Full Grid

കോട്ടയം:കേരളത്തിൽ ഇപ്പോൾ ലഭിക്കുന്നത് എത്തനോൾ ചേർത്ത പെട്രോളാണ്.കേന്ദ്ര സർക്കാരിന്റെ പ്രകൃതി സൗഹൃദ ഇന്ധന സംരംഭത്തിന്റെ ഭാഗമായാണ് 10 ശതമാനം എത്തനോൾ ചേർത്ത പെട്രോൾ കേരളത്തിൽ ലഭ്യമാക്കിയിരിക്കുന്നത്.എന്നാൽ ഇത്തരത്തിൽ എത്തനോൾചേർത്ത ഇന്ധനം ഉപയോഗിക്കുന്നതിനെ തുടർന്നുണ്ടായിരിക്കുന്ന ചില പ്രശ്നങ്ങൾ പൊതുജനത്തിന്റെ ശ്രദ്ധയിൽപ്പെടുത്തുകയാണ് കേരളത്തിലെ പെട്രോൾ പമ്പ് ഉടമകൾ. ഇന്ത്യയിലെ പഞ്ചസാര നിർമാണത്തിന്റെ ഏറ്റവും വലിയ ഉപോല്പന്നമാണ് ജൈവഇന്ധനം എന്നറിയപ്പെടുന്ന എത്തനോൾ.ഇവ ഇന്ധനത്തിൽ ചേർക്കാനായാൽ ക്രൂഡോയിൽ ഇറക്കുമതി ഉൾപ്പെടെ കുറയ്ക്കാനാകും.എന്നാൽ എത്തനോൾ ചേർത്ത പെട്രോൾ ഉപയോഗിക്കുമ്പോൾ വെള്ളം വില്ലനാവുകയാണ്. വെള്ളത്തിന്റെ ചെറിയ അംശം പോലും എത്തനോളുമായി കലരും.അതായത് അന്തരീക്ഷത്തിലെ ഈർപ്പത്തിൽ നിന്ന് പോലും പമ്പിലെ ടാങ്കിലുള്ള ഇന്ധനത്തിൽ ജലാംശം എത്തിച്ചേരാം. പെട്രോളിൽ ജലാംശം കലർന്നാൽ പ്രത്യേക പാളിയായി ടാങ്കിന്റെ അടിയിൽ അടിയും.അതുകൊണ്ടുതന്നെ എൻജിനിൽ വെള്ളം എത്തില്ല.എന്നാൽ എത്തനോൾ കലർത്തുന്നതോടെ പെട്രോളിന്റെ ജലത്തെ ലയിപ്പിക്കാനുള്ള ശേഷി കൂടുകയും വെള്ളം പെട്രോളിനൊപ്പം കലർന്ന് എൻജിനിൽ എത്തുകയും ഇതുമൂലം വാഹങ്ങൾക്ക് കേടുപാടുകൾ സംഭവിക്കുന്നു.

പമ്പ് ഉടമകൾ വിചാരിച്ചാൽ മാറ്റാവുന്ന പ്രശ്നമല്ല ഇത്.ഇതൊഴിവാക്കാൻ പെട്രോളിയം കമ്പനികൾ ടാങ്കുകളിലെ ജലാംശം പരിശോധിച്ച് വേണ്ട നടപടികൾ സ്വീകരിക്കണം.പമ്പിലെ ടാങ്കുകളോ മറ്റു സംവിധാനങ്ങളോ നന്നാക്കാനോ പരിശോധിക്കാനോ ഉള്ള അനുവാദം പമ്പ് ഉടമകൾക്കില്ല.ടാങ്ക് അടക്കം എല്ലാം പെട്രോളിയം കമ്പനിയുടേതാണ്.ഓരോ ലോഡ് ഇന്ധനവും വരുമ്പോൾ അതിന്റെ വിലയുടെ കൂടെ ടാങ്ക് ശുചിയാക്കാനുള്ള മെയ്ന്റനൻസ് ചാർജ് കൂടി കമ്പനികൾ ഈടാക്കുന്നുണ്ട്.അതിനാൽ പെട്രോൾ ടാങ്കിൽ ഒരംശം പോലും ജലാംശം ഇല്ല എന്ന് കമ്പനികളാണ് ഉറപ്പാക്കേണ്ടത്.പക്ഷെ കേരളത്തിൽ ഇതുവരെ ഇതിനുള്ള ഒരു സജ്ജീകരണവും ഏർപ്പെടുത്തിയിട്ടില്ല.വർഷത്തിൽ ആറുമാസത്തോളം മഴ ലഭിക്കുന്ന സംസ്ഥാനത്ത് പെട്രോൾ പമ്പുകളിലെ ഭൂഗർഭ ടാങ്കുകളിൽ പോലും വെള്ളം കയറാനുള്ള സാധ്യത തള്ളിക്കളയാനാകില്ല എന്നും പമ്പുടമകൾ പറയുന്നു.

