കൊച്ചി:നടൻ ദിലീപ് അറസ്റ്റ് ചെയ്യപ്പെട്ട സംഭവത്തിൽ ഇപ്പോൾ പ്രതികരിക്കാനില്ലെന്ന് ആക്രമണത്തിന് ഇരയായ നടിയുടെ കുടുംബം.ദിലീപിന്റെ അറസ്റ്റ് സ്ഥിതീകരിച്ച ശേഷം പ്രതികരണത്തിനായി സമീപിച്ച മാധ്യമങ്ങളോടാണ് കുടുംബം ഇത്തരത്തിൽ അറിയിച്ചത്.സംഭവത്തിൽ ദിലീപിനൊപ്പം നാദിര്ഷയും കസ്റ്റഡിയിലുണ്ടെന്നു സൂചനയുണ്ട്.
കൊച്ചി:നടിയെ ആക്രമിച്ച കേസിൽ നടൻ ദിലീപിനെ അറസ്റ്റ് ചെയ്തു.പൾസർ സുനിയെ വീണ്ടും കസ്റ്റഡിയിലെടുത്ത് ചോദ്യം ചെയ്തതോടെ ഗൂഢാലോചന സംബന്ധിച്ച് നിർണായക വിവരങ്ങൾ ലഭിച്ചത്.ഇതാണ് ഇപ്പോൾ ദിലീപിന്റെ അറസ്റ്റിലേക്ക് എത്തിച്ചിരിക്കുന്നത്.2013 ലാണ് ഈ ആക്രമണത്തിന്റെ ഗൂഢാലോചന തുടങ്ങിയതെന്നും സൂചന ലഭിച്ചിട്ടുണ്ട്.ഇതിനു മുൻപും സംസ്ഥാനത്തിന് പുറത്തു വെച്ച് നടിയെ ആക്രമിക്കാൻ ശ്രമം നടന്നതായും സൂചന ലഭിച്ചിട്ടുണ്ട്.ഇതിനായി പൾസർ സുനിയെ തന്നെയാണ് നിയോഗിച്ചതെന്നും അന്വേഷണ സംഘം പറയുന്നു.ഇതുമായി ബന്ധപ്പെട്ടു വ്യക്തമായ വിവരങ്ങൾ ദിലീപിനെതിരെ ലഭിച്ചിട്ടുണ്ടെന്നാണ് അറിയുന്നത്.
കൊച്ചി:നടിയെ ആക്രമിച്ച കേസുമായി ബന്ധപ്പെട്ടു ജനപ്രിയ നായകൻ ദിലീയതിനെ പോലീസ് അറസ്റ്റ് ചെയ്തു.വ്യക്തമായ തെളിവുകളുടെ അടിസ്ഥാനത്തിലാണ് ദിലീപിനെ പോലീസ് അറസ്റ്റ് ചെയ്തിരിക്കുന്നത്.അറസ്റ്റ് കാര്യം മുഖ്യമന്ത്രിയുടെ ഓഫീസിൽ സ്ഥിതീകരിച്ചു.തിങ്കളാഴ്ച രാവിലെ മുതൽ ദിലീപ് പോലീസ് കസ്റ്റഡിയിലായിരുന്നു.എന്നാൽ അറസ്റ്റ് വിവരം വൈകിട്ടോടെയാണ് പോലീസ് പുറത്തുവിട്ടത്.
ശ്രീനഗർ:കല്ലേറ് ചെറുക്കാൻ ജമ്മു കാശ്മീരിൽ സൈന്യം മനുഷ്യകവചമാക്കിയ യുവാവിന് പത്തുലക്ഷം രൂപ നഷ്ടപരിഹാരം നല്കാൻ കോടതി വിധി.ജമ്മു കശ്മീരിലെ മനുഷ്യാവകാശ കമ്മീഷനാണ് വിധി പ്രഖ്യാപിച്ചത്.ശ്രീനഗർ മണ്ഡലത്തിലെ ഉപതെരഞ്ഞെടുപ്പിനെ തുടർന്നുണ്ടായ കല്ലേറിനെ പ്രതിരോധിക്കാനാണ് സൈന്യം ഫാറൂഖ് അഹമ്മദ് ധർ എന്ന യുവാവിനെ മനുഷ്യ കവചമാക്കിയത്.പ്രതിഷേധക്കാരുടെ കല്ലേറിൽ നിന്നും രക്ഷപെടാൻ യുവാവിനെ സൈനിക ജീപ്പിനു മുന്നിൽ കെട്ടിയിട്ടു കവചം തീർത്ത സംഭവം വലിയ വിവാദമായിരുന്നു.സൈന്യത്തിന് നേരെ കല്ലെറിഞ്ഞു എന്നാരോപിച്ചാണ് ഫാറൂഖിനെ ജീപ്പിനു മുൻപിൽ കെട്ടിയിട്ടത്.എന്നാൽ താൻ കല്ലെറിഞ്ഞില്ലെന്നും വോട്ട് ചെയ്ത് തിരികെ പോരുമ്പോൾ സൈനികർ പിടികൂടുകയായിരുന്നെന്നുമാണ് ഫാറൂഖ് പറയുന്നത്.
