മലപ്പുറം:പൗരത്വ നിയമ ഭേദഗതിക്കെതിരായ നിലപാടിൽ ഉറച്ച് രാഹുൽ ഈശ്വർ. അയ്യപ്പ ധർമസേനയിൽ നിന്ന് പുറത്താക്കിയാലും അയ്യപ്പ – വാവർ വിശ്വാസത്തിന്റെ അടിസ്ഥാനത്തിലെടുത്ത നിലപാട് പിൻവലിക്കില്ലെന്ന് രാഹുൽ ഈശ്വർ വ്യക്തമാക്കി.മലപ്പുറം ചങ്ങരംകുളത്ത് പൌരത്വ നിയമത്തിനിരായ 24 മണിക്കൂർ നിരാഹാര സമരം ഉൽഘാടനം ചെയ്തുകൊണ്ടാണ് രാഹുൽ ഇക്കാര്യം വ്യക്തമാക്കിയത്.അയ്യപ്പ ധർമ്മ സേനയുടെ ഉത്തര മേഖല സെക്രട്ടറി സുനിൽ വളയംകുളത്തിൻറെയും സഹപ്രവർത്തകരുടെയും നേതൃത്വത്തിലാണ്‌ പൗരത്വ നിയമ ഭേദഗതിക്കെതിരെ മലപ്പുറം ചങ്ങരംകുളത്ത് 24 മണിക്കൂർ നിരാഹാര സമരം സംഘടിപ്പിച്ചത്. പാക്കിസ്ഥാനി ഹിന്ദുവിനെക്കാൾ പ്രാധാന്യം ഇന്ത്യൻ മുസ്‍ലിമിനാണെന്ന നിലപാട് ആവർത്തിച്ച രാഹുൽ ഈശ്വർ, തന്റെ നിലപാടിനെ തുടർന്നുണ്ടായ വിമർശനങ്ങൾ വകവെക്കാതെയാണ് പരിപാടിക്കെത്തിയത്.
പൌരത്വ നിയമഭേദഗതിക്കെതിരെ നിലപാട് എടുത്തതിന് കഴിഞ്ഞ രാഹുല്‍ ഈശ്വറിനെ അയ്യപ്പ ധര്‍മ സേന ഭാരവാഹിത്വത്തില്‍ നിന്ന് സസ്പെന്ഡ് ചെയ്തിരുന്നു.സ്വാമി ഹരിനാരായണന്റെ അധ്യക്ഷതയില്‍ ചേര്‍ന്ന യോഗത്തിലാണ് നടപടി.അയ്യപ്പ ധര്‍മസേനയുടെ അധ്യക്ഷനാണ് രാഹുല്‍ ഈശ്വര്‍.പൌരത്വ നിയമത്തിനെതിരെ മലപ്പുറത്ത് നിരാഹാര സമരം നടത്തുമെന്ന് പ്രഖ്യാപിച്ചതിന് പിന്നാലെയാണ് രാഹുലിനെ സസ്പെന്ഡ് ചെയ്തുകൊണ്ടുള്ള തീരുമാനം വന്നത്. പൗരത്വ ഭേദഗതി നിയമം മുസ്‌ലിം സമൂഹത്തിന് ആശങ്ക ഉണ്ടാക്കിയിട്ടുണ്ടെന്നും പാകിസ്താനിലെ ഹിന്ദുവിനെ സഹായിക്കേണ്ടത് ഇവിടുത്തെ മുസ്‌ലിമിനെ വേദനിപ്പിച്ചു കൊണ്ടല്ലെന്നും രാഹുല്‍ ഈശ്വര്‍ കഴിഞ്ഞ ദിവസം പറഞ്ഞിരുന്നു.പൗരത്വ ഭേദഗതി ബില്ലിന്റെ ഭാഷ മോശം ആണെന്നും നിയമത്തിൽ ഒരു മതങ്ങളുടെയും പേര് പരാമർശിക്കാൻ പാടില്ലായിരുന്നെന്നും പറഞ്ഞ രാഹുല്‍ പൗരത്വ ഭേദഗതി നിയമത്തിലെ ആശങ്കകൾ പരിഹരിക്കണമെന്നാവശ്യപ്പെട്ട് പത്താം തിയ്യതി മലപ്പുറം ചങ്ങരംകുളത്ത് ഏകദിന നിരാഹാര സമരം നടത്തുമെന്നും അറിയിച്ചിരുന്നു. തുടര്‍ന്നാണ് രാഹുല്‍ ഈശ്വറിനെ അയ്യപ്പ ധര്‍മ സേന ഭാരവാഹിത്വത്തില്‍ നിന്ന് സസ്പെന്ഡ് ചെയ്തു കൊണ്ടുള്ള തീരുമാനം വന്നത്.
