തിരുവനന്തപുരം: തിരുവനന്തപുരത്ത് ഭര്‍ത്താവിന്റെ വെട്ടേറ്റ് ഭാര്യ മരിച്ചു. റിട്ടയേര്‍ഡ് എസ്‌ഐ ലീലയാണ് മരിച്ചത്. ഇവരെ വെട്ടിയ ശേഷം ഭര്‍ത്താവ് പൊന്നന്‍ ആത്മഹത്യ ചെയ്തു. ഇന്ന് രാവിലെ തൊടുവന്‍കോടുള്ള വീട്ടില്‍ വച്ചായിരുന്നു സംഭവം.രണ്ടുപേരും റിട്ടയേര്‍ഡ് പൊലീസുകാരാണ്. ഇവര്‍ തമ്മില്‍ ദീര്‍ഘനാളായി കുടുംബപ്രശ്‌നങ്ങള്‍ ഉണ്ടായിരുന്നതായി അയല്‍ക്കാര്‍ പറയുന്നു. കഴിഞ്ഞ ദിവസങ്ങളിലും ഇവര്‍ തമ്മില്‍ വഴക്കിട്ടു. ഇന്ന് രാവിലെ ഭാര്യയെ വെട്ടിയ ശേഷം ഭര്‍ത്താവ് പൊന്നന്‍ വീട്ടിനകത്ത് ആത്മഹത്യ ചെയ്യുകയായിരുന്നു. കുടുംബപ്രശ്‌നങ്ങളാണ് കൊലയ്ക്ക് ഇടയാക്കിയതെന്ന് പൊലീസ് പറഞ്ഞു. ഇരുവരും തമ്മില്‍ സ്വത്ത് തര്‍ക്കങ്ങള്‍ ഉണ്ടായതായും പൊലീസ് പറയുന്നു.രണ്ട് വീടുകളിലാണ് കഴിഞ്ഞിരുന്നത്. പൊന്നനും രണ്ട് പെണ്‍മക്കളും ആറു മാസം മുന്‍പ് പണിത പുതിയ വീട്ടിലാണ് താമസിച്ചിരുന്നത്. ഇതിന് എതിര്‍വശത്തുള്ള വീട്ടിലാണ് ലീല താമസിച്ചത്. ഇരുവരുടെയും ഉടമസ്ഥതയിലുള്ളതാണ് ഈ വീടുകള്‍.പൊന്നനും മക്കളും താമസിച്ചിരുന്ന വീട്ടിലേക്ക് രാവിലെ ചെന്ന ലീലയെ വാക്കുതര്‍ക്കത്തിനിടെ പൊന്നന്‍ പട്ടിക കൊണ്ട് അടിച്ച്‌ വീഴ്ത്തുകയായിരുന്നു. അടിയേറ്റ് ലീല അബോധാവസ്ഥയിലായി. സമീപത്ത് താമസിക്കുന്ന ബന്ധുക്കള്‍ വിവരം അറിയുകയും ഇവര്‍ പൊലീസില്‍ വിളിച്ചറിയിക്കുകയും ചെയ്തു. ആംബുലന്‍സ് എത്തിയതോടെയാണ് ഭാര്യ മരിച്ചു എന്ന ധാരണയില്‍ ഇയാള്‍ തൂങ്ങിമരിച്ചത്. വീടിന് സമീപത്തെ മരത്തില്‍ ആണ് പൊന്നനെ തൂങ്ങിമരിച്ച നിലയില്‍ കണ്ടെത്തിയത്.മെഡിക്കല്‍ കോളജില്‍ ചികിത്സയിലിരിക്കേയാണ് ലീല മരിച്ചത്.