ബംഗളൂരു: ചാന്ദ്രയാന്‍-2 ന്റെ ദൗത്യത്തിന്റെ ഭാഗമായി ചാന്ദ്രോപരിതലത്തില്‍ ഇറങ്ങിയ വിക്രം ലാന്‍ഡറിന്റേയും അതിനുള്ളിലെ പ്രഗ്യാന്‍ റോവറിന്റേയും ബാറ്ററിയുടെ ആയുസ് നാളെയോടെ അവസാനിക്കും. ഇതോടെ ഐഎസ്‌ആര്‍ഒയും നാസയും ലാന്‍ഡറുമായി ബന്ധപ്പെടാനുള്ള ശ്രമങ്ങള്‍ അവസാനിപ്പിച്ചേക്കും.ഒരു ചാന്ദ്രദിനം എന്നത് ഭൂമിയിലെ 14 ദിവസങ്ങളാണ്. സെപ്റ്റംബര്‍ 7-നാണ് വിക്രം ലാന്‍ഡര്‍ ചന്ദ്രന്റെ ഉപരിതലത്തില്‍ ഇടിച്ചിറങ്ങിയത്. സെപ്റ്റബര്‍ 20,21 ഓടെ ചന്ദ്രനില്‍ രാത്രിയാകും. നിലവില്‍ ലാന്‍ഡര്‍ ഇടിച്ചിറങ്ങിയ ഭാഗത്ത് സൂര്യപ്രകാശം ലഭിക്കില്ല. താപനില മൈനസ് 183 ഡിഗ്രി സെല്‍ഷ്യസാണ്. ഈ സാഹചര്യത്തില്‍ ലാന്‍ഡറിന്റെ ഇലക്‌ട്രോണിക് ഭാഗങ്ങള്‍ക്ക് സ്വയം നിലനില്‍ക്കാന്‍ സാധ്യമല്ല. ഇതിനാവശ്യമായ സോളാര്‍ ഉര്‍ജ്ജം ചന്ദ്രനില്‍ നിന്ന് ലഭിക്കില്ല. ഇതോടെ ലാന്‍ഡറുമായി ഐഎസ്‌ആര്‍ഓ ശാത്രജ്ഞര്‍ക്ക് ആശയ വിനിമയം സ്ഥാപിക്കാന്‍ കഴിയാതെ വരും. ഐഎസ്‌ആര്‍ഒയ്ക്ക് മാത്രമല്ല നാസയ്ക്കും ഇതില്‍ ഒന്നും ചെയ്യാന്‍ സാധിക്കില്ല. റോവറിന്റേയും ലാന്‍ഡറിന്റേയും ദൗത്യം ഇതോടെ അവസാനിക്കും.അതേസമയം ചന്ദ്രയാന്‍-2 ദൗത്യത്തിന് ഇന്ത്യന്‍ ജനത നല്‍കിയ പിന്തുണയ്ക്ക് ഇ സ്റോ നന്ദി രേഖപ്പെടുത്തി. ‘ഒപ്പം നിന്നതിനു നന്ദി. ലോകമെബാടുമുള്ള ഇന്ത്യക്കാരുടെ പ്രതീക്ഷകള്‍ക്കും സ്വപ്നങ്ങള്‍ക്കും ഊര്‍ജമേകി മുന്നോട്ടു പോകാനുള്ള ശ്രമം തുടരും.’- ഇസ്റോ ഔദ്യോഗിക സമൂഹ മാധ്യമ പേജില്‍ കുറിച്ചു.