കാസർകോഡ്:മദ്യപിച്ചെത്തിയ പിതാവിൽ നിന്നും രക്ഷപെടുന്നതിനായി കിണറ്റിൽ ചാടിയ വിദ്യാർത്ഥിനി മരിച്ചു.കാസർകോഡ് കൊളത്തൂർ ഗവ.ഹൈസ്കൂളിലെ ഒൻപതാം ക്ലാസ് വിദ്യാർത്ഥിനിയാണ് മരിച്ചത്.ഇന്നലെ രാത്രി ഒൻപതരയോടെ മദ്യപിച്ചെത്തിയ പിതാവിനോട് ശല്യം കാരണം പഠിക്കാൻ കഴിയില്ലെന്ന് പറഞ്ഞ പെൺകുട്ടിക്ക് നേരെ പ്രകോപിതനായ പിതാവ് കത്തിയുമെടുത്ത് ആക്രമിക്കാൻ ചെല്ലുകയായിരുന്നു.ഭയന്നുപോയ പെൺകുട്ടി പ്രാണരക്ഷാർത്ഥം വീട്ടിൽ നിന്നും ഇറങ്ങി ഓടുകയും പിതാവ് പുറകെ വരുന്നത് കണ്ട് മുറ്റത്തോട് ചേർന്നുള്ള കിണറ്റിലേക്ക് ചാടുകയുമായിരുന്നു.നാട്ടുകാർ ഓടികൂടിയെങ്കിലും അൻപത്തടി താഴ്ചയുള്ള കിണറായതിനാൽ ഒന്നും ചെയ്യാൻ സാധിച്ചില്ല.പിന്നീട് ഫയർഫോഴ്‌സ് എത്തി കുട്ടിയുടെ മൃതദേഹം കിണറ്റിൽ നിന്നും പുറത്തെടുക്കുകയായിരുന്നു.തേപ്പു തൊഴിലാളിയായ പിതാവ് ഹരിദാസൻ സ്ഥിരം മദ്യപിച്ചെത്തി ശല്യം ചെയ്യാറുണ്ടായിരുന്നുവെന്ന് നാട്ടുകാർ പറഞ്ഞു.അസ്വാഭാവിക മരണത്തിനു പോലീസ് കേസെടുത്തു.
