പത്തനംതിട്ട: തെരുവ് നായയുടെ കടിയേറ്റ് ചികിത്സയിലായിരുന്ന പെൺകുട്ടി മരിച്ചു.റാന്നി പെരുനാട് സ്വദേശിനിയായ അഭിരാമിയാണ് മരിച്ചത്. കോട്ടയം മെഡിക്കൽ കോളേജിൽ ചികിത്സയിലിരിക്കെ ആയിരുന്നു അന്ത്യം.കഴിഞ്ഞ മാസം 13 നാണ് അഭിരാമിക്ക് നായയുടെ കടിയേറ്റത്. രാവിലെ പാൽ വാങ്ങാൻ പോയ പെൺകുട്ടിയെ തെരുവ്നായ ആക്രമിക്കുകയായിരുന്നു. കണ്ണിലും മുഖത്തും കാലിലും ഉൾപ്പെടെ എട്ട് ഇടത്താണ് കുട്ടിക്ക് കടിയേറ്റത്. അന്ന് തന്നെ പത്തനംതിട്ട ജനറൽ ആശുപത്രിയിൽ പ്രവേശിപ്പിച്ച് വാക്‌സിൻ എടുത്തു. വീണ്ടും രണ്ട് തവണ വാക്‌സിൻ സ്വീകരിച്ചിരുന്നു. നാലാമത്തെ ഡോസ് ഈ മാസം സ്വീകരിക്കാനിരിക്കെയാണ് കുട്ടിക്ക് അസ്വസ്ഥതകൾ അനുഭവപ്പെട്ടത്. ഉടൻ തന്നെ കുട്ടിയെ പത്തനംതിട്ട ജനറൽ ആശുപത്രിയിൽ എത്തിച്ചെങ്കിലും സ്ഥിതി ഗുരുതരമായതിനാൽ കോട്ടയം മെഡിക്കൽ കോളേജിലേക്ക് മാറ്റി. തുടർന്ന് വെന്റിലേറ്ററിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.