തിരുവനന്തപുരം: സംസ്ഥാനത്ത് ഏഴ് ജില്ലകളില്‍ പ്ലസ് വണ്ണിന് 20 ശതമാനം അധിക സീറ്റുകള്‍ അനുവദിക്കാൻ സർക്കാർ തീരുമാനം.തിരുവനന്തപുരം, പാലക്കാട്, കോഴിക്കോട്, മലപ്പുറം, വയനാട്, കണ്ണൂര്‍, കാസര്‍കോട്, എന്നീ ജില്ലകളിലെ സര്‍ക്കാര്‍, എയ്ഡഡ് ഹയര്‍സെക്കന്ററി സ്കൂളുകളിലാണ് അധിക സീറ്റുകൾ അനുവദിച്ചിരിക്കുന്നത്.ഇതോടെ സംസ്ഥാനത്തെ മുഴുവന്‍ സ്‌കൂളുകളിലെയും എല്ലാ ബാച്ചുകളിലും 10 വിദ്യാര്‍ഥികളെ വീതം അധികമായി പ്രവേശിപ്പിക്കാന്‍ കഴിയും. അണ്‍ എയ്ഡഡ് സ്കൂളുകളിൽ സീറ്റ് വര്‍ധനയില്ല.നിലവില്‍ ഹയര്‍സെക്കന്‍ഡറികളില്‍ ആകെ 3,60,000 സീറ്റുകളുണ്ട്. 20 ശതമാനം സീറ്റുകള്‍ വര്‍ധിപ്പിച്ചപ്പോള്‍ 62000 കുട്ടികളെ അധികമായി പ്രവേശിപ്പിക്കാനാകും.ഇത്തവണ റിക്കാര്‍ഡ് വിജയമാണ് പത്താം ക്ലാസിലുണ്ടായിരിക്കുന്നത്. പത്താം ക്ലാസ് വിജയിച്ച എല്ലാവര്‍ക്കും പ്ലസ് വണ്‍ പ്രവേശനം സാധ്യമാകില്ലെന്നും സീറ്റുകള്‍ വര്‍ധിപ്പിക്കണമെന്നും ആവശ്യമുയര്‍ന്ന പശ്ചാത്തലത്തിലാണ് സീറ്റ് വര്‍ധിപ്പിച്ചത്.