മുംബൈ:മുംബൈയിൽ കനത്ത മഴ.ശക്തമായ മഴ രണ്ട് ദിവസം കൂടി തുടരും എന്ന കാലാവസ്ഥ മുന്നറിയിപ്പിനെ തുടര്‍ന്ന് പ്രളയ ഭീതിയിലാണ് മുംബൈ നഗരം.താനെ, കല്ല്യാണ്‍ പ്രദേശങ്ങളില്‍ വീടുകളുടെ ഒന്നാം നില വരെ വെള്ളം കയറി. പ്രളയ സമാനമായ സാഹചര്യം നിലനില്‍ക്കുന്നതിനാല്‍ നേരിടാന്‍ എല്ലാ തയ്യാറെടുപ്പു നടത്തണമെന്ന് ജില്ലാ ഭരണകൂടങ്ങള്‍ക്ക് സംസ്ഥാന സര്‍ക്കാര്‍ നിര്‍ദ്ദേശം നൽകിയിട്ടുണ്ട്.കനത്തമഴയും പ്രതികൂല കാലവസ്ഥയും കാരണം മുബൈ വിമാനത്താവളത്തില്‍ നിന്നുള്ള പതിനൊന്നു വിമാനസര്‍വ്വീസുകളാണ് ഇന്നലെ റദ്ദാക്കിയിരുന്നു.മുബൈയില്‍ ഇറങ്ങേണ്ടിയിരുന്ന ഒൻപത് വിമാനങ്ങളെ സമീപ വിമാനത്താവളങ്ങളിലേക്ക് വഴി തിരിച്ചു വിടുകയും ചെയ്തിരുന്നു. മുംബൈ, താനെ, നവി മുംബൈ എന്നിവിടങ്ങളില്‍ അടുത്ത 24 മണിക്കൂറില്‍ മഴ ശക്തമാകും. തുടര്‍ന്ന് ഓറഞ്ച് അലേര്‍ട്ട് പുറപ്പെടുവിച്ചു.വിദര്‍ഭയില്‍ ഇന്ന് മാത്രം ഏതാണ്ട് 40 മില്ലീമീറ്റര്‍ മഴ പെയ്തിട്ടുണ്ട്. മറാത്ത്‌വാഡയിലും, ദക്ഷിണ മധ്യ മാഹ് മേഖലയിലും നല്ല മഴ ലഭിച്ചു. കൊളാബയില്‍ മാത്രം 24 മണിക്കൂറില്‍ പെയ്തത് 19.1 മില്ലീമീറ്റര്‍ മഴ. സാന്താക്രൂസ് സ്‌റ്റേഷനില്‍ 44 മില്ലീമീറ്റര്‍ മഴ. കഴിഞ്ഞ രണ്ട് ദിവസമായി കനത്ത മഴയില്‍ സിയോണ്‍, മാട്ടുംഗ, മാഹിം, അന്ധേരി, മലാഡ്, ദഹിസര്‍ എന്നിവിടങ്ങളില്‍ കനത്ത വെള്ളക്കെട്ടും രൂക്ഷമായ ഗതാഗതക്കുരുക്കും അനുഭവപ്പെട്ടിരുന്നു.