കേരളത്തിലെ കാലാവസ്ഥയിൽ നിലവിലെ സംവിധാനത്തിൽ ഇത്തരത്തിൽ എത്തനോൾ ചേർന്ന ഇന്ധനം എത്തുന്നത് വാഹന ഉടമകൾക്ക് വലിയ നഷ്ട്ടം ഉണ്ടാക്കും.പമ്പുകളിലെ ഭൂഗർഭ ടാങ്കുകളിൽ നിലവിലുള്ള ജലാംശം ഇല്ലാതാക്കുന്ന നടപടികൾ പൂർത്തിയാക്കുന്നതിനു മുൻപ് ഓയിൽ കമ്പനികൾ എത്തനോൾ ബ്ലെൻഡഡ്‌ ഇന്ധനത്തിന്റെ വിതരണം ആരംഭിച്ചതാണ് നിലവിൽ ഗുരുതര പ്രശ്നങ്ങൾക്ക് വഴിവെച്ചിരിക്കുന്നത്.ഓയിൽ കമ്പനികൾ പമ്പുകളിൽ കൃത്യമായ പരിശോധന നടത്തി ടാങ്കുകൾ പൂർണ്ണമായും ജലമുക്തമാക്കാനുള്ള നടപടികൾ എടുക്കുകയും ഇത്തരത്തിൽ ജലമുക്തമാണെന്നുള്ള സർട്ടിഫിക്കറ്റ് പുറപ്പെടുവിക്കുകയും ചെയ്യണം.അതുപോലെ മറ്റൊരു പ്രധാന കാര്യമാണ് പമ്പുകളിലേക്ക് ഇന്ധനമെത്തിക്കുന്ന ടാങ്കർ ലോറികളുടെ കാര്യവും.ഇത്തരം ലോറികൾ കാലിബ്രേറ്റ് ചെയ്യുന്നത് വെള്ളം നിറച്ചാണ്.ഈ ടാങ്കറുകളിൽ ജലസാന്നിധ്യം ഒഴിവാക്കാനുള്ള സംവിധാനവും ഓയിൽ കമ്പനികൾ ഒരുക്കിയിട്ടില്ല.മഴക്കാലത്ത് ഇത്തരം ടാങ്കറുകളിൽ ഇന്ധനമെത്തിക്കുമ്പോൾ വെള്ളം കേറാനുള്ള സാധ്യതയുമുണ്ട്.ടാങ്കറുകളിൽ ജലാംശം ഉണ്ടാവാതിരിക്കാനുള്ള സാധ്യത പൂർണ്ണമായും ഒഴിവാക്കിയിട്ട് വേണം കമ്പനികൾ എത്തനോൾ അടങ്ങിയ പെട്രോൾ പമ്പുകളിലേക്ക് എത്തിക്കേണ്ടത്.

ഇക്കാര്യങ്ങളെ കുറിച്ച് പൊതുജനങ്ങൾക്ക് അറിവുനൽകാനായി ഓയിൽ കമ്പനികൾ ബോധവൽക്കരണ പരിപാടികൾ ആസൂത്രണം ചെയ്യണം.ലഭ്യമായ എല്ലാ മാധ്യമങ്ങളും അതിനായി കമ്പനികൾ സ്വീകരിക്കണം.പൊതുസമൂഹത്തിന്റെ പ്രതിനിധികൾ,പമ്പുടമകൾ എന്നിവരുടെ പങ്കാളിത്തം ഇതിൽ ഉറപ്പുവരുത്തുകയും വേണമെന്നും പമ്പുടമകൾ ആവശ്യപ്പെടുന്നു.അസംസ്‌കൃത എണ്ണയുടെ ഇറക്കുമതിയും മലിനീകരണവും കുറയ്ക്കാൻ 2025 ഓടെ പെട്രോളിൽ 25 ശതമാനം എത്തനോൾ ചേർത്ത് വിതരണം ചെയ്യാനുള്ള നടപടികൾ ഊർജമന്ത്രാലയം തുടങ്ങിക്കഴിഞ്ഞു.എഥനോൾ കലർത്തിയ പെട്രോൾ വ്യാപകമാക്കുന്നതിന്റെ ഭാഗമായി രാജ്യത്തെ ആദ്യത്തെ എത്തനോൾ ബയോ റിഫൈനറി ഹിന്ദുസ്ഥാൻ പെട്രോളിയം കോർപറേഷൻ പഞ്ചാബിലെ ഭട്ടിണ്ടയിൽ സ്ഥാപിക്കുകയാണ്.എച്ച് പി സി എൽ ഉൾപ്പെടെ മറ്റ് പൊതുമേഖലാ എണ്ണക്കമ്പനികൾ 11 സംസ്ഥാനങ്ങളിൽ 12 എത്തനോൾ ബയോ റിഫൈനറികൾ സ്ഥാപിക്കാൻ പദ്ധതികൾ തയ്യാറാക്കിയിട്ടുണ്ട്.10000 കോടി രൂപയാണ് ഇതിന്റെ മുതൽമുടക്ക്.പെട്രോളിയം കമ്പനികൾ ഇത്തരത്തിൽ ലാഭമുണ്ടാക്കുമ്പോൾ വാഹന ഉടമകൾക്ക് മെയിന്റനൻസ് കോസ്റ്റ് അടക്കം കൂടുകയാണ്.