ഭുവനേശ്വർ:ഏഷ്യന്‍ അത്‍ലറ്റിക്ക് ചാമ്പ്യന്‍ഷിപ്പില്‍ ഇന്ത്യക്ക് ചരിത്രത്തിലാദ്യമായി കിരീടം. ചൈനയെ പിന്തള്ളി 12 സ്വര്‍ണമടക്കം 29 മെഡലുകളോടെയാണ് ആതിഥേയരുടെ കിരീടനേട്ടം. ഇന്ത്യക്ക് വേണ്ടി ദീര്‍ഘദൂര ഓട്ടത്തില്‍ ജി ലക്ഷ്മണന്‍ ഇരട്ടസ്വര്‍ണം നേടിയപ്പോള്‍ ടീം നായകന്‍ നീരജ് ചോപ്ര മീറ്റ് റെക്കോര്‍ഡോടെ ജാവലിന്‍ ത്രോയില്‍ സ്വര്‍ണമണിഞ്ഞു.ട്രാക്കിലെ മെഡല്‍കൊയ്ത്താണ് അഭിമാനകരമായ നേട്ടം കാണികള്‍ക്ക് മുമ്പില്‍ സ്വന്തമാക്കാന്‍ ഇന്ത്യക്ക് കരുത്തായത്.അവസാനദിവസം ട്രാക്കില്‍ നിന്നും ഫീല്‍ഡില്‍ നിന്നുമായി ഇന്ത്യ സ്വന്തമാക്കിയത് 5 സ്വര്‍ണമടക്കം 9 മെഡലുകള്‍. നായകന്‍ നീരജ് ചോപ്ര ചാമ്പ്യന്‍ഷിപ്പിലെ രണ്ടാമത്തെ മീറ്റ് റെക്കോര്‍ഡോടെ ജാവലിനില്‍ സ്വര്‍ണം നേടി. 5000ത്തിന് പിന്നാലെ 10000ത്തിലും ഒന്നാമനായതോടെ ജി ലക്ഷ്മണന്‍ ചാമ്പ്യന്‍ഷിപ്പില്‍ ഇരട്ട സ്വര്‍ണം സ്വന്തമാക്കി. 4-400 മീറ്റര്‍ റിലേകളില്‍ ത്രസിപ്പിക്കുന്ന വിജയം നേടിയ ഇന്ത്യ 800 ല്‍ പക്ഷെ നിരാശപ്പെടുത്തി. പരിക്കേറ്റ് മടങ്ങിയ ടിന്‍റുലൂക്കയുടെ അഭാവത്തില്‍ അര്‍ച്ചന ആദേവ് നേടിയ സ്വര്‍ണത്തിന് പക്ഷെ അധികം ആയുസുണ്ടായില്ല. ശ്രീലങ്കന്‍ താരത്തെ പിടിച്ച് തള്ളിയിന് അര്‍ച്ചനയെ അയോഗ്യയാക്കി.പുരുഷ വിഭാഗത്തില്‍ ജിന്‍സണ്‍ ജോണ്‍സണ് മൂന്നാമതെത്താനെ കഴിഞ്ഞുള്ളു. ഹെപ്റ്റാത്തലണില്‍ സ്വപ്ന ബര്‍മനും ഇന്ത്യക്ക് വേണ്ടി അവസാനദിനം സ്വര്‍ണമണിഞ്ഞു. 10000 മീറ്ററില്‍ മലയാളി താരം ടി ഗോപി വെള്ളിയും ജാവലിന്‍ ത്രോയില്‍ ധവീന്ദര്‍ സിങ് കാങും ഹെപ്ടാത്തലണില്‍ പൂര്‍ണിമ ഹെമ്പ്രാമും ഇന്ത്യക്ക് വേണ്ടി ചാമ്പ്യന്‍ഷിപ്പിന്‍റെ അവസാനനാളില്‍ വെങ്കലവും നേടി.
