Full Grid

കൊച്ചി:നടിയെ അക്രമിച്ച സംഭവത്തിലെ ഗൂഢാലോചന കേസില്‍ അറസ്റ്റ് ഉടന്‍ ഉണ്ടായേക്കില്ല. ചില തെളിവുകള്‍ ലഭിച്ചിട്ടുണ്ടെങ്കിലും ദിലീപ് അടക്കമുള്ളവരെ നേരിട്ട് ബന്ധിപ്പിക്കാന്‍ ഇത് പര്യാപ്തമല്ല. ഈ സാഹചര്യത്തില്‍ കൂടുതല്‍ ചോദ്യംചെയ്യല്‍ ഉണ്ടായേക്കുമെന്ന് ഇന്നലെ ചേര്‍ന്ന അവലോകനയോഗത്തിന് ശേഷം ആലുവ റൂറല്‍ എസ്പി അറിയിച്ചു. തെളിവുകള്‍ ഒത്തുവന്നാല്‍ അറസ്റ്റ് വൈകിയേക്കില്ലെന്നും സൂചനയുണ്ട്.അഞ്ച് പേരെ അറസ്റ്റ് ചെയ്യാനുള്ള അനുമതി ഡിജിപി അന്വേഷണ സംഘത്തിന് നല്‍കിയിട്ടുണ്ട്. എന്നാല്‍ അറസ്റ്റിന് ആവശ്യമായ തെളിവുകള്‍ പൂര്‍ണ്ണമായും ലഭിച്ചിട്ടില്ലെന്നാണ് സൂചന. ഫോണ്‍ രേഖകള്‍ അടക്കം പൊലീസിന്‍റെ കൈവശമുണ്ട്. എന്നാല്‍ ഇവയൊന്നും ദിലീപ് അടക്കമുള്ളവരെ നേരിട്ട് പ്രതിസ്ഥാനത്ത് കൊണ്ടുവരുന്നില്ല.കേസ് അന്വേഷണത്തിന്‍റെ മേല്‍നോട്ട ചുമതലയുള്ള ഐജി ദിനേന്ദ്ര കശ്യപ് കൊച്ചിയില്‍ ക്യാമ്പ് ചെയ്യുന്നുണ്ട്. ഇന്നലെ ഐജിയുടെ നേതൃത്വത്തില്‍ അന്വേഷണ പുരോഗതി വിലയിരുത്തിയിരുന്നു. എടുത്ത് ചാടി അറസ്റ്റിലേക്ക് നീങ്ങിയാല്‍ അത് വലിയ തിരിച്ചടിയുണ്ടാക്കുമെന്ന് യോഗം വിലയിരുത്തി.  ഈ സാഹചര്യത്തില്‍ കൂടുതല്‍ ശാസ്ത്രീയ തെളിവുകളും മൊഴികളും ശേഖരിച്ച് പഴുതുകള്‍ അടച്ച് മുന്നോട്ട് പോകാനാണ് അന്വേഷണ സംഘം ശ്രമിക്കുന്നത്.

