കണ്ണൂർ:തീവണ്ടിയിറങ്ങി നഗരത്തിലൂടെ നടന്നുപോവുകയായിരുന്നയാളെ ആക്രമിച്ച് സ്വർണ്ണമാല തട്ടിയ നാലംഗ സംഘത്തെ കണ്ണൂർ ടൌൺ പോലീസ് അറസ്റ്റ് ചെയ്തു.ഏച്ചൂർ ദാവത്ത് ഹൗസിൽ ദിൽഷാദ്(23),കാഞ്ഞിരോട് കാരക്കാട് ആനിയത്ത് ഹൗസിൽ ജുനൈസ്(29),കാഞ്ഞിരോട് ഹാജിമെട്ട ക്വാർട്ടേഴ്സിൽ കെ.ഇർഷാദ്(25),കാഞ്ഞിരോട് സ്വദേശി ഇ.കെ അബ്ദുൽ നസീർ(34) എന്നിവരാണ് അറസ്റ്റിലായത്. ഇവർ സഞ്ചരിച്ച ഓമ്നി വാനും പോലീസ് കസ്റ്റഡിയിലെടുത്തു.കഴിഞ്ഞ മാസം ഇരുപത്തിയെട്ടാം തീയതിയാണ് സംഭവം നടന്നത്. മെഡിക്കൽ റെപ്രെസെന്ററ്റീവ് ചാലോട് ജയന്തി നിവാസിൽ മഹേഷ് എം നായരാണ് കവർച്ചയ്ക്കിരയായത്. രാത്രിയിൽ തീവണ്ടി ഇറങ്ങി നടന്നുപോവുകയായിരുന്ന മഹേഷ് തളിക്കാവിനു സമീപം ഒരു സുഹൃത്തുമായി സംസാരിച്ചു നിൽക്കവേ വാനിലെത്തിയ സംഘം ആക്രമിക്കുകയായിരുന്നു.പരിക്കേറ്റ മഹേഷിന്റെ മാലയുമായി സംഘം കടന്നുകളഞ്ഞു. സംഭവത്തിന് ശേഷം പോലീസ് പിടിച്ചേക്കുമെന്ന ഭീതിയിൽ നാലുപേരും കുറച്ചു ദിവസം കണ്ണൂരിലുണ്ടായിരുന്നില്ല.കഴിഞ്ഞ ദിവസം കണ്ണൂരിൽ ഇവരെ കണ്ട മഹേഷ് തന്നെയാണ് പോലീസിനെ വിവരം അറിയിച്ചത്.ടൌൺ സിഐ രത്നകുമാറിന്റെ നിർദേശപ്രകാരം എസ്‌ഐ ശ്രീജിത്ത് കോടേരിയും സംഘവുമെത്തി നാലുപേരെയും പിടികൂടുകയായിരുന്നു.