ഇക്കാര്യത്തിൽ കേന്ദ്രസംസ്ഥാന സർക്കാരുകൾ വേണ്ട നടപടികൾ സ്വീകരിക്കണമെന്നാണ് പമ്പുടമകളുടെ ആവശ്യം.ക്രൂഡോയിലുമായി താരതമ്യം ചെയ്യുമ്പോൾ എത്തനോളിന്റെ വില തുച്ഛമായതിനാൽ 10 ശതമാനം എഥനോൾ ചേർക്കുമ്പോൾ പോലും കമ്പനികൾക്ക് വലിയ ലാഭമാണുണ്ടാകുന്നത്.എന്നാൽ റീറ്റെയ്ൽ സെല്ലിങ് പ്രൈസിൽ ഇത് പ്രതിഫലിക്കുന്നില്ല. എത്തനോൾ ബ്ലെൻഡഡ്‌ ഫ്യൂവലിന്റെ ദോഷഫലങ്ങൾ മാത്രം ഉപഭോക്താവിന് ലഭിക്കുന്നു എന്നത് മാത്രമാണ് ഈ പരിഷ്‌ക്കാരം കൊണ്ടുണ്ടാകുന്ന ഏക ഫലമെന്നും പമ്പുടമകൾ പറയുന്നു.

പാലക്കാട്:വാളയാർ കേസിൽ പ്രതിഷേധം ശക്തമാക്കാനൊരുങ്ങി മരണപ്പെട്ട പെൺകുട്ടികളുടെ അമ്മ.തല മുണ്ഡനം ചെയ്ത് കേരള യാത്ര നടത്താനാണ് തീരുമാനം. തെരെഞ്ഞടുപ്പ് വിജ്ഞാപനത്തിന് മുന്‍പ് ഡിവൈഎസ്പി സോജനും എസ് ഐ ചാക്കോയ്ക്കുമെതിരെ നടപടി വേണമെന്ന് ആവശ്യപ്പെട്ട് പെണ്‍കുട്ടികളുടെ അമ്മ അപേക്ഷ നല്‍കിയിട്ടുണ്ട്. കുറച്ചു ദിവസം കൂടി നോക്കും. നടപടിയെടുത്തില്ലെങ്കില്‍ നേരിട്ട് ജനങ്ങളിലേയ്ക്ക് ഇറങ്ങാനാണ് തീരുമാനം.സ്ത്രീകള്‍ക്ക് പ്രധാനം തലയിലെ മുടിയാണ്. അത് എടുത്തുകൊണ്ട് ജനങ്ങള്‍ക്കിടയിലേക്ക് ഇറങ്ങും. തന്റെ സങ്കടം ജനങ്ങള്‍ ഏറ്റെടുക്കും. കേസ് അട്ടിമറിച്ച ഉദ്യോഗസ്ഥര്‍ക്കെതിരെ കര്‍ശനമായ നടപടി സ്വീകരിക്കണം. തന്റെ മക്കളെ കുറിച്ച്‌ മോശമായി സംസാരിച്ച സോജനെ സര്‍വീസില്‍ നിന്ന് പുറത്താക്കണം. കേരള യാത്ര നടത്തി സര്‍കാരിനെ പ്രതിഷേധം അറിയിക്കുമെന്നും പെണ്‍കുട്ടികളുടെ അമ്മ വ്യക്തമാക്കി. അതേസമയം അന്വേഷണ സംഘം പെണ്‍കുട്ടികളുടെ വീട് സന്ദര്‍ശിച്ചിരുന്നു. അട്ടപ്പളളത്തെ സംഭവസ്ഥലം നിശാന്തിനി ഐ പി എസ്സിന്‍റെ നേതൃത്വത്തിലുളള സംഘമാണ് സന്ദര്‍ശിച്ചത്. പാലക്കാട് പോക്സോ കോടതി തുടരന്വേഷണത്തിന് അനുമതി നല്‍കിയതിനെ തുടര്‍ന്നാണ് സിബിഐ അന്വേഷണം ആരംഭിച്ചത്.

