Full Grid

തൃശൂർ: തൃശൂരിൽ കണ്ണംകുഴി പാലത്തിനു സമീപം കാട്ടാനയുടെ ആക്രമണത്തില്‍ അഞ്ച് വയസുകാരി കൊല്ലപ്പെട്ടു.പുത്തന്‍ചിറ കിഴക്കുംമുറി കച്ചട്ടില്‍ നിഖിലിന്‍റെ മകള്‍ അഗ്നീമിയ ആണു കൊല്ലപ്പെട്ടത്. പരിക്കേറ്റ പിതാവ് നിഖില്‍ (36), ബന്ധു വെറ്റിലപ്പാറ സ്വദേശി നെടുമ്പ ജയന്‍ (50) എന്നിവരെ ചാലക്കുടി സെന്‍റ്  ജെയിംസ് ആശുപത്രിയില്‍ പ്രവേശിപ്പിച്ചു.മുത്തശിയുടെ മരണാനന്തര ചടങ്ങിനെത്തിയതായിരുന്നു കുടുംബം. ഇവരുടെ വീടിന് സമീപത്ത് നിന്നും അല്‍പം മാറിയാണ് ഒറ്റയാനെ കണ്ടത്. ബൈക്കില്‍ വരികയായിരുന്ന നിഖിലും ഭാര്യ പിതാവ് ജയനും ആഗ്നിമിയയും ആനയെ കണ്ടതോടെ ബൈക്ക് നിര്‍ത്തി. ആന ഇവര്‍ക്ക് നേരെ തിരിഞ്ഞതോടെ മൂന്നുപേരും ചിതറിയോടി. ഓടുന്നതിനിടയില്‍ കുട്ടിയെ ആന ആക്രമിച്ചു. തലയ്ക്ക് ചവിട്ടേറ്റ കുട്ടിയെ രക്ഷിക്കാന്‍ ശ്രമിക്കുന്നതിനിടയില്‍ അച്ഛന്‍ നിഖിലിനും അപ്പൂപ്പന്‍ ജയനും പരിക്കേറ്റു. മൂന്ന് പേരെയും നാട്ടുകാര്‍ ചാലക്കുടി സെന്റ് ജെയിംസ് ആശുപത്രിയില്‍ എത്തിച്ചു. എന്നാല്‍ കുട്ടിയുടെ ജീവന്‍ രക്ഷിക്കാനായില്ല.അതിസമയം സംഭവത്തിൽ പ്രതിഷേധവുമായി നാട്ടുകാര്‍ രംഗത്തെത്തി.പ്രദേശത്ത് കാട്ടാനയുടെ ശല്യം രൂക്ഷമാണെന്നും ജനവാസമേഖലയില്‍ നിന്നും വന്യമൃഗങ്ങളെ തുരത്താന്‍ നടപടി വേണമെന്നുമാണ് നാട്ടുകാര്‍ ഉന്നയിക്കുന്ന പ്രധാന ആവശ്യം.അതിരപ്പിള്ളി ആനമല റോഡ് നാട്ടുകാര്‍ ഉപരോധിക്കുകയും ചാലക്കുടിയില്‍ നിന്ന് വാല്‍പ്പാറയിലേക്കുള്ള വാഹനങ്ങള്‍ നാട്ടുകാര്‍ തടയുകയും ചെയ്തു. കളക്ടറും ബന്ധപ്പെട്ട ഉദ്യോഗസ്ഥരും സ്ഥലത്തെത്തി ചര്‍ച്ച ചെയ്ത് ജനങ്ങള്‍ക്ക് ബോധ്യമാകുന്ന രീതിയില്‍ പ്രശ്‌നം പരിഹരിക്കണമെന്ന് നാട്ടുകാര്‍ ആവശ്യപ്പെട്ടു.

