ലാഹോർ:കയ്യക്ഷരം മോശമാണെന്നു പറഞ്ഞു കളിയാക്കിയ സഹോദരിയെ 11 കാരനായ സഹോദരൻ കഴുത്തു ഞെരിച്ചു കൊലപ്പെടുത്തി.ഷാലിമാർ സ്വദേശി അബ്ദുല്ല ആണ് സഹോദരി ഇമാൻ തൻവീർ(9)നെ കഴുത്തു ഞെരിച്ചു കൊന്നത്.സഹോദരനും സഹോദരിയും പെരുന്നാൾ ആഘോഷങ്ങൾക്കായി മുത്തശ്ശിയുടെ വീട്ടിൽ വന്നപ്പോഴാണ് സംഭവം.മുത്തശ്ശി വീട്ടിലില്ലാത്ത ദിവസം രണ്ടുപേരും കൂടി കയ്യെഴുത്തു മത്സരം നടത്തി.കയ്യക്ഷരം മോശമാണെന്നു പറഞ്ഞു ഇമാൻ അബ്ദുല്ലയെ കളിയാക്കി.ഇതിൽ പ്രകോപിതനായ അബ്ദുല്ല ടവ്വലെടുത്ത് ഇമാൻറെ കഴുത്തു ഞെരിച്ചു കൊലപ്പെടുത്തുകയായിരുന്നു.
കോഴിക്കോട്:ചെമ്പനോടയില്‍ കര്‍ഷകന്‍ വില്ലേജ് ഓഫീസില്‍ ആത്മഹത്യ ചെയ്ത സംഭവത്തില്‍ അറസ്റ്റിലായ വില്ലേജ് അസിസ്റ്റന്‍റ് സിലേഷ് തോമസിനെ പിന്തുണച്ച് കൂടുതല്‍ പ്രചരണ പ്രവര്‍ത്തനങ്ങളുമായി റവന്യു ജീവനക്കാര്‍. അഞ്ചാം തീയതി അവധി എടുത്ത് ഐക്യദാര്‍ഢ്യം പ്രഖ്യാപിക്കാനായി ജീവനക്കാര്‍ക്കിടയില്‍ സോഷ്യല്‍ മീഡിയ വഴി ആരംഭിച്ച പ്രചരണത്തിന് പിന്നാലെ ഒരു ദിവസത്തെ വേതനം സിലീഷിന്‍റെ പേരില്‍ ജയിലേക്ക് മണിയോഡര്‍ അയക്കാനാണ് ഒരു വിഭാഗം ജീവനക്കാരുടെ തീരുമാനം. ഇത് ആരംഭിക്കുകയും ചെയ്തു.മുഖ്യധാര ട്രേഡ് യൂണിയനുകള്‍ ഈ നീക്കത്തെ പരസ്യമായി പിന്തുണയ്ക്കാന്‍ തയ്യാറായിട്ടില്ല. അതിവൈകാരികമായി പ്രതികരിക്കരുതെന്ന നിലപാടാണ് എന്‍ജിഒ യൂണിയന്‍, ജോയിന്‍റ് കൌണ്‍സില്‍ തുടങ്ങിയ സംഘടനകള്‍ക്കുള്ളത്. ആത്മഹത്യാ പ്രേരണാ കുറ്റം ചുമത്തി പോലീസ് അറസ്റ്റ് ചെയ്യുകയും റിമാന്‍റില്‍ കഴിയുകയും ചെയ്യുന്ന സിലീഷ് തോമസ് നിരപരാധിയാണെന്നാണ് ജീവനക്കാരുടെ വാദം.ജീവനക്കാരുടെ സോഷ്യല്‍ മീഡിയ ഗ്രൂപ്പുകളില്‍ വ്യാപകമായ രീതിയില്‍ സിലീഷിനെ പിന്തുണച്ച് പ്രചരണം നടക്കുന്നുണ്ട്.
