ഉത്തർപ്രദേശ്: സ്‌കൂള്‍ വിദ്യാര്‍ത്ഥിനികളുടെ മൊബൈല്‍ ഫോണ്‍ ഉപയോഗം വിലക്കണമെന്ന വിവാദ പ്രസ്താവനയുമായി ഉത്തര്‍പ്രദേശിലെ രണ്ട് ബിജെപി നേതാക്കള്‍. ഭാരാ ദ്വാരിയിലെ ഉദയ് സിങ് ഇന്റര്‍ കോളേജില്‍ നടന്ന പരിപാടിയില്‍ സംസാരിക്കവെ അലിഗഡ് മേയര്‍ ശകുന്തള ഭാരതിയും എംഎല്‍എ സഞ്ജീവ് രാജയുമാണ് ഇക്കാര്യം ആവശ്യപ്പെട്ടത്.അലിഗഡിലെ പെണ്‍കുട്ടികള്‍ വഴിതെറ്റുന്നതിന്റെ പ്രധാന കാരണം മൊബൈല്‍ ഫോണ്‍ ആണെന്ന ‘കണ്ടെത്തലിലാണ്’ ബിജെപി നേതാക്കളുടെ വിലക്ക് ആവശ്യം.
സ്ത്രീകള്‍ക്കായി സൗജന്യ ടോയ്‌ലറ്റുകള്‍
ന്യൂഡൽഹി: വൃത്തിഹീനമായ സാഹചര്യവും സൗകര്യങ്ങളുടെ അപര്യാപ്തതയും മൂലം ഉള്ള പൊതു ടോയിലറ്റുകള്‍ ഉപയോഗിക്കുന്നവരുടെ എണ്ണവും കുറവാണ്. ഇക്കാര്യത്തില്‍ ആര്‍ക്കും മാതൃകയാക്കാവുന്ന പരിഹാരവുമായി രംഗത്തെത്തിയിരിക്കുകയാണ് സൗത്ത് ദില്ലിയിലെ റെസ്റ്റൊറന്റുകള്‍. സൗത്ത് ദില്ലിയിലെ ഹോട്ടലുകളിലെയും റെസ്‌റ്റൊറന്റുകളിലെയും ടോയ്‌ലറ്റുകള്‍ സ്ത്രീകള്‍ക്കും കുട്ടികള്‍ക്കും സൗജന്യമായി ഉപയോഗിക്കാം. ഹോട്ടലുകളില്‍ ഭക്ഷണം കഴിക്കാനെത്തുന്നവര്‍ക്ക് മാത്രമാകില്ല, പുറമെനിന്നെത്തുന്നവര്‍ക്കും ഉപയോഗിക്കാം.
സംസ്ഥാനത്ത് മലേറിയ പടരുന്നു
തിരുവനന്തപുരം: സംസ്ഥാനത്ത് മലേറിയ പടരുന്നു. അസുഖബാധിതരുടെ എണ്ണത്തില്‍ വലിയ വര്‍ധനവ് ഉണ്ടായതായി ആരോഗ്യവകുപ്പിന്റെ കണക്കുകള്‍. ഇതര സംസ്ഥാന തൊഴിലാളികളില്‍ നിന്നുമാണ് രോഗം പടര്‍ന്ന് പിടിക്കുന്നതെന്നാണ് ആരോഗ്യവകുപ്പിന്റെ കണ്ടെത്തല്‍. മാലിന്യ നിര്‍മാര്‍ജനത്തിലെ അപാകതയും സ്വയം ചികിത്സ നടത്തുന്നതുമാണ് അസുഖങ്ങള്‍ വ്യാപിക്കാന്‍ കാരണം.
2011 മുതല്‍ 2016 വരെയുള്ള കണക്കുകള്‍ പരിശോധിച്ചാല്‍ മലേറിയ ബാധിതരുടെ എണ്ണത്തില്‍ വന്‍കുറവാണ് വന്നത്. എന്നാല്‍ ഇത്തവണ മുന്‍ വര്‍ഷത്തെ അപേക്ഷിച്ച് ജനുവരി മുതല്‍ മാര്‍ച്ച് വരെയുള്ള കണക്കുകളില്‍ അസുഖബാധിതരുടെ എണ്ണത്തില്‍ വന്‍ വര്‍വര്‍ദ്ധനവാണ് റിപ്പോര്‍ട്ട് ചെയ്തിട്ടുള്ളത്.