തിരുവനന്തപുരം:മിനിമം വേതനം ആവശ്യപ്പെട്ട് നഴ്സുമാർ നടത്തുന്ന സമരത്തിൽ സ്വരം കടുപ്പിച്ച് സർക്കാർ.നഴ്സുമാരുടെ ശമ്പളം സംബന്ധിച്ച് ഇന്ന് തന്നെ തീരുമാനം എടുക്കണമെന്ന് സർക്കാർ ആശുപത്രി മാനേജ്മെന്റുകൾക്ക് അന്ത്യശാസനം നൽകി.അല്ലാത്തപക്ഷം സർക്കാർ തന്നെ ശമ്പളം നിശ്ചയിച്ച് വിജ്ഞാപനം പുറത്തിറക്കുമെന്നും അറിയിച്ചിട്ടുണ്ട്.സമരം ചെയ്യുന്ന നഴ്സുമാരുടെ പ്രതിനിധികൾ,ആശുപത്രി മാനേജ്മെന്റുകൾ എന്നിവരുമായി തൊഴിൽ,ആരോഗ്യ വകുപ്പ് മന്ത്രിമാരാണ് ഇന്ന് ചർച്ച നടത്തിയത്.ഉച്ചയ്ക്ക് ശേഷം നടന്ന ചർച്ചയിൽ രണ്ടു മണിക്കൂറോളം തൊഴിൽ,ആരോഗ്യ വകുപ്പ് മന്ത്രിമാർ പങ്കെടുത്തു.തുടർന്ന് ഉദ്യോഗസ്ഥരും ആശുപത്രി മാനേജ്‌മെന്റുകളും തമ്മിൽ മിനിമം വേതനം സംബന്ധിച്ച് ചർച്ച നടത്തുകയാണിപ്പോൾ.ഇതിൽ തീരുമാനമായ ശേഷം മന്ത്രിമാരുടെ സാന്നിധ്യത്തിൽ വീണ്ടും ചർച്ച നടത്തും.മാനേജ്മെന്റുകൾ ധാരണ ഉണ്ടാക്കിയില്ലെങ്കിൽ സർക്കാർ മുൻകയ്യെടുത്ത് വിജ്ഞാപനം പുറത്തിറക്കുമെന്നും അറിയിച്ചിട്ടുണ്ട്.
കോഴിക്കോട് :കോഴിക്കോട് മുക്കത്ത് നാലുവയസ്സുകാരിക്ക് പിതാവിന്റെ ക്രൂര മർദനം.നാല് ദിവസം മുൻപാണ് കുട്ടിക്ക് മർദനമേറ്റത്.കട്ടിൽ കേടാക്കി എന്നുപറഞ്ഞു ഇരുമ്പു വടിഉപയോഗിച്ച് കുട്ടിയെ ക്രൂരമായി ഉപദ്രവിക്കുകയായിരുന്നു.ശരീരത്തിൽ നിരവധി മുറിവുകളോടെ കുട്ടി മുക്കം പ്രാഥമികാരോഗ്യ കേന്ദ്രത്തിൽ ചികിത്സയിലാണ്.ഉടൻ തന്നെ കുട്ടിയെ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റുമെന്ന് അധികൃതർ അറിയിച്ചു.സംഭവത്തിൽ കുട്ടിയുടെ പിതാവിനെ പോലീസ് അറസ്റ്റ് ചെയ്തു.എന്നാൽ സംഭവത്തെ കുറിച്ച് യാതൊന്നും അറിയില്ലെന്നാണ് കുട്ടിയുടെ മാതാവ് പൊലീസിന് മൊഴി നൽകിയിരിക്കുന്നത്.
തിരുവനന്തപുരം:സംസ്ഥാനത്തെ പെട്രോൾ പമ്പുകൾ ഇന്ന് അർധരാത്രി മുതൽ അടച്ചിടും. പെട്രോൾ ഉൽപ്പന്നങ്ങളുടെ വിലമാറ്റത്തിൽ സുതാര്യത ഉറപ്പാക്കണം എന്നാവശ്യപ്പെട്ടാണ് സമരം. പെട്രോളിയം ഡീലേഴ്‌സ് കോഓർഡിനേഷൻ കമ്മിറ്റിയുടെ ആഭിമുഖ്യത്തിൽ പമ്പുകൾ അടച്ചിട്ട് 24 മണിക്കൂറാണ് സമരം നടത്തുന്നത്.
