കൊല്ലം: കുണ്ടറയിൽ എൻ.സി.പി നേതാവിനെതിരെ പീഡന പരാതി നൽകിയ യുവതിയുടെ മൊഴി പോലീസ് ഇന്ന് രേഖപ്പെടുത്തും. എൻ.സി.പി സംസ്ഥാന നിർവ്വാഹക സമിതി അംഗം പത്മാകരൻ തന്റെ കൈയ്യിൽ കയറിപിടിച്ചെന്നും സമൂഹമാദ്ധ്യമങ്ങളിലൂടെ തനിക്കെതിരെ അപവാദ പ്രചാരണം നടത്തിയെന്നുമാണ് യുവതി നൽകിയ പരാതി. എൻ.സി.പി പ്രാദേശിക നേതാവിന്റെ മകളായ യുവതിയുടെ പരാതി പിൻവലിക്കാൻ നിർബന്ധിക്കുന്ന മന്ത്രി എ.കെ.ശശീന്ദ്രന്റെ ഫോൺ സംഭാഷണം പുറത്തുവന്നതോടെയാണ് സംഭവം പുറത്തറിയാൻ ഇടയായത്.അതേസമയം പീഡന കേസില്‍ പരാതിയില്‍ ഉറച്ചു നില്‍ക്കുന്നതായി യുവതി വ്യക്തമാക്കി.സര്‍ക്കാരില്‍ നിന്ന് നീതി ലഭിക്കുമെന്ന് ഉറച്ചു വിശ്വസിക്കുന്നു.പത്മാകരന് എതിരായ പരാതിയില്‍ ഉറച്ചു നില്‍ക്കുന്നു. സമൂഹ മാധ്യമത്തില്‍ കൂടി അപമാനിക്കാന്‍ തുനിഞ്ഞതോടെയാണ് നേരത്തെ നേരിട്ട പീഡന ശ്രമത്തിലും പരാതി കൊടുക്കാന്‍ തയ്യാറായത്. മന്ത്രി എ കെ ശശീന്ദ്രന്റെ ഭാഗത്തുനിന്നുണ്ടായ നടപടി തെറ്റാണ്. ഉചിതമായ നടപടി മുഖ്യമന്ത്രിയില്‍ നിന്ന് ഉണ്ടാകുമെന്ന് കരുതുന്നതായും പെണ്‍കുട്ടി പറഞ്ഞു.