മൂന്നാർ:മൂന്നാർ കയ്യേറ്റം സംബന്ധിച്ച് തെറ്റായ റിപ്പോർട് സമർപ്പിച്ചതിനെ തുടർന്ന് സ്പെഷ്യൽ തഹസിൽദാരെ കലക്റ്റർ സസ്‌പെൻഡ് ചെയ്തു.കെ.എസ് ജോസഫിനെയാണ് സസ്‌പെൻഡ് ചെയ്തത്.സ്പെഷ്യൽ തഹസിൽദാർ കെ.എസ് ജോസെഫിനെയാണ് കയ്യേറ്റങ്ങൾ ഒഴിപ്പിക്കുന്നതിന്റെ ചുമതല നൽകിയിരുന്നത്.കയ്യേറ്റം ഒഴിപ്പിക്കാതെ സ്ഥലം ഒഴിപ്പിച്ചെന്നു റിപ്പോർട് സമർപ്പിച്ചതിനെ തുടർന്നാണ് തഹസിൽദാർക്കെതിരെ നടപടി സ്വീകരിച്ചത്.
ന്യൂഡൽഹി:ഉപരാഷ്ട്രപതി തിരഞ്ഞെടുപ്പ് വോട്ടെടുപ്പ് പൂർത്തിയായി.771 എം പി മാർ വോട്ട് ചെയ്തു.മുസ്ലിം ലീഗിന്റെ രണ്ടു എം പിമാരുൾപ്പെടെ പതിനാലുപേർക്കു വോട്ടു ചെയ്യാനായില്ല.മുസ്ലിം ലീഗിന്റെ പി.കെ കുഞ്ഞാലിക്കുട്ടിക്കും അബ്ദുൽ വഹാബിനുമാണ് വോട്ടു ചെയ്യാൻ സാധിക്കാഞ്ഞത്.വോട്ടിങ് സമയം കഴിഞ്ഞാണ് ഇവർ പാർലിമെന്റിൽ എത്തിയത്.
തിരുവനന്തപുരം:ബീഫ് കൈവശം വെച്ചു എന്നാരോപിച്ചു അക്രമികൾ ഓടുന്ന തീവണ്ടിയിലിട്ട് മർദിച്ചു കൊന്ന ഹരിയാന സ്വദേശിയും മദ്രസ വിദ്യാർത്ഥിയുമായ ജുനൈദിന്റെ കുടുംബത്തിന് പത്തുലക്ഷം രൂപ നൽകാൻ സിപിഎം സംസ്ഥാന കമ്മിറ്റി തീരുമാനം.കഴിഞ്ഞ ദിവസം ഡൽഹിയിൽ എത്തിയ മുഖ്യമന്ത്രി പിണറായി വിജയനെ ജുനൈദിന്റെ മാതാപിതാക്കളും കുടുംബാംഗങ്ങളും സന്ദർശിച്ചിരുന്നു.രാജ്യത്തെ മതനിരപേക്ഷ സമൂഹം എന്നും പിന്തുണയുമായി കൂടെയുണ്ടാകുമെന്നു മുഖ്യമന്ത്രി പറഞ്ഞു.പാർട്ടി കേന്ദ്ര കമ്മിറ്റി വഴിയാകും തുക ജുനൈദിന്റെ കുടുംബത്തിന് കൈമാറുക.