കോഴിക്കോട് ജില്ലയിലാണ് ഏറ്റവും കൂടുതല്‍ 21 എണ്ണം,രണ്ടാം സ്ഥാനത്ത് എറണാകുളമാണ് 20 കേസ്സുകള്‍, തലസ്ഥാന നഗരിയായ തിരുവനന്തപുരത്ത് 13 പേര്‍ക്ക് അസുഖം സ്ഥിരീകരിച്ചു.വേണ്ടരീതിയില്‍ പ്രതിരോധ കുത്തിവെപ്പുകളില്ലാത്തതും രോഗം പിടിപെടുന്ന ആദ്യഘട്ടത്തില്‍ ചികിത്സകള്‍ ലഭിക്കാത്തതുമാണ് രോഗം വര്‍ദ്ധിക്കാന്‍ കാരണമെന്ന് നിഗമനം.
ലോകത്തിലെ ഏറ്റവും പ്രായം കൂടിയ മനുഷ്യൻ അന്തരിച്ചു
ജക്കാർത്ത: ലോകത്തിലെ ഏറ്റവും പ്രായം കൂടിയ മനുഷ്യൻ എന്നറിയപ്പെടുന്ന ഇന്തോനേഷ്യൻ മുത്തച്ഛൻ അന്തരിച്ചു. മധ്യ ജാവയിലെ സ്രാഗനിലുള്ള എംബാ ഗോതോ എന്ന 145 വയസുകാരനാണ് മരിച്ചത്. പത്ത് മക്കളേയും നാല് ഭാര്യമാരേയും ആയുസിൽ മുന്നേറിയാണ് ഗോതോ ജീവിച്ചത്. അവസാന സമയത്ത് പേരക്കുട്ടികളോടു കൂടിയാണ് താമചിരുന്നത് .
ഇന്തോനേഷ്യൻ ഔദ്യോഗിക രേഖ പ്രകാരം 1870 ഡിസംബർ 31 ആണ് ഗോതോയുടെ ജന്മദിനം. 122 വയസ്സ് തികഞ്ഞ 1992ല്‍ ഗോതോയുടെ നിര്‍ദേശ പ്രകാരം ശവക്കല്ലറ ഒരുക്കിയിരുന്നു. എന്നാല്‍ മരണം അനുഗ്രഹിക്കുന്നില്ലെന്നായിരുന്നു ഗോതോയുടെ പരാതി. അവസാന കാലത്ത് കാഴ്ചക്ക് മങ്ങലുണ്ടായിരുന്ന ഗോതോ ടെലിവിഷന്‍ കാണുന്നത് നിര്‍ത്തി മിക്കസമയവും റേഡിയോയാണ് കേട്ടിരുന്നത്. ദീര്‍ഘായുസ്സിന്‍െറ രഹസ്യം ക്ഷമയാണെന്നും ആയിരുന്നു ഗോതോയുടെ അഭിപ്രായം
ടി പി സെൻകുമാറിന്റെ പുനർനിയമനം: ചീഫ് സെക്രട്ടറി നടപടി തുടങ്ങിയെന്ന് മുഖ്യമന്ത്രി
തിരുവനന്തപുരം: ടി പി സെൻകുമാറിന്റെ പുനർനിയമനം നടപ്പാക്കാൻ ചീഫ് സെക്രട്ടറി നടപടി തുടങ്ങിയെന്ന് മുഖ്യമന്ത്രി സഭയിൽ പറഞ്ഞു. സുപ്രീം കോടതി വിധി അന്തിമമാണ്. ഇത് നടപ്പാക്കാൻ സർക്കാർ പ്രതിജ്ഞാബദ്ധരുമാണ്. ഇത് സംബന്ധിച്ച നിയമോപദേശം ലഭിച്ചത് ഇന്നലെയാണെന്നും മുഖ്യമന്ത്രി പറഞ്ഞു.
സെൻകുമാറിന്റെ പുനർ നിയമനം വൈകുന്നതിനെതിരെ പ്രതിപക്ഷം നൽകിയ അടിയന്തര പ്രമേയത്തിന് മറുപടി നൽകുകയായിരുന്നു അദ്ദേഹം. അതെ സമയം വിധി നടപ്പാക്കുന്നതിൽ സർക്കാർ പരാജയപ്പെട്ടെന്ന് പ്രതിപക്ഷം ആരോപിച്ചു.
ഇന്ത്യൻ തിരിച്ചടി; പാക് സൈനിക പോസ്റ്റുകൾ തകർത്തു
ജമ്മു: സൈനികരുടെ മൃതദേഹങ്ങൾ വികൃതമാക്കിയ പാക്കിസ്ഥാൻ സൈന്യത്തിന്റെ ക്രൂരതയ്ക്ക് ഇന്ത്യയുടെ ശക്തമായ തിരിച്ചടി. ഇന്ത്യൻ സൈന്യം നടത്തിയ ആക്രമണത്തിൽ രണ്ട് പാക് സൈനിക പോസ്റ്റുകൾ തകർത്തതായി ദേശീയ മാധ്യമങ്ങൾ റിപ്പോർട്ട് ചെയ്തു.
