തിരുവനന്തപുരം: കൊറോണ വ്യാപനത്തിന്റെ പശ്ചാത്തലത്തിൽ നിയന്ത്രണങ്ങൾ കടുപ്പിക്കാനൊരുങ്ങി കേരളം.നിയന്ത്രണങ്ങൾ ശക്തമാക്കുന്നതിന്റെ ഭാഗമായി ചീഫ് സെക്രട്ടറി ഇന്ന് ഉന്നത പോലീസ് ഉദ്യോഗസ്ഥരുടെ യോഗം വിളിച്ചിട്ടുണ്ട്. നിയന്ത്രണങ്ങൾ സംബന്ധിച്ച വിലയിരുത്തൽ നടത്താൻ ആരോഗ്യവകുപ്പിനും നിർദ്ദേശം നൽകി.പോലീസിന്റെ ഭാഗത്തു നിന്നും കൂടുതൽ നടപടികൾ ഇല്ലാത്ത പക്ഷം കാര്യങ്ങൾ കൈവിട്ടു പോകുമെന്നാണ് ആരോഗ്യ വകുപ്പിന്റെ മുന്നറിയിപ്പ്. നിരത്തുകളിൽ പോലീസിന്റെ പരിശോധന ഉണ്ടെങ്കിലും കാര്യക്ഷമമല്ല. മറ്റാരെക്കാളും രോഗം നിയന്ത്രിക്കാൻ പോലീസിന്റെ ശക്തമായ ഇടപെടൽ ഉണ്ടാകണമെന്നാണ് ആരോഗ്യ വകുപ്പിന്റെ ആവശ്യം. ഇത് പരിഗണിച്ചാണ് ഇന്ന് ഉന്നത പോലീസ് ഉദ്യോഗസ്ഥരുടെ യോഗം ചീഫ് സെക്രട്ടറി വിളിച്ചിരിക്കുന്നത്.കോറോണ നിയന്ത്രണങ്ങളുടെ ഭാഗമായി നിലവിൽ അയ്യായിരത്തോളം പോലീസുകാരെയാണ് സംസ്ഥാനത്തെ വിവിധ ഭാഗങ്ങളിലെ നിരത്തുകളിൽ മാത്രം വിന്യസിച്ചിരിക്കുന്നത്. പ്രതിരോധ പ്രവർത്തനങ്ങൾക്ക് കൂടുതൽ പൊലീസിനെ വിന്യസിക്കുന്ന പക്ഷം ദൈനംദിന പ്രവർത്തനങ്ങൾ അവതാളത്തിലാകും എന്നാണ് പോലീസിന്റെ പരാതി. അതേസമയം ഏതൊക്കെ മേഖലകളിൽ ഏതെല്ലാം വിധത്തിൽ നിയന്ത്രണങ്ങൾ കൊണ്ടുവരണമെന്ന് എന്ന് പഠിച്ചു റിപ്പോർട്ട് നൽകാൻ ആരോഗ്യവകുപ്പിനെ സർക്കാർ ചുമതലപ്പെടുത്തിയിട്ടുണ്ട്. കോറോണയുടെ രണ്ടാം വരവ് മുൻപത്തെക്കാളും ആഘാതം വർധിപ്പിക്കുമെന്നാണ് ആരോഗ്യ വകുപ്പിന്റെ വിലയിരുത്തൽ. അതിനാൽ തന്നെ നിലവിലെ നിയന്ത്രണങ്ങൾ രോഗപ്രതിരോധത്തിന് പര്യാപ്തമല്ലെന്നാണ് കണക്ക് കൂട്ടൽ.അതിനാൽ തന്നെ വരും ദിവസങ്ങളിൽ വിവിധ മേഖലകളിൽ നിയന്ത്രണം ശക്തമാകാനാണ് സാധ്യത.