കൊച്ചി:നടൻ ദിലീപിന്റെ ഉടമസ്ഥതയിലുള്ള ഡി സിനിമാസ് പൂട്ടിയതിനെതിരെ തീയേറ്റർ ഉടമകളുടെ സംഘടനയായ ഫിയോക് നിയമനടപടിക്ക്.തീയേറ്ററിൽ ജനറേറ്റർ പ്രവർത്തിപ്പിക്കാൻ അനുമതിയില്ലെന്നു ആരോപിച്ചാണ് തീയേറ്റർ അടച്ചു പൂട്ടാൻ തീരുമാനിച്ചത്.എന്നാൽ ഡി സിനിമാസിന് 2017 ഡിസംബർ വരെ പ്രവർത്തിക്കാൻ അനുമതിയുണ്ടെന്ന് തീയേറ്റർ ഉടമകളുടെ സംഘടന വ്യക്തമാക്കി.വിജിലെൻസ് അന്വേഷണം തീരുന്നതു വരെ തീയേറ്റർ പ്രവർത്തിപ്പിക്കരുതെന്നാണ് നിർദേശം.ചാലക്കുടി നഗരസഭാ കൌൺസിൽ ഏകകണ്ഠമായാണ് തീരുമാനമെടുത്തത്.നിർമാണാനുമതി നൽകിയതിൽ ക്രമക്കേടുണ്ടെന്ന് നഗരസഭാ അംഗങ്ങൾ പറഞ്ഞിരുന്നു.
കോഴിക്കോട്:വയനാട് ചുരത്തിന്റെ അടിവാരത്തു നിയന്ത്രണം വിട്ട ബസ് ജീപ്പിലും കാറിലുമിടിച്ചു ആറുപേർ മരിച്ചു.കോഴിക്കോടുനിന്നും സുൽത്താൻ ബത്തേരിയിലേക്കു പോവുകയായിരുന്ന രാജഹംസം ബസാണ് കൈതപ്പൊയിൽ അപകടത്തിൽപെട്ടത്.ഉച്ചയ്ക്ക് 2.30 ഓടെ ആയിരുന്നു സംഭവം.മരിച്ചവരിൽ മൂന്നുപേർ കുട്ടികളാണ്.വയനാട്ടിൽ നിന്നും വരികയായിരുന്ന കാറിൽ ബസ് ഇടിക്കുകയും തുടർന്ന് നിയന്ത്രണം വിട്ട ബസ് ജീപ്പ് ഇടിച്ചു തകർക്കുകയും ആയിരുന്നു.മൃതദേഹങ്ങൾ കൈതപ്പൊയിലിലെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്.അപകടത്തിൽ നിരവധിപേർക്ക് പരിക്കേറ്റിട്ടുണ്ട്.ഇവരെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിട്ടുണ്ട്.ജീപ്പ് ഡ്രൈവർ വടുവഞ്ചാൽ സ്വദേശി പ്രമോദ്,കൊടുവള്ളി സ്വദേശികളായ ആയിഷ,ലൂഹ,മുഹമ്മദ് നിഷാൽ, ജിഷ,ഫാത്തിമ എന്നിവരാണ് മരിച്ചത്.ജീപ്പിലുണ്ടായിരുന്നവരാണ് മരിച്ചവരിലേറെയും.
ആലുവ: നടിയെ ആക്രമിച്ച കേസില്‍ സംവിധായകനും നടനുമായ നാദിര്‍ഷായുടെ സഹോദരന്‍ സമദിനെ അന്വേഷണ സംഘം ആലുവ പോലീസ് ക്ലബ്ബിലേക്ക് വിളിപ്പിച്ചു. ദിലീപിന്റെ സ്‌റ്റേജ് ഷോകളിലും സിനിമകളിലും സജീവ സാന്നിദ്ധ്യമാണ് ഗായകന്‍ കൂടിയായ സമദ്. ഈ സാഹചര്യത്തിലാണ് അന്വേഷണ സംഘം ഇദ്ദേഹത്തെ ചോദ്യം ചെയ്യുന്നത്.അന്വേഷണ ഉദ്യോഗസ്ഥനായ സി.ഐ ബൈജു.കെ.പൗലോസും ചോദ്യം ചെയ്യലിന് എത്തിയിട്ടുണ്ട്.ഒരുമാസത്തിനുള്ളില്‍ കേസില്‍ കുറ്റപത്രം സമര്‍പ്പിക്കാനുള്ള തയ്യാറെടുപ്പിലാണ് അന്വേഷണ സംഘം. നടന്‍ ദിലീപ് ജാമ്യത്തിന് വീണ്ടും ഹൈക്കോടതിയെ സമീപിപ്പിക്കാനൊരുങ്ങുന്ന സാഹചര്യത്തിലാണ് കുറ്റപത്രം ഉടന്‍ തയ്യാറാക്കാന്‍ ഒരുങ്ങുന്നത്.