തിങ്കളാഴ്ച രാത്രിയാണ് ജമ്മുവിലെ കൃഷ്ണഗാട്ടി ഏരിയയിലെ രണ്ടു പോസ്റ്റുകൾ സൈന്യം തകർത്തത്. അതിർത്തി രക്ഷാ സേന നടത്തിയ വെടിവെപ്പിൽ എട്ട് പാക് സൈനികർ കൊല്ലപ്പെട്ടതായും റിപ്പോർട്ട് ഉണ്ട്.
നേരത്തെ നിയന്ത്രണരേഖ ലംഘിച്ച് ഇന്ത്യൻ മേഖലയിലേക്ക് കടന്നുകയറിയ പാകിസ്ഥാൻ ബോഡർ ആക്ഷൻ തീം വെടിവെപ്പ് നടത്തിയിരുന്നു. ഈ വെടിവെപ്പിൽ കൊല്ലപ്പെട്ട രണ്ട് ഇന്ത്യൻ സൈനികരുടെ തലയറുത്തു പാകിസ്ഥാൻ സൈന്യം വികൃതമാക്കിയിരുന്നു. ഇതിന് ശക്തമായ മറുപടി നൽകുമെന്ന് ഇന്നലെ തന്നെ ഇന്ത്യ മുന്നറിയിപ്പ് നൽകിയിരുന്നു.
ഇന്നു മുതല്‍ മലയാളം നിര്‍ബന്ധം
തിരുവനന്തപുരം: മേയ് ഒന്നുമുതല്‍ സെക്രട്ടേറിയറ്റിലും മറ്റെല്ലാ സര്‍ക്കാര്‍വകുപ്പുകളിലും ഓഫീസ് നടപടികള്‍ക്ക് മലയാളം നിര്‍ബന്ധമാക്കി. സര്‍ക്കുലറുകള്‍, കത്തിടപാടുകള്‍, ഫയല്‍ നടപടികള്‍, റിപ്പോര്‍ട്ടുകള്‍, സര്‍ക്കാര്‍ ഉത്തരവുകള്‍ എന്നിവയെല്ലാം ഇനി മലയാളത്തിലായിരിക്കണം. വകുപ്പുമേധാവികളും ഓഫീസ് മേധാവികളും ഇക്കാര്യം ഉറപ്പുവരുത്തണം. ഭരണഭാഷാമാറ്റ നടപടികള്‍ മൂന്നുമാസത്തിലൊരിക്കല്‍ അവലോകനംചെയ്ത് വീഴ്ചവരുത്തുന്നവര്‍ക്കെതിരേ നടപടിസ്വീകരിക്കും.സര്‍ക്കാര്‍, അര്‍ധസര്‍ക്കാര്‍, പൊതുമേഖല, സ്വയംഭരണ, സഹകരണ സ്ഥാപനങ്ങള്‍ എന്നിവയ്‌ക്കെല്ലാം നിയമം ബാധകമാണ്.
കേന്ദ്രസര്‍ക്കാര്‍, കേന്ദ്രസ്ഥാപനങ്ങള്‍, ഹൈക്കോടതി, സുപ്രീംകോടതി, ഇതരസംസ്ഥാനങ്ങള്‍, മറ്റുരാജ്യങ്ങള്‍ എന്നിവയുമായുള്ള കത്തിടപാടുകള്‍ക്ക് ഇംഗ്ലീഷ് ഉപയോഗിക്കാം. ഇംഗ്ലീഷ് ഉപയോഗിക്കണമെന്ന് നിയമത്തില്‍ നിഷ്‌കര്‍ഷിച്ചിട്ടുണ്ടെങ്കില്‍ നിബന്ധനയില്‍ നിന്നൊഴിവാക്കും. ഓഫീസ് മുദ്രകള്‍, ഉദ്യോഗസ്ഥരുടെ പേരും ഓദ്യോഗികപദവിയും അടങ്ങുന്ന തസ്തികമുദ്രകള്‍ എന്നിവ മലയാളത്തിലും തയ്യാറാക്കണം. സംസ്ഥാനത്തിനകത്തെ ആവശ്യത്തിന് മലയാളം മുദ്രകള്‍ ഉപയോഗിക്കണം.ഔദ്യോഗികഭാഷ മലയാളമാക്കി കഴിഞ്ഞ സര്‍ക്കാരിന്റെ കാലത്താണ് നിയമനിര്‍മാണം നടത്തിയത്. അതിന്റെ തുടര്‍ച്ചയായി 2015 ജനുവരി മുതല്‍ ഓദ്യോഗികഭാഷ മലയാളമാക്കി ഉത്തരവിറക്കിയെങ്കിലും പല വകുപ്പുകളും അത് പാലിക്കുന്നില്ല.
