Full Grid

കണ്ണൂർ : സമയത്തർക്കവുമായി ബന്ധപ്പെട്ട് ആർ ടി ഒയെ ഉപരോധിച്ച സംഭവത്തിലും ആർ ടി ഓഫീസിൽ ബഹളം വെച്ച്‌ കൃത്യനിർവഹണം തടസപ്പെടുത്തിയതിനും ബസുടമകൾക്കെതിരെ പോലീസ് കേസെടുത്തു. ആർ ടി ഓ കെ എം ഉമ്മറിന്റെ  പരാതിയിലാണ് കണ്ടാലറിയാവുന്ന അൻപതോളം ബസുടമകൾക്കെതിരെ ടൗൺ പോലീസ് കേസ് എടുത്തത്. സമയ നിർണയ പ്രശ്നവുമായി ബന്ധപ്പെട്ട് ഓഫീസിലെത്തിയ ബസുടമകൾ തന്റെ കൃത്യനിർവഹണം തടസ്സപ്പെടുത്തുകയും ബഹളമുണ്ടാക്കുകയും ചെയ്തു എന്നാണ് ആർ ടി ഓ പോലീസിൽ നൽകിയ പരാതിയിൽ പറയുന്നത്.

ഒരേ റൂട്ടിൽ ഒന്നിലധികം ബസുകൾക്ക് ഒന്നും രണ്ടും  മിനിറ്റുകളുടെ വ്യത്യാസത്തിൽ താത്കാലിക പെര്മിറ്റു നൽകുകയും ഒരു ബസിനു സ്ഥിരം പെര്മിറ്റു നല്കിയതുമാണ് യോഗത്തിനെത്തിയ ബസുടമകൾ ചോദ്യം ചെയ്തത്.

എന്നാൽ ആർ ടി ഓഫീസിലെ ജീവനക്കാർ കൈയേറ്റം ചെയ്തെന്നാരോപിച്ച് നൽകിയ പരാതിയിൽ ടൗൺ പോലീസ് കേസെടുക്കാത്തതിൽ ബസുടമകൾ പ്രതിഷേധം അറിയിച്ചു. ഇതുമായി ബന്ധപ്പെട്ട് ആർ ടി ഓഫീസിലേക്ക് ഈ മാസം 21  നു മാർച്ച് നടത്താനുള്ള തീരുമാനത്തിലാണ് ബസ് ഓപ്പറേറ്റേഴ്‌സ് അസോസിയേഷൻ.

തലശ്ശേരി : ദേശീയപാതയില്‍ തലായിയില്‍ ദളിത് യുവാക്കളെ ഉടുമുണ്ടഴിച്ച് മര്‍ദിച്ച സംഭവത്തില്‍ രണ്ട് ആര്‍എസ്എസ് പ്രവര്‍ത്തകര്‍ റിമാന്‍ഡില്‍. ഇനുവരി 19ന് ഉച്ഛയ്ക്കായിരുന്നു കേസിനാസ്പദമായ സംഭവം. ബൈക്കില്‍ ചുവപ്പ് മുണ്ടുടുത്ത് യാത്ര ചെയ്യുകയായിരുന്നു ഡിവൈഎഫ്‌ഐ പ്രവര്‍ത്തകരെ മര്‍ദ്ദിച്ച് ഉടുമുണ്ടഴിച്ച് റോഡിലൂടെ നടത്തിയെന്നാണ് പരാതി.

മാഹിയിലെബന്ധുവീട്ടിലേക്ക് പോകുന്നവഴി 30 ഓളം വരുന്ന ആര്‍എസ്എസ് പ്രവര്‍ത്തകര്‍ തങ്ങളെ ബൈക്കില്‍ നിന്ന് വലിച്ചിട്ട് മര്‍ദ്ദിക്കുകയായിരുന്നുവെന്നും പരാതിയില്‍ പറയുന്നുണ്ട്. ഉടുമുണ്ടു പറിച്ച് തൊട്ടടുത്തുള്ള കെട്ടിടത്തിന്റെ മുകളിലേക്ക് എറിയുകയും ചെയ്തു. ജാതിപ്പേര് വിളിച്ച് അധിക്ഷേപിച്ചതായും പരാതിയില്‍ വ്യക്തമാക്കിയിരുന്നു.