കൊച്ചി:നടിയെ ആക്രമിച്ച കേസിലെ മുഖ്യപ്രതി പൾസർ സുനി കാക്കനാട് ജയിലിൽ നിന്നും ഫോൺ ചെയ്യുന്നതുൾപ്പെടെ സുപ്രധാന തെളിവുകൾ പോലീസിന് ലഭിച്ചു.ജയിലിലെ സി.സി.ടി.വിയിൽ നിന്നുള്ള ദൃശ്യങ്ങളാണ് ലഭിച്ചത്.സുനി ജയിലിൽ നിന്നും നാദിർഷയെയും ദിലീപിന്റെ മാനേജർ അപ്പുണ്ണിയെയും വിളിക്കാറുണ്ടായിരുന്നു എന്ന സഹതടവുകാരൻ ജിൻസന്റെ മൊഴി ശരിവെക്കുന്ന തരത്തിലുള്ള തെളിവുകളാണ് പൊലീസിന് ലഭിച്ചത്.ദൃശ്യത്തിൽ ജിൻസനെയും വ്യക്തമായി കാണാമെന്നാണ് സൂചന.ജിൻസന്റെ മൊഴിയുടെ അടിസ്ഥാനത്തിൽ കഴിഞ്ഞ മൂന്നു മാസത്തെ ദൃശ്യങ്ങളാണ് പോലീസ് പരിശോധിച്ചത്.
ന്യൂഡൽഹി:ജി.എസ്.ടി നിലവിൽ വന്നതോടെ പാചകവാതക സിലിണ്ടറിന്റെ വില 32 രൂപ കൂടി.ആറു വർഷത്തെ ഏറ്റവും കൂടിയ വർദ്ധനവാണിത്.ഡൽഹിയിൽ ഒരു സിലിണ്ടറിന് 446.65 ആയിരുന്നത് 477.46 ആയി വർധിച്ചു.മുംബൈയിൽ നേരത്തെ മൂന്നു ശതമാനം വാറ്റ് കൂടുതലുണ്ടായതിനാൽ സിലിണ്ടറിന്റെ വില ഡൽഹിയെ അപേക്ഷിച്ച് 14.28 രൂപ വർധിച്ച് 491.25 രൂപയാകും.സബ്‌സിഡിയില്ലാത്ത സിലിണ്ടറിന് 11.5 രൂപ വർധിച്ച് 564 രൂപയായി.സബ്‌സിഡിയില്ലാത്ത സിലിണ്ടറിന് 18 ശതമാനമാണ് ജി.എസ്.ടി.
തിരുവനന്തപുരം:വേതന വർദ്ധനവിനായി സമരം നടത്തുന്ന നഴ്സുമാരുമായി തൊഴിൽ മന്ത്രി ഇന്ന് നടത്തിയ ചർച്ച പരാജയപ്പെട്ടു.ഇന്ത്യൻ നഴ്സസ് അസോസിയേഷനുമായി നടത്തിയ ചർച്ച തീരുമാനമാകാതെ പിരിയുകയായിരുന്നു.അടിസ്ഥാന ശമ്പളം ഇരുപത്തിനായിരത്തിനു മുകളിലേക്ക് ഉയർത്തണമെന്നാണ് നഴ്സുമാരുടെ പ്രധാന ആവശ്യം.വിഷയത്തിൽ പത്താം തീയതി വീണ്ടും ചർച്ച നടക്കും.ഈ ചർച്ചയിലും തീരുമാനമായില്ലെങ്കിൽ മാത്രം സംസ്ഥാനവ്യാപകമായി സമരത്തിലേക്ക് നീങ്ങാമെന്നു നഴ്സുമാർ തീരുമാനിച്ചു.ഇന്ന് വൈകുന്നേരം നാലു മണിക്ക് യുണൈറ്റഡ് നഴ്സസ് അസ്സോസിയേഷനുമായും ചർച്ചയുണ്ട്.ഇന്ന് നടന്ന ചർച്ചയിൽ ആശുപത്രി മാനേജ്മെന്റുകൾ പങ്കെടുത്തിട്ടില്ല.പത്താം തീയതി നടക്കുന്ന ചർച്ചയിൽ മാനേജ്‌മന്റ് പ്രതിനിധികളെയും ഉൾപ്പെടുത്തും.