റേഷൻ സമരത്തിൽ നിന്ന് പിന്തിരിയണം
ചക്കരക്കല്ല്: ഒരുവിഭാഗം റേഷന്‍വ്യാപാരികള്‍ തിങ്കളാഴ്ച മുതല്‍ നടത്തുന്ന കടയടപ്പ് സമരത്തില്‍നിന്ന് പിന്മാറണമെന്ന് കേരള സ്റ്റേറ്റ് റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ ജില്ലാ കമ്മിറ്റി ആവശ്യപ്പെട്ടു.സമരത്തില്‍നിന്ന് മുഴവന്‍ വ്യാപാരികളും പിന്തിരിയണമെന്നും സ്റ്റോക്ക് എടുത്ത് വിതരണം ചെയ്യണമെന്നും കേരള സ്റ്റേറ്റ് റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ സംസ്ഥാന കമ്മിറ്റി മെമ്പര്‍ ടി.കെ.പ്രമോദനും ടി.എം.ബഷീറും പ്രസ്താവനയില്‍ ആവശ്യപ്പെട്ടു .
രാമന്തളി മാലിന്യ പ്രശ്‍നം പ്രധാനമന്ത്രിയുടെ ശ്രദ്ധയിൽപ്പെടുത്തി പരിഹരിക്കുമെന്ന് സുരേഷ് ഗോപി
പയ്യന്നൂർ: പ്രധാനമന്ത്രി നരേന്ദ്ര മോദിയിൽ എനിക്കും നിങ്ങൾക്കും വിശ്വാസമുള്ളതുകൊണ്ട് ആ വിശ്വാസത്തിൽ രാമന്തളി മാലിന്യ പ്രശ്‍നം ഉടൻ ഒത്തു തീർപ്പാക്കാൻ കഴിയുമെന്ന് പ്രതീക്ഷിക്കുന്നതായി സുരേഷ് ഗോപി എം പി പറഞ്ഞു. പ്രധാനമന്ത്രിയുടെ ഓഫീസ് അറിയിച്ചതനുസരിച്ചാണ് ഞാൻ ഇവിടെ വന്നത്. അതുകൊണ്ട് തന്നെ സമരം എത്രയും പെട്ടെന്ന് ഒത്തുതീർപ്പാക്കാമെന്ന വിശ്വാസവുമുണ്ട്. ന്യായമായ ഒരു സമീപനം പ്രധാനമന്ത്രിയുടെ ഭാഗത്തു നിന്ന് ഉണ്ടാവുമെന്ന് ഉറപ്പു നല്കുകയുമാണെന്നും സുരേഷ് ഗോപി പറഞ്ഞു.
കൊടും ചൂട് നാളികേര കൃഷിയെ മോശമായി ബാധിക്കുന്നു
കണ്ണൂർ: ആഗോളതാപനവും കാലാവസ്ഥ വ്യതിയാനവും സംസ്ഥാനത്തെ നാളികേര കൃഷിയെ കനത്ത തോതിൽ ബാധിക്കുമെന്ന് ഗവേഷകരുടെ മുന്നറിയിപ്പ്. മണ്ണ്, ജലം, ജൈവ വൈവിധ്യം തുടങ്ങിയ പാരിസ്ഥിതിക അടിത്തറയെ ആകമാനം തകർക്കുന്ന കാലാവസ്ഥാ മാറ്റം നാളികേര കൃഷിയെ അപകടപ്പെടുത്തിത്തുടങ്ങിയതായി ഇത് സംബന്ധിച്ച് ഗവേഷണം നടത്തുന്നവർ ചൂണ്ടിക്കാട്ടുന്നു.
ഇന്ത്യ,ചൈന,പാകിസ്ഥാൻ, മാലിദ്വീപ്, ബംഗ്ലാദേശ് ഇനീ രാജ്യങ്ങളിലാണ് കാലാവസ്ഥാ മാറ്റം കൃഷിയിൽ ഏറ്റവും കൂടുതൽ പ്രത്യാഘാതങ്ങൾ ഉണ്ടാക്കുകയെങ്കിലും കേരളത്തിലെ നാളികേര കൃഷിയുടെ വേരറുക്കാൻ പോന്നതാണ് ഇപ്പോഴത്തെ താപവ്യതിയാനം എന്നാണ് ഗവേഷകരുടെ കണ്ടെത്തൽ. അന്തരീക്ഷ താപനില ഒരു പരിധി വരെ ഉയർന്നാലും നാളികേര കൃഷിയെ സാധാരണയായി ബാധിക്കാറില്ല. എന്നാൽ ഇപ്പോൾ സ്ഥിതി അങ്ങനെ അല്ല എന്നാണ് ഗവേഷകരുടെ കണ്ടെത്തൽ.