ടെമ്പിള്‍ഗേറ്റ് അടിയേരി ഹൗസില്‍ എ. ശ്രീഷ് (36), നങ്ങാറത്ത്പീടിക ശിവദത്തില്‍ ടി.കെ. വികാസ് (37) എന്നിവരേയാണ് തലശേരി ജുഡീഷല്‍ ഫസ്റ്റ് ക്ലാസ് മജിസ്‌ട്രേട്ട് കോടതി റിമാന്‍ഡ് ചെയ്തത്. ദളിത് പീഡനം ഉള്‍പ്പെടെയുള്ള വകുപ്പുകള്‍ ചുമത്തി 10 ആര്‍എസ്എസ്-ബിജെപിക്കാര്‍ക്കെതിരെയാണ് പോലീസ് കേസെടുത്തത്.

കുട്ടിമാക്കൂലിലെ പ്രിന്‍സ്, വിപിനേഷ് എന്നിവരെയാണ് ആര്‍എസ്എസ് പ്രവര്‍ത്തകര്‍ ചേര്‍ന്ന് മര്‍ദ്ദിച്ചത്. ഇത് വീഡിയോയില്‍ പകര്‍ത്തി സമൂഹ മാധ്യമങ്ങളില്‍ പ്രചരിപ്പിച്ചതോടെയാണ് ദളിത് മര്‍ദ്ദനത്തെക്കുറിച്ച് പുറംലോകം അറിയുന്നത്.

തിരുവന്തപുരം: മുഖ്യമന്ത്രി പിണറായി വിജയൻറെ ലാളിത്യത്തെ പുകഴ്ത്തി നടി ലക്ഷ്മി ഗോപാലസ്വാമി. ഒട്ടും തലക്കനമില്ലാത്ത ലാളിത്യമുള്ള മുഖ്യമന്ത്രിയാണ് പിണറായി വിജയനെന്ന് ലക്ഷ്മി ഗോപാലസ്വാമി പറഞ്ഞു. ഫേസ് ബുക്കിലാണ് ലക്ഷ്മി ഗോപാലസ്വാമിയുടെ പ്രതികരണം. മുഖ്യമന്ത്രിയ്‌ക്കൊപ്പം വിമാനത്തിലിരിക്കുന്ന ഫോട്ടോ സഹിതം ഫേസ്ബുക്കിൽ പോസ്റ്റ് ചെയ്തുകൊണ്ടാണ് ലക്ഷ്മിയുടെ അഭിപ്രായ പ്രകടനം. ബഹ്റൈനിലേക്കുള്ള യാത്രയിലാണ് ലക്ഷ്മി ഗോപാലസ്വാമി മുഖ്യമന്ത്രിയെ വിമാനത്തിൽ കണ്ടു മുട്ടിയത്.

ബഹ്‌റൈൻ കേരളീയ സമാജത്തിന്റെ വാർഷികാഘോഷം ഉദ്‌ഘാടനം ചെയുന്നതിനാണ് മുഖ്യമന്ത്രി പിണറായി ബഹറിനിൽ എത്തിയിട്ടുള്ളത്  ഇതേ പരിപാടിയിൽ നൃത്തം അവതരിപ്പിക്കുന്നതിനാണ് ലക്ഷ്മി യാത്രയായത്. സൂര്യ കൃഷ്ണമൂർത്തി  സംവിധാനം ചെയുന്ന നൃത്തശില്പമായ ഗണേശത്തിൽ ലക്ഷ്മി ഗോപാലസ്വാമിയാണ് നൃത്തം അവതരിപ്പിക്കുന്നത്.