ന്യൂഡൽഹി: ശിവസേന എം.പി രവീന്ദ്ര ഗെയിക്ക്വാദ് എയര്‍ ഇന്ത്യാ ജീവനക്കാരനെ ചെരിപ്പൂരിയടിച്ചു. ബിസിനസ് ക്ലാസിനു പകരം എക്കണോമി ക്ലാസില്‍ ഇരുത്തിയതില്‍ പ്രകോപിതനായാണ് അടിച്ചത് . ന്യൂഡല്‍ഹി വിമാനത്താവളത്തില്‍ രാവിലെ 11 മണിയോടെയാണ് സംഭവം അരങ്ങേറിയത്.
പൂണെയില്‍ നിന്നും കയറിയ എംപി ഡല്‍ഹിയിലെത്തിയപ്പോള്‍ വിമാനത്തില്‍ നിന്നും ഇറങ്ങാന്‍ കൂട്ടാക്കാതെ വ്യോമയാന മന്ത്രിയും എയര്‍ ഇന്ത്യാ ചെയര്‍മാനും മാപ്പു പറയണമെന്ന നിലപാടിൽ ഉറച്ചു നിന്നു. ഇതറിഞ്ഞ് എംപിയോട് സംസാരിക്കാനെത്തിയ ഡ്യൂട്ടി മാനേജരെയാണ് എംപി ചെരുപ്പൂരി അടിച്ചത്. നിരവധി തവണ എംപി മാനേജരെ അടിച്ചതായാണ് ദൃക്‌സാക്ഷികള്‍ പറയുന്നത്. തനിക്ക് പല പ്രാവശ്യം എയര്‍ഇന്ത്യാ അധികൃതരില്‍ നിന്നും സമാന സംഭവമുണ്ടായെന്നും ഇക്കാര്യം ചോദിച്ചപ്പോള്‍ തന്റെ നിയന്ത്രണം വിട്ടത് കൊണ്ടാണ് ഇയാളെ അടിച്ചതെന്നും ഗെയ്ക്ക്വാദ് മാധ്യമങ്ങളോട് പറഞ്ഞു.