ഡൽഹി:ജി.എസ്.ടി കൌണ്‍സില്‍ യോഗം ഇന്ന് ദല്‍ഹിയില്‍ ചേരും. ജി.എസ്.ടി നടപ്പിലാക്കിയ ശേഷമുള്ള ഒരു മാസത്തെ അവലോകനം ഇന്നത്തെ യോഗത്തില്‍ നടക്കും.നികുതി കുറഞ്ഞ ഉല്‍പ്പന്നങ്ങളുടെ വിലക്കുറവിന്‍റെ ആനുകൂല്യം ഉപഭോക്താക്കള്‍ക്ക് കിട്ടാന്‍ ലാഭവിരുദ്ധ ചട്ടത്തിന് യോഗം രൂപം നല്‍കും. കൊള്ളലാഭം എടുക്കുന്നവര്‍ക്കെതിരെ നിയമനടപടി സ്വീകരിക്കാനുള്ള വ്യവസ്ഥയും ചട്ടത്തിലുണ്ടാകും. ഉപയോഗശൂന്യമായ ഉത്പന്നങ്ങള്‍, ഹോട്ടല്‍ ഉള്‍പ്പടെയുള്ളവയുടെ നികുതി നിരക്ക് കുറയ്ക്കണമെന്ന് കേരളം യോഗത്തില്‍ ആവശ്യപ്പെടും.
തിരുവനന്തപുരം:വിദ്യാർത്ഥികളുടെ കൺസെഷൻ കാർഡിന്റെ നിരക്ക് കെ.എസ്.ആർ.ടി.സി കുത്തനെ കൂട്ടി.10 രൂപ നിരക്കിൽ നൽകിയിരുന്ന കാർഡിന്100 രൂപയാക്കി.കെ.എസ്.ആർ.ടി.സി ഉത്തരവ് എല്ലാ ഡിപ്പോകളിലും നടപ്പാക്കി തുടങ്ങി.കാർഡ് നിരക്ക് കൂട്ടിയ തീരുമാനം ഡയറക്റ്റർ ബോർഡിന്റേതാണെന്നു കെ.എസ്.ആർ.ടി.സി വ്യക്തമാക്കി.വിദ്യാർത്ഥികൾക്ക് സൗജന്യം നൽകുന്നതിലൂടെ പ്രതിവർഷം 105 കോടിയുടെ നഷ്ടമാണ് കണക്കാക്കുന്നത്.നേരത്തെ രണ്ടു രൂപയായിരുന്ന കാർഡിന് 10 രൂപയായി ഉയർത്തുകയായിരുന്നു.വിദ്യാർഥികൾ സൗജന്യ യാത്ര നടത്തുന്നതാണ് കെ.എസ്.ആർ.ടി.സി നഷ്ടത്തിലേക്ക് കൂപ്പുകുത്താൻ പ്രധാന കാരണമെന്നു ഗതാഗത വകുപ്പ് സെക്രെട്ടറി എം.ഡിയായിരുന്ന രാജമാണിക്യം നേരത്തെ കത്തയച്ചിരുന്നു.
