ന്യൂഡൽഹി:കനത്ത സുരക്ഷാ വലയത്തിൽ ഹാദിയയെ ഡൽഹിയിലെ കേരളാ ഹൗസിലെത്തിച്ചു.നാളെയാണ് കേസ് സുപ്രീം കോടതി പരിഗണിക്കുന്നത്.കേരളാ ഹൗസും പരിസരവും കനത്ത പോലീസ് വലയത്തിനകത്താണ്.കേരളാ ഹൗസിലേക്കുള്ള വഴിയും പോലീസ് അടച്ചിരിക്കുകയാണ്.ഡൽഹി അന്താരാഷ്ട്ര വിമാനത്താവളത്തിൽ വിമാനമിറങ്ങിയ ഹാദിയയുടെ സുരക്ഷാ ചുമതല ഡൽഹി പോലീസ് ഏറ്റെടുത്തു.വി ഐ പി ഗേറ്റ് വഴി ഹാദിയയെ പുറത്തെത്തിക്കുമെന്നാണ് പോലീസ് പറഞ്ഞതെങ്കിലും മാധ്യമങ്ങളുടെ കണ്ണ് വെട്ടിച്ച് ഹാദിയയെ മറ്റൊരു ഗേറ്റിലൂടെ പോലീസ് പുറത്തെത്തിച്ചു.കേരളഹൗസിൽ മുൻപിലത്തെ ഗേറ്റിൽ കാത്തുനിന്നവരെ വീണ്ടും നിരാശരാക്കി പിന്നിലത്തെ ഗേറ്റ് വഴി ഹാദിയയെ കേരളഹൗസിനുള്ളിലെത്തിച്ചു.കേരളഹൗസിലേക്കുള്ള വഴിയടച്ച പോലീസ് അതിഥികളെയല്ലാതെ ആരെയും അകത്തേക്ക് പ്രവേശിപ്പിക്കുന്നില്ല.മാധ്യമങ്ങൾക്കും വിലക്കേർപ്പെടുത്തിയിരിക്കുകയാണ്. കേരളഹൗസിലെ പൊതു കാന്റീനിലേക്ക് പുറത്തുനിന്നുള്ളവർക്ക് പ്രവേശനം നിഷേധിച്ചിരിക്കുകയാണ്.അതേസമയം കനത്ത പോലീസ് സുരക്ഷയിലും ഇന്നലെ നെടുമ്പാശ്ശേരി വിമാനത്താവളത്തിൽ വെച്ച് ഹാദിയ മാധ്യമങ്ങളോട് സംസാരിച്ചത് സുരക്ഷാ വീഴ്ചയാണെന്നാണ് ആരോപണം.രണ്ടു ദിവസമായി ഹാദിയയുടെ വൈക്കത്തെ വീട്ടിൽ നിന്നുപോലും മാധ്യമങ്ങളെ പോലീസ് അകറ്റി നിർത്തിയിരിക്കുകയായിരുന്നു. ഹാദിയ മാധ്യമങ്ങളോട് പ്രതികരിച്ചതിൽ ഡിജിപി ലോക്നാഥ് ബെഹ്‌റയും അതൃപ്തി പ്രകടിപ്പിച്ചിട്ടുണ്ട്.