Full Grid

കണ്ണൂർ:ഗാന്ധിയൻ കെ.പി.എ റഹിം പ്രസംഗത്തിനിടെ കുഴഞ്ഞുവീണു മരിച്ചു.മാഹിയിൽ ഗാന്ധിസ്‌മൃതി യാത്രയുടെ സമാപനച്ചടങ്ങിൽ സംസാരിച്ചുകൊണ്ടിരിക്കവേ കുഴഞ്ഞുവീഴുകയായിരുന്നു.ഞായറാഴ്ച രാവിലെ 10.10 നു പ്രസംഗം തുടങ്ങി.10.20 ഓടെ കുഴഞ്ഞുവീഴുകയായിരുന്നു.ഉടൻതന്നെ മാഹി ഗവ.ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു.ഗാന്ധി യുവമണ്ഡലം,കേരളം സർവോദയ മണ്ഡലം,ഹിന്ദ് സ്വരാജ് ശതാബ്തി സമിതി,കണ്ണൂർ ജില്ലാ ഗാന്ധി സെന്റിനറി മെമ്മോറിയൽ സൊസൈറ്റി എന്നിവയുടെ പ്രെസിഡന്റായി പ്രവർത്തിച്ചിരുന്നു.ശ്രീനാരായണഗുരു,ഗാന്ധിജി,വാഗ്‌ഭടാനന്ദൻ എന്നിവരുടെ മതസമന്വയ സന്ദേശത്തിന്റെയും സൂഫി ദർശനത്തിന്റെയും പ്രചാരകനായിരുന്നു. ആകാശവാണിയിൽ, പ്രത്യേകിച്ച് വിദ്യാഭ്യാസപരിപാടിയിൽ പ്രഭാഷണം, ചിത്രീകരണം, പ്രശ്നോത്തരി, പുസ്തകാസ്വാദനം എന്നിവ പ്രക്ഷേപണം ചെയ്തിട്ടുണ്ട്. ഗാന്ധിദർശൻ പ്രോഗ്രാമിന്റെ ഭാഗമായി ദൂരദർശനിൽ ക്ലാസുകൾ സംപ്രേഷണം ചെയ്തിരുന്നു. കെ.ജനാർദനൻ പിള്ള പുരസ്കാരം, സി.എച്ച്.മൊയ്തുമാസ്റ്റർ സ്മാരക പുരസ്കാരം എന്നിവ ലഭിച്ചിട്ടുണ്ട്.പാനൂരിന്റെ സാംസ്‌കാരിക മുഖമായിരുന്ന റഹീം മാസ്റ്റര്‍ കക്ഷിരാഷ്ട്രിയത്തിനതീതമായി വലിയൊരു സുഹൃദ്ബന്ധത്തിന് ഉടമ കൂടിയാണ്.കെ.കെ.വി. മെമ്മോറിയൽ പാനൂർ ഹയർ സെക്കൻഡറി സ്കൂളിൽനിന്ന് 2003-ൽ വിരമിച്ചു.പരേതരായ പൈക്കാട്ട് അബൂബക്കറിന്റെയും കുഞ്ഞിപ്പറമ്പത്ത് കുഞ്ഞാമിയുടെയും മകനാണ്. ഭാര്യ: നഫീസ. മക്കൾ: ലൈല, ജലീൽ,കബീർ .