തിരുവനന്തപുരം:മിസോറാം ലോട്ടറിയുടെ വിൽപ്പന കേരളത്തിൽ നിർത്തുമെന്ന മിസോറാം ധനമന്ത്രിയുടെ പ്രസ്താവന സ്വാഗതാർഹമാണെന്ന് ധനമന്ത്രി ഐസക്.ജി.എസ്.ടി യോഗത്തിനിടെ മിസോറാം ധനമന്ത്രിയെ കണ്ടു നന്ദി അറിയിക്കുമെന്നും അദ്ദേഹം പറഞ്ഞു.എന്നാൽ മിസോറാം ലോട്ടറി നിർത്തുന്നതിനെ കുറിച്ച് ഔദ്യോഗികമായി അറിയിപ്പ് കിട്ടിയിട്ടില്ലെന്നും തോമസ് ഐസക് വ്യക്തമാക്കി.മിസോറാം ലോട്ടറി നിരോധിക്കണമെന്ന് ആവശ്യപ്പെട്ട് കേന്ദ്ര ആഭ്യന്തര മന്ത്രിക്ക് തോമസ് ഐസക് കഴിഞ്ഞ ദിവസം കത്തയച്ചിരുന്നു.ബാർകോഡ് പോലുള്ള സുരക്ഷാ മാനദണ്ഡങ്ങൾ പാലിക്കാതെയാണ് ടിക്കറ്റുകൾ അച്ചടിച്ചിരിക്കുന്നതെന്നു സി.എ.ജി കണ്ടെത്തിയിരുന്നു.ഈ റിപ്പോർട്ടിന്റെ അടിസ്ഥാനത്തിലാണ് കേന്ദ്രത്തിനു കത്തയച്ചത്.
ഇരിട്ടി:പെരുമ്പാടി തടാകം പൊട്ടി ഒലിച്ചുപോയ തലശ്ശേരി–കുടക് സംസ്ഥാനാന്തര പാതയുടെ ഭാഗം പൂർണമായും പുനർനിർമിച്ചു. ഇതോടെ വലിയ വാഹനങ്ങളും കടത്തിവിട്ടുതുടങ്ങി. സംസ്ഥാനാന്തര യാത്രക്കാരും കുടക് മലയാളികളും 15 ദിവസമായി അനുഭവിക്കുന്ന കടുത്ത യാത്രാ ദുരിതത്തിന് അറുതിയായി.ഇന്നലെ വൈകിട്ട് നാലോടെയാണ് പുനർനിർമാണം അംഗീകരിച്ച് കുടക് ഡപ്യൂട്ടി കമ്മിഷണർ (കലക്ടർ) വിൻസന്റ് ഡിസൂസ സംസ്ഥാനാന്തര പാതയിൽ വലിയ വാഹനങ്ങളും കടത്തിവിടാൻ അനുമതി നൽകിയത്. വ്യാഴാഴ്ച വൈകിട്ടോടെ നിർമാണം പൂർത്തീകരിച്ച് വീരാജ്പേട്ട അസിസ്റ്റന്റ് എക്സിക്യൂട്ടീവ് എൻജിനീയർ എം.ഇ.സുരേഷ് റിപ്പോർട്ട് സമർപ്പിച്ചിരുന്നു. ടൂറിസ്റ്റ് ബസുകളും ലോറികളും ഉൾപ്പെടെ എല്ലാവിധ വാഹനങ്ങളും കടത്തിവിടുമെങ്കിലും 30 ടണ്ണിനു മുകളിലുള്ള വാഹനങ്ങൾക്ക് അനുമതി ഇല്ല.ആദ്യഘട്ട നിർമാണം പൂർത്തീകരിച്ച് ഞായറാഴ്ച മുതൽ തന്നെ ചെറുകിട വാഹനങ്ങൾ കടത്തിവിട്ടിരുന്നു. മാസങ്ങൾ എടുത്താലും പുനർനിർമാണം യാഥാർഥ്യമാകില്ലെന്ന വിലയിരുത്തലുകൾക്കിടയിലാണ് കർണാടക സർക്കാരും കുടക് ജില്ലാ ഭരണകൂടവും മരാമത്ത് അധികൃതരും മാതൃകയായ പ്രവർത്തനത്തിലൂടെ 15 ദിവസത്തിനുള്ളിൽ നിർമാണം പൂർണ തോതിൽ പൂർത്തീകരിച്ചത്.