തിരുവനന്തപുരം: സംസ്ഥാനത്ത് ബസ് ചാര്‍ജ് വര്‍ധന ഉടന്‍ നടപ്പിലാക്കും.മിനിമം ചാര്‍ജ് പത്ത് രൂപയായി ഉയര്‍ത്താനാണ് തീരുമാനം. പുതുക്കിയ നിരക്ക് ഉടന്‍ പ്രഖ്യാപിക്കും. വിദ്യാര്‍ത്ഥികളുടെ കണ്‍സെഷനും വര്‍ധിപ്പിക്കാന്‍ തീരുമാനമായി. വിദ്യാര്‍ത്ഥികളുടെ കണ്‍സെഷന്‍ രണ്ട് രൂപയില്‍ നിന്നും അഞ്ച് രൂപയായി ഉയരും. ബിപിഎല്‍ വിദ്യാര്‍ത്ഥികള്‍ക്ക് സൗജന്യ യാത്ര അനുവദിക്കും. കിലോമീറ്ററിന് നിലവില്‍ ഈടാക്കുന്ന 90 പൈസ എന്നത് ഒരു രൂപയാക്കി വര്‍ധിപ്പിക്കും. രാത്രിയാത്രയ്ക്ക് മിനിമം ചാര്‍ജ് 14 രൂപയാക്കും. രാത്രി എട്ടിനും പുലര്‍ച്ചെ അഞ്ചിനും സഞ്ചരിക്കുന്നവര്‍ക്കാണ് അധിക നിരക്ക് നല്‍കേണ്ടി വരിക.മുഖ്യമന്ത്രി പിണറായി വിജയന്‍ വിദേശത്തുനിന്ന് തിരിച്ചെത്തിയ ശേഷം ബസ് ചാര്‍ജ് വര്‍ധനവ് നടപ്പിലാക്കുമെന്ന് ഗതാഗത മന്ത്രി ആന്റണി രാജു വ്യക്തമാക്കിയിരുന്നു. മന്ത്രിസഭാ യോഗത്തില്‍ പുതുക്കിയ നിരക്ക് പ്രഖ്യാപിക്കുമെന്നാണ് വിവരം.ജസ്റ്റിസ് രാമചന്ദ്രന്‍ കമ്മിറ്റിയുടെ ശുപാര്‍ശയുടെ അടിസ്ഥാനത്തിലാണ് നിരക്ക് വര്‍ധന നടപ്പിലാക്കുന്നത്.

കണ്ണുര്‍:കണ്ണൂരില്‍ സിപിഎം പ്രവര്‍ത്തകന്റെ വീട്ടിന് മുന്നില്‍ നിര്‍ത്തിയിട്ട വാഹനങ്ങള്‍ തീവച്ച്‌ നശിപ്പിച്ചു.തിങ്കളാഴ്‌ച്ച പുലര്‍ച്ചെയാണ് സംഭവം.കണ്ണൂര്‍ കക്കാട് റോഡിലെ രാമതെരുവില്‍ ബിജു പാലയുടെ വീടിന് മുന്‍പില്‍ നിര്‍ത്തിയിട്ട വാഹനങ്ങളാണ് ആക്രമികള്‍ തീവച്ച്‌ നശിപ്പിച്ചത്.സ്‌കൂട്ടറും സൈക്കിളും പൂര്‍ണമായും കത്തിനശിച്ചു. ഷെഡില്‍ നിര്‍ത്തിയിട്ട ഓട്ടോയും ഭാഗികമായി കത്തിയിട്ടുണ്ട്.സംഭവമറിഞ്ഞെത്തിയ ഫയര്‍ഫോഴ്‌സ് തീയണച്ചതിനാല്‍ കൂടുതല്‍ ദുരന്തം ഒഴിവായി.പുഴാതി ലോക്കല്‍ കമ്മിറ്റിയംഗവും സഹകരണ ബാങ്ക് ജീവനക്കാരനുമാണ് ബിജു. കണ്ണുര്‍ നഗരത്തില്‍ പിടിമുറുക്കിയ മയക്കുമരുന്ന് മാഫിയ സംഘത്തിനെതിരെ ബിജുവിന്റെ നേതൃത്വത്തില്‍ നിരവധി പ്രതിഷേധ സമരങ്ങള്‍ നടത്തിയിരുന്നു.ഇതിന്റെ വൈരാഗ്യമാവാം അക്രമത്തിന് പിന്നിലെന്ന് കരുതുന്നു.സംഭവത്തില്‍ പൊലിസ് അന്വേഷണമാരംഭിച്ചിട്ടുണ്ട്.ഫോറന്‍സിക് വിഭാഗവും വിരലടയാള വിദഗ്ദ്ധരും സ്ഥലത്തെത്തി അന്വേഷണം നടത്തി.എ എസ്‌പി ട്രെയിനി വിജയ് ഭരത് റെഡ്ഡി, കണ്ണൂര്‍ ടൗണ്‍ എസ്.എച്ച്‌.ക ശ്രീജിത്ത് കോടേരി എന്നിവര്‍ സംഭവ സ്ഥലത്തെത്തി പരിശോധന നടത്തി. പ്രദേശത്തെ സി.സി.ടി.വി ക്യാമറകള്‍ പൊലിസ് പരിശോധിക്കുന്നുണ്ട്.

