Full Grid

കൊച്ചി:കൊച്ചിയിൽ നടിയെ ആക്രമിച്ച കേസിൽ ദൃശ്യങ്ങൾ ആവശ്യപ്പെട്ട് ദിലീപ് സമർപ്പിച്ച ഹർജി ഹൈക്കോടതി ഇന്ന് പരിഗണിക്കും.പ്രതിയുടെ അവകാശത്തെ ഹനിക്കരുത് എന്ന് കാണിച്ചാണ് ദൃശ്യങ്ങൾ ആവശ്യപ്പെട്ട് ദിലീപ് ഹൈക്കോടതിയെ സമീപിച്ചിരിക്കുന്നത്. നേരത്തെ ദൃശ്യങ്ങൾ ആവശ്യപ്പെട്ട് ദിലീപ് നൽകിയ ഹർജി അങ്കമാലി കോടതി തള്ളിയിരുന്നു. ദിലീപിന് കൈമാറിയാൽ ദൃശ്യങ്ങൾ പുറത്താകുമെന്ന പ്രോസിക്യൂഷൻ വാദം ഹൈക്കോടതി അംഗീകരിക്കുകയായിരുന്നു.കുറ്റപത്രത്തിനൊപ്പം പൊലീസ് നല്‍കിയ രേഖകള്‍ ആവശ്യപ്പെട്ടു ദിലീപ്  നല്‍കിയ ഹര്‍ജിയില്‍ വിചാരണ സമയത്ത് പൊലീസ് സമര്‍പ്പിക്കുന്ന രേഖകളുടെയും തെളിവുകളുടെയും പട്ടിക നല്‍കാന്‍ കോടതി പൊലീസിനോട് ആവശ്യപ്പെട്ടിരുന്നു. ഇതുപ്രകാരം ഗൗരവസ്വഭാവമുള്ള ചില രേഖകള്‍ ഒഴികെ മറ്റുള്ളവ പൊലീസ് പ്രതിഭാഗത്തിനു കൈമാറിയിട്ടുണ്ട്.എന്നാൽ നടി അക്രമിക്കപ്പെടുന്നതിന്റെ ദൃശ്യങ്ങൾ  പോലീസ് പ്രതിക്ക് കൈമാറിയിരുന്നില്ല.

തിരുവനന്തപുരം:സംസ്ഥാനത്ത് ഏപ്രിൽ ഒന്ന് മുതൽ മദ്യത്തിന് വിലകൂടും.വിവിധയിനം ബ്രാൻഡുകൾക്ക് 65 ശതമാനത്തോളമായിരിക്കും വില കൂടുക. ബിയറിനും വൈനിനും 30 ശതമാനം വർധന ഉണ്ടാകും. വില്‍പ്പന നികുതി 135 ശതമാനത്തില്‍ നിന്ന് 200 ശതമാനമായി ഉയരുന്നതാണ് വില വര്‍ധനയ്ക്ക് കാരണമാകുന്നത്.ബിയറിന്റെയും വൈനിന്റെയും വിൽപ്പന നികുതി 70 ശതമാനത്തിൽ നിന്നും 100 ശതമാനമാകും.

മട്ടന്നൂർ:ജീപ്പിൽ കടത്തുകയായിരുന്ന സ്‌ഫോടക വസ്തുക്കളുമായി രണ്ടുപേർ മട്ടന്നൂർ പോലീസിന്റെ പിടിയിലായി.തമിഴ്നാട്ടെ തിരുവണ്ണാമലൈ കോടിക്കുപ്പത്തെ ചെട്ടിയാർ സ്ട്രീറ്റിൽ കെ.എളുമലൈ (37), മയ്യിൽ പാവ്വന്നൂർ മൊട്ടയിലെ പി.പി.ഹരീഷ് (34) എന്നിവരെയാണ് മട്ടന്നൂർ എസ് ഐ കെ.രാജീവ് സംഘവും അറസ്റ്റു ചെയ്തത്. തമിഴ്നാട്ടിൽ നിന്നും ഇരിക്കൂർ ഭാഗത്തേക്ക് കടത്തികൊണ്ടു പോകുന്ന സ്ഫോടക വസ്തുക്കളാണ് പിടികൂടിയത്.ഇവർ സഞ്ചരിച്ച ജീപ്പിൽ നിന്നും 49 ഡിറ്റണേറ്ററുകളും 21 ജെലാറ്റിൻ സ്റ്റിക്കുകളും പിടികൂടി.സ്ഫോടക വസ്തുവും ജീപ്പും പോലീസ് കസ്റ്റഡിയിലെടുത്തിട്ടുണ്ട്.വെള്ളിയാഴ്ച രാത്രി വെള്ളിയാംപറമ്പിൽ വെച്ച് വാഹനപരിശോധനയ്ക്കിടെയാണ് ഇവർ പിടിയിലായത്.ജീപ്പിനുള്ളിൽ പ്ലാസ്റ്റിക്ക് കവറിൽ ഒളിപ്പിച്ചുവെച്ച നിലയിലായിരുന്നു സ്‌ഫോടക വസ്തുക്കളെന്ന് പോലീസ് പറഞ്ഞു. മട്ടന്നൂരിൽ നിന്നും ഇരിക്കൂർ ഭാഗത്തേക്ക് കടത്തിക്കൊണ്ടുപോവുകയായിരുന്നു ഇവ.മട്ടന്നൂർ മേഖലയിൽ ചിലയിടങ്ങളിൽ രാത്രി കാലങ്ങളിൽ സ്ഫോടനമുണ്ടാകുന്നതിനാൽ പോലീസ് ഇവിടെ പരിശോധന ശക്തിപ്പെടുത്തിയിട്ടുണ്ട്.

തിരുവനന്തപുരം:സംസ്ഥാനത്ത് ഒരു മണിക്കൂര്‍ വൈദ്യുത വിളക്കുകള്‍ അണച്ച്‌ ഭൗമ മണിക്കൂര്‍ ആചരിക്കും.രാത്രി 8.30നും 9.30 നുമിടയിലാണ് ഊര്‍ജ്ജ സംരക്ഷണം പ്രോത്സാഹിപ്പിക്കല്‍ ലക്ഷ്യമിട്ട് കൊണ്ട് ലോകവ്യാപകമായി ഭൗമ മണിക്കൂര്‍ ആചരിക്കുന്നത്.വീടുകളിലും ഓഫീസിലും അത്യാവശ്യമല്ലാത്ത വൈദ്യുതി വിളക്കുകളും വൈദ്യുത ഉപകരണങ്ങളും അണച്ച്‌ ഭൗമ മണിക്കൂര്‍ ആചരണത്തില്‍ പങ്കാളികളാകാന്‍ ഗവര്‍ണര്‍ ജസ്റ്റിസ് പി. സദാശിവം സംസ്ഥാനത്തെ ജനങ്ങളോടും സ്ഥാപനങ്ങളോടും അഭ്യര്‍ത്ഥിച്ചു.ഉര്‍ജ്ജ സംരക്ഷണം പ്രോത്സാഹിപ്പിക്കല്‍ ലക്ഷ്യമിട്ടാണ് ലോകവ്യാപകമായി ഇന്ന് ഭൗമമണിക്കൂർ ആചരിക്കുന്നത്.ഇതിനു പിന്തുണ പ്രഖ്യാപിച്ച്‌ കൊണ്ടാണ് സംസ്ഥാനത്ത് ഇന്ന് രാത്രി ഒരു മണിക്കൂര്‍ വൈദ്യുത വിളക്കുകള്‍ അണച്ചിടുന്നത്.