ഇരിട്ടി:ഡെങ്കിപ്പനി ഉൾപ്പെടെ സാംക്രമികരോഗ വ്യാപനം ശക്തമാകുന്നതായുള്ള ആശങ്കകൾക്കിടയിൽ താലൂക്ക് ആശുപത്രിയിൽ ആരോഗ്യമന്ത്രി കെ.കെ.ശൈലജ സന്ദർശനം നടത്തി. മേഖലയിൽ വിവിധ പരിപാടികൾക്കെത്തിയ മന്ത്രി താൽപര്യമെടുത്ത് താലൂക്ക് ആശുപത്രിയിൽ നേരിട്ട് എത്തി സ്ഥിതിഗതികൾ അവലോകനം ചെയ്യുകയായിരുന്നു.മേഖലയിൽ രോഗവ്യാപനം ഉണ്ടെങ്കിലും ഭീതികരമായ സാഹചര്യം ഇല്ലെന്നും സ്ഥിതിഗതികൾ നിയന്ത്രണവിധേയമാണെന്നും പ്രതിരോധ പ്രവർത്തനങ്ങൾ ഉറപ്പു വരുത്താൻ എല്ലാവരും ആത്‌മാർഥമായി ശ്രമിക്കണമെന്നും മന്ത്രി ആവശ്യപ്പെട്ടു.താലൂക്ക് ആശുപത്രിയുടെ നവീകരണത്തിന് പ്രത്യേക പരിഗണന നൽകും. മാസ്റ്റർ പ്ലാൻ തയാറാക്കാൻ നിർദേശിച്ചിട്ടുണ്ട്. ഇത് ലഭിക്കുന്നതനുസരിച്ച് ഫണ്ടും അനുവദിക്കുമെന്നും മന്ത്രി ഉറപ്പു നൽകി.