തലശ്ശേരി: തലശ്ശേരിയില്‍ ഭാര്യവീട്ടുകാരുമായുള്ള കുടുംബവഴക്കില്‍ പൊലിഞ്ഞത് ഒരു യുവാവിന്റെ ജീവന്‍. ചിറക്കര ചന്ദ്രിവില്ലയില്‍ കെ.കെ. സന്ദീപാണ് കൊല്ലപ്പെട്ടത്. ഭാര്യാപിതാവാണ് കൊലനടത്തിയത്. സന്ദീപും ഭാര്യവീട്ടുകാരുമായി കുറച്ചുനാളായി വഴക്കിലായിരുന്നു. ശനിയാഴ്ച സന്ദീപിന്റെ ഭാര്യയുടെ അമ്മ സുജ എത്തിയപ്പോള്‍ അവരുമായും വഴക്കുണ്ടായി. തുടര്‍ന്നാണ് ഭാര്യാപിതാവെത്തി മകളുടെ ഭര്‍ത്താവിനെ കുത്തിക്കൊന്നത്. ഇതിനായി അയ്യായിരം രൂപയോളം വിലവരുന്ന കത്തിയുമായാണ് ഭാര്യാപിതാവ് പ്രേമരാജന്‍ പന്തീരങ്കാവില്‍നിന്ന് തലശ്ശേരിയിലെത്തിയത്. സംഭവശേഷം നാട്ടുകാര്‍ ഇയാളെ പിടികൂടി പോലീസിലേല്‍പ്പിച്ചു.
ഇയാളെത്തിയ സ്‌കൂട്ടി സംഭവസ്ഥലത്തിനു സമീപംതന്നെ കിടന്നിരുന്നു. ഞായറാഴ്ച രാവിലെ കൊലപാതകം നടന്നെന്നറിഞ്ഞതോടെ രാഷ്ട്രീയമുണ്ടോ എന്നതായിരുന്നു പലര്‍ക്കും അറിയേണ്ടിയിരുന്നത്. അതിനായി ആളുകള്‍ പലവഴിക്കായി അന്വേഷണം നടത്തി. കുടുംബപ്രശ്‌നമാണ് കൊലപാതകത്തിലേക്ക് നയിച്ചതെന്നറിഞ്ഞതോടെയാണ് പലര്‍ക്കും ആശ്വാസമായത്