കണ്ണൂര്‍: ബഹ്‌റിനില്‍ നിന്നും മടങ്ങി വരുന്നതിനിടെ കാണാതായ നാറാത്ത് സ്വദേശിയുടെ മൃതദേഹം പഴയങ്ങാടി പുഴയില്‍ കണ്ടെത്തി. പാമ്പുരുത്തി മേലേ പാത്ത് വീട്ടില്‍ അബ്ദുല്‍ ഹമീദിന്റെ (42) മൃതദേഹമാണ് ഞായറാഴ്‌ച്ച വൈകുന്നേരത്തോടെ പഴയങ്ങാടി പുഴയില്‍ നിന്നും കണ്ടെത്തിയത്. ശനിയാഴ്‌ച്ച ബഹ്‌റിനില്‍ നിന്നും കരിപ്പൂരില്‍ വിമാനമിറങ്ങി നാട്ടിലേക്ക് വരികയായിരുന്നു. കോഴിക്കോട് നിന്നും കണ്ണൂരിലേക്ക് ട്രെയിനിലാണ് വന്നിരുന്നത്.എന്നാല്‍ ഇയാള്‍ വീട്ടിലെത്താത്തതിനെ തുടര്‍ന്ന് വീട്ടുകാര്‍ വിവരം പൊലിസില്‍ അറിയിക്കുകയായിരുന്നു. റെയില്‍വേ പൊലിസ് സി.സി.ടി.വി ക്യാമറകള്‍ പരിശോധിച്ചപ്പോഴാണ് ഇയാള്‍ കണ്ണൂരില്‍ ട്രെയിനിറങ്ങിയില്ലെന്ന് വ്യക്തമായത്. ഇതിനിടെ അബ്ദുല്‍ ഹമീദിന്റെ പാസ്‌പോര്‍ട്ട് ഉള്‍പെടെയുള്ള ലഗേജുകള്‍ മംഗലൂരിൽ നിര്‍ത്തിയിട്ട ട്രെയിനില്‍ നിന്നും കണ്ടെത്തുകയും ചെയ്തു. ഇയാൾക്കായി പൊലിസ് പരിശോധന നടത്തി വരുന്നതിനിടെയാണ് മൃതദേഹം പഴയങ്ങാടി പുഴയില്‍ നിന്നും കണ്ടെത്തിയത്.മൃതദേഹം പരിയാരത്തെ കണ്ണൂര്‍ ഗവ. മെഡിക്കല്‍ കോളേജില്‍ പോസ്റ്റുമോര്‍ട്ടം നടത്തിയതിന് ശേഷം ഇന്ന് കബറടക്കും. ഏറെ ക്കാലമായി വിദേശത്തു ജോലി ചെയ്തു വരികയായിരുന്നു അബ്ദുല്‍ ഹമീദ്. പെരുമാച്ചേരി കൊട്ടപ്പൊയില്‍ സ്വദേശിനി റാബിയ്യയാണ് ഭാര്യ. റസല്‍, റയ, സബ,സൈബ എന്നിവരാണ് മക്കള്‍.

മാനന്തവാടി: അറ്റകുറ്റപണികൾക്കായി അടച്ചിട്ട പാൽച്ചുരം റോഡ് തിങ്കളാഴ്ച മുതൽ ഭാഗികമായി ഗതാഗതത്തിന് തുറന്നു കൊടുക്കും.ചെറുവാഹനങ്ങളും ബസും പാതയിലൂടെ കടത്തിവിടുമെങ്കിലും ചരക്ക് വാഹനങ്ങൾക്ക് അനുമതിയില്ല.കഴിഞ്ഞ മാസം 26ാം തീയതി മുതലാണ് അറ്റകുറ്റപണികൾക്കായി പാൽച്ചുരം പാത അടച്ചത്. 69.10 ലക്ഷം രൂപയാണ് പാതയുടെ അറ്റകുറ്റപണികൾക്കായി സർക്കാർ അനുവദിച്ചത്.ഈ തുക ഉപയോഗിച്ചാണ് രണ്ട് പ്രളയത്തോടെ പൊട്ടിപ്പൊളിഞ്ഞ് കുണ്ടുംകുഴിയുമായ പാൽച്ചുരം റോഡ് താൽക്കാലികമായി നന്നാക്കിയത്. നിലവിലെ അറ്റകുറ്റപണികൾ അന്തിമ ഘട്ടത്തിലാണ്. പാൽച്ചുരം അടച്ചതിനു ശേഷം പേര്യ ചുരം വഴിയാണ് വാഹനങ്ങൾ കണ്ണൂർ ഭാഗത്തേക്കും തിരിച്ചും ഓടിയിരുന്നത്. പണി പൂർണമായും പൂർത്തിയാകുന്ന മുറയ്ക്ക് മാത്രമേ ചരക്ക് വാഹനങ്ങൾക്ക് പാൽച്ചുരത്തിലൂടെ ഓടാൻ അനുമതി നൽകുകയുള്ളൂ.