ആലപ്പുഴ:ബ്ലേഡ് മാഫിയയുടെ ഭീഷണിയെ തുടർന്ന് കായംകുളത്ത് വീട്ടമ്മ ആത്മഹത്യ ചെയ്തു.കായംകുളം പട്ടോളി മാർക്കറ്റ് സ്വദേശിനി രാധാമണി(48) ആണ് വീട്ടിനുള്ളിൽ തൂങ്ങി മരിച്ചത്.സ്ത്രീകളുടെ നേതൃത്വത്തിലുള്ള ബ്ലേഡ് മാഫിയയുടെ ഭീഷണിയെ തുടർന്നാണ് ആത്മഹത്യയെന്നാണ് പരാതി.സ്ഥലത്തെ ബ്ലേഡ് പലിശക്കാരിൽ നിന്നും മകളുടെ വിവാഹാവശ്യങ്ങൾക്കായി രാധാമണി ഒരു ലക്ഷം രൂപ വായ്പ്പയെടുത്തിരുന്നു.ഇതിന്റെ പലിശയും കൂട്ടുപലിശയും ഉൾപ്പെടെ രണ്ടു ലക്ഷത്തോളം രൂപ തിരിച്ചടക്കാൻ ഉണ്ടായിരുന്നു.ഇതിനു സാവകാശം ചോദിച്ചെങ്കിലും പലിശക്കാർ തയ്യാറായില്ല.ഇതേ തുടർന്ന് ഇന്നലെ വൈകിട്ട് മൂന്നുപേരടങ്ങുന്ന വനിതാ സംഘം രാധാമണിയുടെ വീട്ടിലെത്തി അസഭ്യം പറയുകയും ഭീഷണിപ്പെടുത്തുകയും ചെയ്തിരുന്നു. നാട്ടുകാരുടെയും പെൺമക്കളുടെയും മുൻപിൽ വെച്ച് അപമാനിച്ചതോടെ രാധാമണി മുറിയിൽ കയറി വാതിലടച്ചു.തുടർന്ന് തൂങ്ങി മരിക്കുകയും ചെയ്തു.സംഭവത്തിൽ പുതിയവിള സ്വദേശി ജയ,ഇവരുടെ സഹോദരി എന്നിവർക്കെതിരെ കായംകുളം പോലീസ് കേസെടുത്ത് അന്വേഷണം തുടങ്ങി.
കൊച്ചി:നടി ആക്രമിക്കപ്പെട്ട കേസിലെ മുഖ്യപ്രതി പൾസർ സുനിയുടെ റിമാൻഡ് ഈ മാസം 18 വരെ നീട്ടി.അങ്കമാലി മജിസ്‌ട്രേറ്റ് കോടതിയാണ് കാലാവധി നീട്ടിയത്.സുനിയെ കൂടാതെ ബിജേഷ്,മാർട്ടിൻ,മണികണ്ഠൻ,വടിവാൾ സലിം,ചാർളി,പ്രദീപ് എന്നിവരെയും ഇന്ന് വിസ്തരിച്ചു.വക്കീലിനെ മാറ്റണമെന്ന സുനിയുടെ അപേക്ഷയാണ് കോടതി ആദ്യം പരിഗണിച്ചത്.ഇതേ ചൊല്ലി അഭിഭാഷകർ തമ്മിൽ കോടതിയിൽ തർക്കമുണ്ടായി.അഡ്വ.ബി.എ ആളൂരും അഡ്വ.ടെനിയും തമ്മിലാണ് തർക്കമുണ്ടായത്.ഇതിനെ തുടർന്ന് പ്രതിക്ക് ഇഷ്ടമുള്ള അഭിഭാഷകന് വക്കാലത്ത് നൽകാമെന്ന് കോടതി വ്യക്തമാക്കി.അതേസമയം പോലീസ് തന്നെ മർദിച്ചുവെന്നു സുനി കോടതിയിൽ വെളിപ്പെടുത്തി.സുനിയെ പരിശോധിച്ച ആലുവ താലൂക്ക് പോലീസ് സർജനെ കോടതി വിസ്തരിച്ചു.പോലീസ് മർദിച്ചെന്നു സുനി പറഞ്ഞിട്ടില്ലെന്ന് സർജൻ ബോധിപ്പിച്ചു.