പാലക്കാട്:കോഴിയിറച്ചി കിലോയ്ക്ക് 87 രൂപയ്ക്ക് വിൽക്കണമെന്ന സർക്കാർ നിർദേശത്തിൽ പ്രതിഷേധിച്ച് സമരം ചെയ്യുന്ന വ്യാപാരികൾ കോഴികളെ തമിഴ്‌നാട്ടിലേക്ക് കടത്തുന്നു.തിങ്കളാഴ്ച മുതൽ കോഴി വ്യാപാരികൾ കടകളടച്ച് സമരം ആരംഭിച്ചതോടെയാണ് കോഴികളെ തമിഴ്‌നാട്ടിലേക്ക് കടത്തുന്നത്.നിലവിലുള്ള മൊത്തം കോഴികളെയും തമിഴ്‌നാട്ടിൽ വിൽക്കാനാണ് വ്യാപാരികളുടെ തീരുമാനം.87 രൂപയ്ക്കു വിൽപ്പന നടത്താനാകില്ല എന്ന നിലപാടിൽ ഉറച്ചു നിൽക്കുകയാണ് കോഴിവ്യാപാരികൾ.ഇന്നലെ രാത്രിമുതലാണ് തൃശൂർ,പാലക്കാട് ജില്ലകളിൽ നിന്നും തമിഴ്‌നാട്ടിലെ പൊള്ളാച്ചി,നാമക്കൽ എന്നിവിടങ്ങളിലേക്ക് കോഴികളെ കൊണ്ടുപോയത്.തമിഴ്‌നാട്ടിലെ ഫാമുകളിൽ ഉത്പാദനം കുറഞ്ഞതോടെയാണ് കേരളത്തിൽ നിന്നുള്ള കോഴികൾക്ക് അവിടെ ഡിമാൻഡ് കൂടിയത്.കേരളത്തിൽ നിന്നും കൊണ്ടുവരുന്ന കോഴികൾ കിലോയ്ക്ക് 110 രൂപ വരെ നൽകിയാണ് തമിഴ്‌നാട്ടിലെ വ്യാപാരികൾ വാങ്ങുന്നത്.കിലോയ്ക്ക് 150-170 രൂപയ്ക്കാണ് തമിഴ്‌നാട്ടിൽ ചില്ലറവിൽപ്പന നടക്കുന്നത്. കേരളത്തിൽ ഉല്പാദന ചെലവ് കൂടിയെന്നാണ് വ്യാപാരികൾ പറയുന്നത്. നിലവിൽ 85 രൂപയാണ് ഉല്പാദന ചെലവ്.അതിനാൽ 87 രൂപയ്ക്കു വിൽപ്പന സാധിക്കില്ലെന്നും അടിസ്ഥാനവില 100 രൂപയെങ്കിലും ആക്കണമെന്നാണ് വ്യാപാരികളുടെ ആവശ്യം.
കാഞ്ഞങ്ങാട്:ദമ്പതികളെ വീട്ടിനുള്ളിൽ വിഷം കഴിച്ചു മരിച്ചനിലയിൽ കണ്ടെത്തി.കോളിച്ചാൽ എരിഞ്ഞിലംകോട് ഭജനമഠത്തിനു സമീപത്തെ ദിവാകരന്റെ മകൻ സുനിൽ(32),ഭാര്യ ജയലക്ഷ്മി(27) എന്നിവരെയാണ് മരിച്ച നിലയിൽ കണ്ടെത്തിയത്.കടബാധ്യതയെ തുടർന്നാണ് ദമ്പതികൾ ആത്മഹത്യ ചെയ്തതെന്ന് സംശയിക്കുന്നതായി പോലീസ് പറഞ്ഞു.ദമ്പതികൾ മരിച്ചു കിടക്കുന്ന വിവരം ആറു വയസ്സുകാരനായ മകൻ ദേവാനന്ദ് ആണ് അയൽവാസികളെ അറിയിക്കുന്നത്. തുടർന്ന് അയൽവാസികളെത്തി പോലീസിൽ വിവരമറിയിക്കുകയായിരുന്നു. മൃതദേഹത്തിന് സമീപത്തുവെച്ച് വിഷക്കുപ്പികൾ പോലീസ് കണ്ടെടുത്തു.ഒൻപതു വർഷം മുൻപാണ് ഇവരുടെ വിവാഹം കഴിഞ്ഞത്. ദമ്പതികളും കുട്ടിയും മാത്രമായിരുന്നു വീട്ടിൽ താമസം.ട്രാവൽ ഏജൻസിയിൽ ജോലിക്കാരനായിരുന്നു സുനിൽ.