കണ്ണൂർ:കെ.എസ്.ആർ.ടി.സി ബസ് നിയന്ത്രണം വിട്ടു റോഡരികിലുള്ള ടെലിഫോൺ പോസ്റ്റിലിടിച്ചതിനെ തുടർന്ന് പരസ്യ ബോർഡിന്റെ കമ്പി കഴുത്തിൽ തുളച്ചു കയറി യാത്രക്കാരി തൽക്ഷണം മരിച്ചു.ചെമ്പേരി സ്വദേശിനി പരേതനായ ഇലവുങ്കൽ മാത്യുവിന്റെ ഭാര്യ ത്രേസ്യാമ്മ(58) ആണ് മരിച്ചത്.ഇന്ന് രാവിലെ തളിപ്പറമ്പ് ടാഗോർ വിദ്യാനികേതന് സമീപത്തായിരുന്നു അപകടം.എതിരെ  അമിത വേഗതയിൽ വരികയായിരുന്ന ലോറിയിൽ ഇടിക്കാതിരിക്കാൻ വെട്ടിച്ചപ്പോൾ നിയന്ത്രണംവിട്ട ബസ് റോഡരികിലുള്ള പോസ്റ്റിലിടിക്കുകയായിരുന്നു. ഇവിടെയുണ്ടായിരുന്ന കടയുടെ പരസ്യബോർഡ് പിടിപ്പിച്ച കമ്പി ബസ്സിന്റെ ഷട്ടർ തുളച്ചു മുൻഭാഗത്തെ സീറ്റിലിരിക്കുകയായിരുന്ന ത്രേസ്യാമ്മയുടെ കഴുത്തിലൂടെ തുളച്ചു കയറി മറുവശത്തേക്കു കടന്നു.തൽക്ഷണം മരണം സംഭവിച്ചു.ഇടുക്കി നെടുങ്കണ്ടത്ത് അസുഖമായി കിടക്കുന്ന മൂത്ത സഹോദരിയെ കാണാൻ പോവുകയായിരുന്നു ത്രേസ്യാമ്മ.ഇവരുടെ കൂടെ അനുജത്തിയും സഹോദരങ്ങളും  ഉണ്ടായിരുന്നു.ഇന്നലെ രാത്രി കരുവഞ്ചാലിൽ വന്നു താമസിച്ചു രാവിലെ പൊൻകുന്നത്തേക്കുള്ള കെ.എസ്.ആർ.ടി.സി ബസിൽ കയറിയതായിരുന്നു ത്രേസ്യാമ്മ.മൃതദേഹം പരിയാരം മെഡിക്കൽ കോളേജ് മോർച്ചറിയിൽ.

കാഞ്ഞങ്ങാട്:വിദ്യാഭ്യാസ വായ്‌പ്പാ കുടിശ്ശിക സ്വന്തം അക്കൗണ്ടിൽ അടപ്പിച്ച റെവന്യൂ റിക്കവറി ഇൻസ്‌പെക്ടറെ സസ്‌പെൻഡ് ചെയ്തു.പുല്ലൂർ സ്വദേശി ഉഷ രാജന്റെ പരാതിയിന്മേൽ ഹൊസ്ദുർഗ് താലൂക്ക് ഓഫീസിലെ ഷാജിയെയാണ് കളക്ടർ കെ.ജീവൻബാബു സസ്‌പെൻഡ് ചെയ്തത്.ഉഷാ രാജന്റെ മകൾ ബാങ്കിൽനിന്നെടുത്ത വിദ്യാഭ്യാസ വായ്‌പ്പാ കൃത്യമായി തിരിച്ചടക്കാത്തതിനാൽ കുടിശ്ശിക ആയി.40,000 രൂപയാണ് അടക്കേണ്ടിയിരുന്നത്.ഇതിനെ തുടർന്ന് റെവന്യൂ റിക്കവറി നോട്ടീസ് നൽകിയിരുന്നു.രണ്ടു തവണയായി ഈ തുക ബാങ്കിലടച്ചുവെന്നും എന്നാൽ ബാങ്കിൽ ഈ തുക എത്തിയില്ലെന്നും കാണിച്ച് ഉഷ കളക്ടർക്കു പരാതി നൽകിയിരുന്നു.ഇതിൽ ഹൊസ്ദുർഗ് തഹസിൽദാർ അന്വേഷണം നടത്തി.ആദ്യ ഗഡുവായ 20,000 രൂപ ഷാജിയുടെ സ്വന്തം അക്കൗണ്ടിലേക്കു അടപ്പിച്ചു.രണ്ടാമത്തെ ഗഡു നേരിട്ട് വാങ്ങുകയും ചെയ്തു.കളക്ടർക്ക് പരാതി നൽകിയപ്പോൾ 40,000 രൂപ ഉഷാരാജന് തിരിച്ചു നൽകി.എന്നാൽ ഔദ്യോഗികകൃത്യനിർവഹണലംഘനം ചൂണ്ടിക്കാട്ടി കളക്ടർ സസ്പെൻഷനു ഉത്തരവിടുകയായിരുന്നു.