ബെംഗളൂരു:സ്ട്രൈറ്റനിങ് ചെയ്ത ശേഷം കനത്ത മുടികൊഴിച്ചിൽ ഉണ്ടായതിനെ തുടർന്ന് മനംനൊന്ത് യുവതി ആത്മഹത്യ ചെയ്തു.കുടകിലെ മടിക്കേരിയിലാണ് സംഭവം.മൈസൂരുവില്‍ ഒന്നാം വര്‍ഷ ബിബിഎ വിദ്യാര്‍ത്ഥിനിയായ നേഹ ഗംഗമ്മയാണ് ജീവനൊടുക്കിയത്. കഴിഞ്ഞ മാസം 21ന് മൈസൂരുവിലെ ഒരു ബ്യൂട്ടി പാര്‍ലറില്‍ വെച്ചാണ് നേഹ മുടി സ്ട്രൈറ്റൺ ചെയ്തത്.അതിനു ശേഷം മുടി ധാരാളമായി കൊഴിയാൻ തുടങ്ങി.ഇതോടെ സൗന്ദര്യകാര്യത്തില്‍ ഏറെ ശ്രദ്ധയുണ്ടായിരുന്ന നേഹയ്ക്ക് കോളേജില്‍ പോകാന്‍ തന്നെ ബുദ്ധിമുട്ടായി. അലര്‍ജിയെത്തുടര്‍ന്ന് ദേഹത്ത് പാടുകളും വന്നു.ബന്ധുക്കളോടും അടുത്ത സുഹൃത്തുകളോടും ഇക്കാര്യം നേഹ പറഞ്ഞിരുന്നു. വീട്ടുകാര്‍ നിര്‍ബന്ധിച്ചതിനെത്തുടര്‍ന്ന് മടിക്കേരിയിലെ വീട്ടില്‍ നിന്ന് ഒരാഴ്ച മുൻപ് പെണ്‍കുട്ടി കോളേജിലേക്ക് പോയി. ബുധനാഴ്ച രാവിലെ ഹോസ്റ്റലില്‍ നിന്ന് ഇറങ്ങിയ ശേഷം കാണാതാവുകയായിരുന്നു.ബല്ലേലയിലെ പുഴക്കരയില്‍ നിന്നാണ് നേഹയുടെ മൃതദേഹം കണ്ടെടുത്തത്. ബ്യൂട്ടിപാര്‍ലര്‍ ജീവനക്കാരുടെ പിഴവാണ് ആത്മഹത്യക്ക് പ്രേരണയായതെന്ന രക്ഷിതാക്കളുടെ പരാതിയില്‍ പാര്‍ലര്‍ ഉടമക്കെതിരെ പൊലീസ് കേസെടുത്തു.സ്‌ട്രൈറ്റനിഗിന് രാസപദാര്‍ത്ഥങ്ങള്‍ അമിതമായി ഉപയോഗിച്ചതിലും തല ചൂടാക്കിയതിലും പറ്റിയ അബദ്ധമാണ് മുടി ധാരാളമായി കൊഴിയാന്‍ ഇടയാക്കിയതെന്നാണ് പൊലീസ് പറയുന്നത്.