ശബരിമല:ശബരിമല മകരവിളക്ക് ഇന്ന്.മകരസംക്രമ സന്ധ്യയില്‍ ചാര്‍ത്താനായി പന്തളം കൊട്ടാരത്തില്‍ നിന്ന് ആഘോഷമായി കൊണ്ടുവരുന്ന തിരുവാഭരണം വൈകിട്ട് 5.30ന് ശരംകുത്തിയില്‍ നിന്ന് ദേവസ്വം അധികൃതര്‍ തീവെട്ടിയുടെയും വാദ്യമേളങ്ങളുടെയും അകമ്പടിയോടെ സ്വീകരിച്ച്‌ ആനയിക്കും. പതിനെട്ടാംപടി കയറി സോപാനത്ത് എത്തുമ്പോൾ തന്ത്രി കണ്ഠര് രാജീവര്, മേല്‍ശാന്തി വി.എന്‍.വാസുദേവന്‍ നമ്പൂതിരി എന്നിവര്‍ ചേര്‍ന്ന് ഏറ്റുവാങ്ങി ദീപാരാധനയ്ക്കായി നട അടയ്ക്കും. തിരുവാഭരണം ചാര്‍ത്തി വൈകിട്ട് 6.30ന് ദീപാരാധന. തുടര്‍ന്നു പൊന്നമ്മബലമേട്ടിൽ മകര ജ്യോതി തെളിയും.ഇന്ന് ഉച്ചപൂജ കഴിഞ്ഞ് നട അടച്ചാല്‍ വൈകിട്ട് 6.30ന് തിരുവാഭരണം ചാര്‍ത്തി ദീപാരാധന കഴിയും വരെ തീര്‍ത്ഥാടകരെ പതിനെട്ടാംപടി കയറാന്‍ അനുവദിക്കില്ല. ഉച്ചയ്ക്കു ശേഷം തിരുവാഭരണ ഘോഷയാത്ര ശരംകുത്തിയില്‍ എത്തുംവരെ പമ്ബയില്‍ നിന്നു സന്നിധാനത്തേക്ക് തീര്‍ത്ഥാടകരെ വിടില്ല. വലിയ തിരക്കുള്ളതുകൊണ്ട് സുരക്ഷാപ്രശ്നം മുൻനിർത്തി യുവതികളേയും ഇന്ന് മല കയറാന്‍ അനുവദിക്കില്ല.നിലയ്ക്കല്‍ മുതല്‍ യുവതികളെത്തുന്നുണ്ടോ എന്ന് പൊലീസ് പരിശോധിക്കും. യുവതികളെത്തിയാല്‍ സന്നിധാനത്ത് എന്തും സംഭവിക്കാമെന്ന സാഹചര്യമുണ്ടെന്ന് പൊലീസ് തിരിച്ചറിയുന്നു. രഹസ്യാന്വേഷണ റിപ്പോര്‍ട്ടുമുണ്ട്. ഈ സാഹചര്യത്തിലാണ് നിരീക്ഷണവും നിയന്ത്രണവും കര്‍ശനമാക്കുന്നത്.

കണ്ണൂർ:അഞ്ചരക്കണ്ടി ചാമ്പാട് ഓയിൽ മില്ലിന് തീപിടിച്ചു.എന്‍.രഘുനാഥിന്റെ ഉടമസ്ഥതയിലുള്ള രാസണ്‍സ് ഓയില്‍ മില്ലിനാണ് തീപിടിച്ചത്.കൊപ്ര മില്ലിനോട് ചേര്‍ന്നുള്ള കൊപ്ര ഡ്രയര്‍ യൂണിറ്റില്‍ നിന്നാണ് തീ പടര്‍ന്നത്. പരിസരത്തുള്ളവരാണ് തീ ആദ്യം കണ്ടത്. ഉടന്‍ തന്നെ അഗ്നിരക്ഷാസേനയുടെ മൂന്ന് യൂണിറ്റുകള്‍ സ്ഥലത്തെത്തി തീ അണച്ചു. തീപിടുത്തത്തിന്റെ കാരണം വ്യക്തമായിട്ടില്ല.ഡ്രയര്‍ യൂണിറ്റില്‍ ഉണക്കാന്‍ വെച്ച കൊപ്രയും സംഭരണ യൂണിറ്റില്‍ സൂക്ഷിച്ചിരുന്ന കൊപ്രകളും കത്തിനശിച്ചിട്ടുണ്ട്. 30 ലക്ഷം രൂപയുടെ നഷ്ടം പ്രാഥമികമായി കണക്കാക്കുന്നുണ്ട്.