ന്യൂഡൽഹി:അസാധു നോട്ടുകൾ മാറ്റി നൽകുന്നതിനായി ജനങ്ങൾക്ക് സമയം നൽകണമെന്നും മതിയായ കാരണങ്ങളുള്ളവരെ അസാധു നോട്ടുകൾ മാറ്റിയെടുക്കുന്നതിൽ നിന്നും തടയാനാവില്ല എന്ന് സുപ്രീം കോടതി.ഈ വിഷയത്തിൽ മറുപടി നല്കാൻ കേന്ദ്ര സർക്കാരിനും റിസേർവ് ബാങ്കിനും സുപ്രീം കോടതി 14 ദിവസത്തെ സമയം അനുവദിച്ചിട്ടുണ്ട്.അസാധു നോട്ടുകൾ മാറിയെടുക്കാൻ സമയം അനുവദിക്കണമെന്നുള്ള ഹർജി പരിഗണിക്കുമ്പോഴാണ് സുപ്രീം കോടതി ചീഫ് ജസ്റ്റിസ് ജെ.എസ് ഖേഹർ റിസേർവ് ബാങ്കിൽ നിന്നും കേന്ദ്ര സർക്കാരിൽ നിന്നും പ്രതികരണം ആവശ്യപ്പെട്ടിട്ടുള്ളത്.ന്യായമായ കാരണങ്ങൾ ചൂണ്ടി കാണിച്ച ഒരു വ്യക്തിക്ക് അനുവദിച്ച സമയത്തിനുള്ളിൽ പണം നിക്ഷേപിക്കാൻ കഴിഞ്ഞില്ലെങ്കിൽ അയാളെ അസാധുനോട്ടുകൾ മാറിയെടുക്കുന്നതിൽ നിന്നും വിലക്കാൻ കഴിയില്ലെന്നാണ് കോടതിയുടെ വാദം.പ്രശ്ന പരിഹാരം കണ്ടെത്തണമെന്ന് ആവശ്യപ്പെട്ട കോടതി തീരുമാനം പുനഃപരിശോധിക്കാൻ തയ്യാറായില്ലെങ്കിൽ ഗുരുതര പ്രത്യാഘാതങ്ങൾ ഉണ്ടാകുമെന്നും മുന്നറിയിപ്പ് നൽകി.
കല്യാശ്ശേരി:കണ്ണൂർ സർവകലാശാല മാങ്ങാട്ടുപറമ്പ് ക്യാമ്പസ്സിൽ ഒരുക്കിയ പെണ്ണിടം ആരോഗ്യമന്ത്രി കെ.കെ.ശൈലജ ഉൽഘാടനം ചെയ്തു.സ്ത്രീകൾക്ക് വിശ്രമിക്കാനും ഉന്മേഷം വീണ്ടെടുക്കാനുമുള്ള സൗകര്യങ്ങളോടെ ഒരുക്കിയ സ്ത്രീസൗഹൃത മുറിയാണ് പെണ്ണിടം.കല്യാശ്ശേരി നിയോജക മണ്ഡലങ്ങളിലെ തിരഞ്ഞെടുക്കപ്പെട്ട കലാലയങ്ങളിലാണ് പെണ്ണിടം ഒരുക്കുന്നത്.ടി.വി രാജേഷ് എം.എൽ.എ യുടെ ആസ്തിവികസന ഫണ്ട് ഉപയോഗിച്ചാണ് സംവിധാനം നടപ്പിലാക്കുന്നത്.എട്ടു കലാലയങ്ങളിലാണ് ഈ സംവിധാനം ഒരുക്കുന്നത്.