കണ്ണൂര്‍:കണ്ണൂരില്‍ ട്രാന്‍സ്ജെന്‍ഡര്‍ യുവതിയെ തീകൊളുത്തി മരിച്ച നിലയില്‍ കണ്ടെത്തി. തോട്ടട സമാജ് വാദി കോളനിയിലെ സ്‌നേഹയാണ് മരിച്ചത്. ഇന്നലെ വൈകിട്ടാണ് സംഭവം നടന്നത്. ദേഹത്ത് മണ്ണെണ്ണ ഒഴിച്ച്‌ തീകൊളുത്തുകയായിരുന്നു.സ്നേഹയെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.ആത്മഹത്യയെന്നാണ് പൊലീസിന്റെ പ്രാഥമിക നിഗമനം.കുടുംബ പ്രശ്നങ്ങളാണ് ആത്മഹത്യയിലേക്ക് നയിച്ചതെന്നാണ് സൂചന.കണ്ണൂര്‍ കോര്‍പ്പനിലെ 36-ാം ഡിവിഷനില്‍ നിന്ന് കഴിഞ്ഞ തദ്ദേശ തെരഞ്ഞെടുപ്പില്‍ സ്വതന്ത്ര സ്ഥാനാര്‍ത്ഥിയായി സ്‌നേഹ മത്സരിച്ചിരുന്നു.

മലപ്പുറം: മങ്കട വേരുംപിലാക്കലില്‍ സ്വകാര്യ ബസും ഗുഡ്സ് ഓട്ടോയും കൂട്ടിയിടിച്ച്‌ മൂന്നുപേര്‍ മരിച്ചു. ഗുഡ്സ് ഓട്ടോയില്‍ സഞ്ചരിച്ചവരാണ് മരിച്ചത്. കോഴിക്കോട്-പാലക്കാട് ദേശീയപാതയില്‍ ചൊവ്വാഴ്ച വൈകിട്ടോടെയാണ് അപകടമുണ്ടായത്.പെരിന്തല്‍മണ്ണ ഭാഗത്തേക്ക് പോവുകയായിരുന്ന സ്വകാര്യബസും ചെടികളുമായി വരികയായിരുന്ന ഗുഡ്സ് ഓട്ടോയും നേര്‍ക്കുനേര്‍ കൂട്ടിയിടിക്കുകയായിരുന്നു.ഗുഡ്സ് ഓട്ടോ ബസിനടിയിലേക്ക് ഇടിച്ചുകയറുകയായിരുന്നുവെന്ന് സംഭവം കണ്ട സ്ഥലവാസികള്‍ അറിയിച്ചു. ഏറെ നേരത്തെ ശ്രമത്തിനൊടുവിലാണ് ബസിനടിയില്‍ നിന്നും ഓട്ടോ പുറത്തെത്തിക്കാനായത്. അപകടത്തില്‍ ബസിലെ യാത്രക്കാര്‍ക്ക് പരിക്കേറ്റു. ഇതില്‍ രണ്ടുപേരുടെ പരിക്ക് ഗുരുതരമാണ്. ഓട്ടോയില്‍ ഡ്രൈവര്‍ ക്യാബിനില്‍ വാഹനമോടിച്ചയാള്‍ക്കു പുറമേ രണ്ടുപേര്‍ കൂടിയുണ്ടായിരുന്നു. കോഴിക്കോട് മുക്കം അഗസ്ത്യമൂഴി സ്വദേശി എന്‍.സിജു ആണ് മരണമടഞ്ഞതില്‍ ഒരാളെന്ന് തിരിച്ചറിഞ്ഞിട്ടുണ്ട്. മറ്റ് രണ്ടുപേരെയും തിരിച്ചറിഞ്ഞിട്ടില്ല.