കൊച്ചി:നവകേരള സൃഷ്ടിക്കായി സർക്കാർ കൊണ്ടുവന്ന സാലറി ചലഞ്ചിനെതിരെ ഹൈക്കോടതി പരാമർശം.സർക്കാർ ജീവനക്കാർ തങ്ങളുടെ ഒരുമാസത്തെ ശമ്പളം ദുരിതാശ്വാസ നിധിയിലേക്ക് നൽകണമെന്ന് അഭ്യർത്ഥിച്ച് സർക്കാർ പുറത്തിറക്കിയ ഉത്തരവിന് നിർബന്ധിത സ്വഭാവമെന്ന് ഹൈക്കോടതി നിരീക്ഷിച്ചു.ആരില്‍ നിന്നും നിര്‍ബന്ധിച്ച്‌ പണം വാങ്ങാനാകില്ലെന്നും പണം നല്‍കുന്നവരുടെ പട്ടിക മാത്രം പ്രസിദ്ധീകരിച്ചാല്‍ പോരെയെന്നും കോടതി ചോദിച്ചു. സാലറി ചലഞ്ചിന് വിസമ്മതിച്ചവരുടെ പട്ടിക എന്തിനാണ് പ്രസിദ്ധപ്പെടുത്തിയതെന്നും ഹൈക്കോടതി ഡിവിഷന്‍ ബെഞ്ച് ആരാഞ്ഞു.സാലറി ചലഞ്ച് ചോദ്യം ചെയ്ത് എന്‍.ജി.ഒ സംഘ് സമര്‍പ്പിച്ച ഹര്‍ജിയാണ് ഹൈക്കോടതിയുടെ പരിഗണനയിലുള്ളത്. അതേസമയം, സാലറി ചല‌ഞ്ചിനായി ആരെയും നിര്‍ബന്ധിക്കുന്നില്ലെന്നും മുഖ്യമന്ത്രിയുടെ അഭ്യര്‍ത്ഥന മാത്രമാണിതെന്നും അഡ്വക്കേറ്റ് ജനറല്‍ കോടതിയെ അറിയിച്ചു. എന്നാല്‍, മുഖ്യമന്ത്രിയുടെ അഭ്യര്‍ത്ഥന സര്‍ക്കാര്‍ ഉത്തരവായി ഇറക്കിയത് തെറ്റായി വ്യാഖ്യാനിക്കപ്പെടുമെന്നായിരുന്നു കോടതി ഇതിന് മറുപടി നല്‍കിയത്.