മങ്ങാട്ടുപറമ്പ ക്യാമ്പസ്,പയ്യന്നൂർ,മാടായി കോളേജുകൾ,പയ്യന്നൂർ സംസ്‌കൃത സർവകലാശാല ക്യാമ്പസ്,നെരുവംബ്രം,പട്ടുവം ഐ.എച്.ആർ.ഡി കോളേജുകൾ,കല്യാശ്ശേരി മോഡൽ പൊളി ടെക്‌നിക്,പരിയാരം ഗവ.ആയുർവേദ കോളേജ് എന്നിവിടങ്ങളിലാണ് ഇവ ഒരുക്കുന്നത്.ഈ വിശ്രമ കേന്ദ്രത്തിൽ കസേര,കിടക്ക,ഫാൻ,ശുദ്ധജലം,രക്തസമ്മർദ്ദം പരിശോധിക്കാനുള്ള ഉപകരണങ്ങൾ,വീൽ ചെയർ,ഡ്രസിങ് റൂം,നാപ്കിൻ വെൻഡിങ് മെഷീൻ,ഇൻസിനറേറ്ററോടുകൂടിയ ശുചിമുറി എന്നിവ ഒരുക്കിയിട്ടുണ്ട്.സംസ്ഥാനത്ത് ആദ്യമായാണ് ഇത്തരത്തിൽ പെൺകുട്ടികൾക്കായി പ്രത്യേക വിശ്രമ സ്ഥലം ഒരുക്കുന്നത്.
കണ്ണൂർ:സംസ്ഥാനത്ത് അംഗീകാരം ഇല്ലാതെ പ്രവർത്തിക്കുന്ന ഇംഗ്ലീഷ് മീഡിയം സ്കൂളുകൾ ഒരാഴ്ചക്കകം പൂട്ടണമെന്ന് സ്കൂൾ മാനേജ്‌മെന്റുകൾക്ക് ഉപവിദ്യാഭ്യാസ ഓഫീസർ ഉത്തരവ് നൽകി.സ്കൂളുകൾ പൂട്ടി വിവരം ഓഫീസിനെ അറിയിക്കണം.ഏതെങ്കിലും അംഗീകാരം ഉണ്ടെങ്കിൽ ഏഴു ദിവസത്തിനകം ഇക്കാര്യം അറിയിക്കണമെന്നും ഉത്തരവിൽ പറയുന്നു.ഇത്തരം സ്കൂളുകളിലെ കുട്ടികളെ പൊതുവിദ്യാലയങ്ങളിലോ അംഗീകാരമുള്ള മറ്റു സ്കൂളുകളിലേക്കോ മാറ്റി ചേർക്കണം.കുട്ടികൾക്കുണ്ടാകുന്ന കഷ്ടനഷ്ടങ്ങൾക്കു സ്കൂൾ മാനേജ്‌മന്റ് ഉത്തരവാദിയായിരിക്കും. അംഗീകാരമില്ലാത്ത സ്കൂളുകൾ പൂട്ടുന്നതിലൂടെ പൊതുവിദ്യാലയങ്ങളിൽ കുട്ടികളുടെ എണ്ണം കൂടുകയും അധ്യാപക തസ്തികകൾ വർധിക്കുകയും ചെയ്യും.ഇതോടെ സംരക്ഷിത അധ്യാപകർക്ക് ഈ തസ്തികകളിൽ ചേരാൻ പറ്റും.നല്ലരീതിയിൽ നടത്തിവരുന്ന സ്കൂളുകൾ അംഗീകാരമില്ലാത്തതിന്റെ പേരിൽ പൂട്ടിക്കുന്നത് ആസൂത്രിത നീക്കത്തിന്റെ ഭാഗമാണെന്നു സ്വകാര്യ മാനേജ്മെന്റുകളുടെ സംഘടനാ പ്രസിഡണ്ട് രാമദാസ് കതിരൂർ പറഞ്ഞു.