രതിരോധത്തിനായി ഉപയോഗിക്കുന്ന മലേറിയ മരുന്നായ ഹൈഡ്രോക്‌സിക്ലോറോക്വിന്റെ കയറ്റുമതി നിരോധത്തില്‍ ഇന്ത്യ ഇളവുവരുത്തണമെന്നും അല്ലാത്തപക്ഷം തിരിച്ചടി നേരിടേണ്ടി വരുമെന്നും ട്രംപ് കഴിഞ്ഞ ദിവസം പറഞ്ഞിരുന്നു.ട്രപിന്‍റെ ഭീഷണി എത്തിയതിനു പിന്നാലെ ഇന്ത്യ 24 മരുന്നുകള്‍ക്ക് കയറ്റുമതി ചെയ്യുന്നതില്‍ ഏര്‍പ്പെടുത്തിയിരുന്ന വിലക്ക് നീക്കി. എന്നാൽ ട്രംപിന്റെ ഭീഷണി ഭയന്നല്ല മനുഷ്യത്വം പരിഗണിച്ചാണ് മറ്റ് രാജ്യങ്ങളിലേക്ക് മലേറിയ മരുന്ന് കയറ്റുമതി അയക്കാന്‍ തീരുമാനിച്ചതെന്ന് ഇന്ത്യ വ്യക്തമാക്കി.ട്രംപിന്റെ ഭീഷണിയെ തുടര്‍ന്നാണ് 24 മരുന്നുകളുടെ കയറ്റുമതി നിയന്ത്രണം നീക്കിയതെന്ന വിമര്‍ശനങ്ങളുടെ പശ്ചാത്തലത്തിലാണ് വിദേശകാര്യമന്ത്രാലയം വിശദീകരണവുമായി രംഗത്തെത്തിയത്. കോവിഡ് വ്യാപനത്തില്‍ കടുത്ത ദുരിതം അനുഭവിക്കുന്ന രാജ്യങ്ങളിലേക്ക് മരുന്ന് കയറ്റുമതി ചെയ്യുമെന്ന് ഇന്ത്യ അറിയിച്ചു.മനുഷ്യത്വം പരിഗണിച്ച്‌ പാരസെറ്റമോളും ഹൈഡ്രോക്സിക്ലോറോക്വിനും ഇന്ത്യയെ ആശ്രയിക്കുന്ന അയല്‍രാജ്യങ്ങള്‍ക്കു നല്‍കാന്‍ തീരുമാനിച്ചിട്ടുണ്ടെന്ന് വിദേശകാര്യ മന്ത്രാലയം വക്താവ് അനുരാഗ് ശ്രീവാസ്തവ പറഞ്ഞു. ആവശ്യ മരുന്നുകളായ ഇവ കോവിഡ് മോശമായി ബാധിച്ച രാജ്യങ്ങള്‍ക്കും നല്‍കും. വിഷയവുമായി ബന്ധപ്പെട്ട് ഏതെങ്കിലും തരത്തിലുള്ള രാഷ്ട്രീയവല്‍ക്കരണത്തെയും ഗൂഢസിദ്ധാന്തം ചമയ്ക്കുന്നതിനെയും പ്രോത്സാഹിപ്പിക്കുന്നില്ലെന്നും അനുരാഗ് ശ്രീവാസ്തവ വ്യക്തമാക്കി.