കൊച്ചി:പഠനത്തിനിടെ മീൻ വില്‍പ്പന നടത്തി സോഷ്യൽ മീഡിയയിലൂടെ ശ്രദ്ധേയയായ ഹനാന് വാഹനാപകടത്തില്‍ പരിക്ക്.കൊടുങ്ങല്ലൂരിന് അടുത്ത് വച്ച്‌ ഹനാന് സഞ്ചരിച്ച വാഹനം വൈദ്യുതി തൂണിലിടിച്ചാണ് അപകടമുണ്ടായത്. കൊടുങ്ങല്ലൂരിലെ സ്വകാര്യ ആശുപത്രിയില്‍ നിന്നും പ്രാഥമിക ശുശ്രൂഷ നല്‍കിയ ശേഷം ഹനാനെ കൊച്ചി മെഡിക്കല്‍ ട്രസ്റ്റ് ആശുപത്രിയിലേക്ക് മാറ്റി. നട്ടെല്ലിന് സാരമായി പരിക്കേറ്റ ഹനാന് ഉടൻതന്നെ സത്രക്രിയ വേണമെന്ന് ഡോക്റ്റർമാർ അറിയിച്ചു. മുന്‍ സീറ്റിലിരിക്കുകയായിരുന്ന ഹനാന്റെ കാലിനും നട്ടെല്ലിനും ക്ഷതമേറ്റു. പരിശോധനയില്‍ നട്ടെല്ലിന് ഒടിവുള്ളതായി തിരിച്ചറിഞ്ഞിട്ടുണ്ട്. ഈ സാഹചര്യത്തിലാണ് ശസ്ത്രക്രിയ നടത്തുന്നത്. സ്‌പൈനല്‍ കോഡിന് പരിക്കേറ്റുവെന്നാണ് സൂചന. ഇത് മൂലം ഹനാന്റെ ഒരു വശത്തിന് ചെറിയ തളര്‍ച്ചയുമുണ്ട്. എന്നാല്‍ ബോധം നഷ്ടമായിട്ടില്ല. മെഡിക്കല്‍ ട്രസ്റ്റിലെ ന്യൂറോ സര്‍ജനായ ഡോ ഹാരൂണിന്റെ നേതൃത്വത്തിലാണ് ഹനാനെ ചികില്‍സിക്കുന്നത്. കോഴിക്കോട് ഒരു പരിപാടിക്ക് ശേഷം എറണാകുളത്തേയ്ക്ക് മടങ്ങുകയായിരുന്നു ഹനാനും സുഹൃത്തുക്കളും. ഇതിനിടെ കൊടുങ്ങല്ലൂര്‍ ഭാഗത്ത് വെച്ച്‌ എതിരെ വന്ന കാറുമായി കൂട്ടിയിടി ഒഴിവാക്കാന്‍ വെട്ടിച്ചപ്പോള്‍ ഇവരുടെ കാര്‍ മരത്തിലിടിക്കുകയായിരുന്നു.