ന്യൂഡൽഹി:ഫേസ്ബുക്കും ട്വിറ്ററും ഉൾപ്പെടെയുള്ള സോഷ്യൽ മീഡിയ അക്കൗണ്ടുകൾ ഉപേക്ഷിക്കാനുള്ള അപ്രതീക്ഷിത തീരുമാനവുമായി പ്രധാനമന്ത്രി നരേന്ദ്രമോദി.ഇക്കാര്യത്തില്‍ ഞായറാഴ്ച അന്തിമ തീരുമാനത്തിലെത്തുമെന്നും പ്രധാനമന്ത്രി ട്വിറ്ററില്‍ കുറിച്ചു.ഫെയ്സ്ബുക്ക്, ട്വിറ്റര്‍, ഇന്‍സ്റ്റഗ്രാം, യൂട്യൂബ് എന്നീ സമൂഹമാധ്യമങ്ങള്‍ ഒഴിവാക്കുന്ന കാര്യം ആലോചിക്കുന്നതായി പ്രധാനമന്ത്രി തന്നെയാണ് അറിയിച്ചത്.സമൂഹമാധ്യമങ്ങള്‍ വളരെ സജീവമായി ഉപയോഗിക്കുന്ന ലോക നേതാക്കളിലൊരാളാണ് പ്രധാനമന്ത്രി നരേന്ദ്ര മോദി. സുപ്രധാനമായ പല പ്രഖ്യാപനങ്ങളും തീരുമാനങ്ങളും തന്റെ സോഷ്യല്‍ മീഡിയ പ്ലാറ്റ്ഫോമുകളിലൂടെ ജനങ്ങളിലേക്കെത്തിച്ച പ്രധാനമന്ത്രിയുടെ പുതിയ തീരുമാനത്തിന് പല വ്യാഖ്യാനങ്ങളും സമൂഹത്തിന്റെ വിവിധ കോണുകളില്‍ നിന്ന് ഉയര്‍ന്ന് വരുന്നുണ്ട്.ട്വിറ്ററില്‍ മാത്രം അഞ്ച് കോടിയിലധികം ഫോളോവേഴ്സുള്ള ട്വിറ്റര്‍ ഹാന്‍ഡിലാണ് നരേന്ദ്ര മോദിയുടേത്. ഫെയ്സ്ബുക്കില്‍ നരേന്ദ്ര മോദിയെന്ന പേജ് ലൈക്ക് ചെയ്തിരിക്കുന്നത് നാല് കോടിയിലധികം ആളുകളാണ്. ഇന്‍സ്റ്റഗ്രാമില്‍ പ്രധാനമന്ത്രിയെ പിന്തുടരുന്നവരുടെ എണ്ണം മൂന്ന് കോടിയിലധികം വരും.പ്രതിപക്ഷത്തിനെ കടന്നാക്രമിക്കാനും രാജ്യത്തുണ്ടായ പല വിവാദങ്ങളിലും വിശദീകരണം നല്‍കാനും സോഷ്യല്‍ മീഡിയ പ്ലാറ്റ്ഫോം മികച്ച രീതിയില്‍ ഉപയോഗിച്ച നേതാവാണ് മോദി.യോഗ ചലഞ്ച് ഉള്‍പ്പടെ വിവിധ ക്യാമ്ബയിനുകള്‍ക്കും പ്രധാനമന്ത്രി തുടക്കം കുറിച്ചത് സമൂഹമാധ്യമങ്ങളിലൂടെയായിരുന്നു.
