Full Grid

മട്ടന്നൂർ:മട്ടന്നൂർ നഗരസഭാ ചെയർപേഴ്‌സണായി അനിത വേണുവിനെ തിരഞ്ഞെടുത്തു. പി.പുരുഷോത്തമൻ ഉപാധ്യക്ഷനാകും.ആകെയുള്ള 35 വോട്ടിൽ 28 വോട്ടും നേടിയാണ് ഇരുവരും തിരഞ്ഞെടുക്കപ്പെട്ടത്.നെല്ലൂന്നി വാർഡിൽ നിന്നാണ് അനിത തിരഞ്ഞെടുക്കപ്പെട്ടത്.സിപിഎം നെല്ലൂന്നി നോർത്ത് ബ്രാഞ്ച് അംഗവും മഹിളാ അസോസിയേഷൻ പഴശ്ശി നോർത്ത് വില്ലേജ് കമ്മിറ്റി അംഗവുമാണ് അനിത വേണു.മുൻ നഗരസഭാ കൗൺസിലിലെ പൊതുമരാമത്തു സ്ഥിരം സമിതി അധ്യക്ഷയുമായിരുന്നു.വൈസ് ചെയർമാനായ പി.പുരുഷോത്തമൻ സിപിഎം ജില്ലാ കമ്മിറ്റിയംഗവും പരിയാരം മെഡിക്കൽ കോളേജ് വൈസ് ചെയര്മാനുമാണ്.പുതുതായി രൂപീകരിച്ച എയർപോർട്ട് വാർഡിൽ നിന്നാണ് ഇദ്ദേഹം വിജയിച്ചത്.റെയ്ഡ്കോ ഡയറക്റ്ററായി പ്രവർത്തിച്ചുവരുന്ന ഇദ്ദേഹം ദീർഘകാലം സിപിഎം മട്ടന്നൂർ ഏരിയ സെക്രട്ടറിയായിരുന്നു. വരണാധികാരിയായ ഡിഎഫ്ഒ സുനിൽ പാമിഡിയാണ് അനിത വേണുവിന് സത്യവാചകം ചൊല്ലിക്കൊടുത്തത്.തുടർന്ന് അനിത വേണു ഉപാധ്യക്ഷൻ പി.പുരുഷോത്തമന് സത്യവാചകം ചൊല്ലിക്കൊടുത്തു.സിപിഎം ജില്ലാ സെക്രെട്ടറി പി.ജയരാജൻ,എൻ.വി ചന്ദ്രബാബു തുടങ്ങിയ നേതാക്കൾ നഗരസഭാ ഓഫീസിലെത്തിയിരുന്നു.

കൊച്ചി:ഫോർട്ട് കൊച്ചിയിൽ മൽസ്യബന്ധന ബോട്ട് മറിഞ്ഞു.ഇന്ന് പുലർച്ചെ മൂന്നരമണിയോടെയായിരുന്നു അപകടം നടന്നത്.ബോട്ടിൽ പത്ത് തൊഴിലാളികളായിരുന്നു ഉണ്ടായിരുന്നത്.ഇവരെ മറൈൻ എൻഫോഴ്‌സ്‌മെന്റ് രക്ഷപ്പെടുത്തി.രക്ഷപ്പെട്ടവർ തമിഴ്‌നാട് കന്യാകുമാരി സ്വദേശികളാണ്.തീരത്തു നിന്നും വളരെ അടുത്തായാണ് ബോട്ട് മുങ്ങിയത്.അതിനാൽ വൻ ദുരന്തം ഒഴിവായതായി അധികൃതർ അറിയിച്ചു.

ന്യൂഡൽഹി:ഒക്ടോബർ രണ്ടു വരെ രാജ്യത്ത് സംഘടിപ്പിക്കുന്ന ശുചിത്വ പ്രചാരണ പരിപാടികളുമായി ബന്ധപ്പെട്ട് നടൻ മോഹൻലാലിന് പ്രധാനമന്ത്രി നരേന്ദ്ര മോദിയുടെ കത്ത്.സെപ്റ്റംബർ പതിനഞ്ചിന് ആരംഭിച്ച് രണ്ടാഴ്ച നീളുന്ന ശുചിത്വ പ്രചാരണ പരിപാടിക്ക് പിന്തുണ തേടിയാണ് മോഡി കത്തയച്ചത്.മഹാത്മാഗാന്ധിയുടെ ഹൃദയത്തോട് ചേർന്ന് നിന്നിരുന്ന ‘സ്വച്ഛത’ പദ്ധതിയുമായി ബന്ധപ്പെട്ടാണ് താൻ ഇതെഴുതുന്നതെന്ന വാക്കുകളോടെയാണ് കത്തിന്റെ തുടക്കം. വിവിധ വിഭാഗങ്ങളുടെ കൂട്ടായ്മ്മയിലൂടെ മാത്രമേ രാജ്യത്തിന് വൃത്തി സാധ്യമാകൂ എന്നായിരുന്നു ഗാന്ധിജിയുടെ വിശ്വാസം.ഓരോരുത്തരും തങ്ങളുടെ ഉത്തരവാദിത്വ ബോധം പുതുക്കേണ്ടതുണ്ട്.ഗാന്ധി ജയന്തി വരെ രാജ്യമൊട്ടുക്ക് പ്രചാരണ പരിപാടികൾ നടത്താനാണ്‌ തീരുമാനം.വൃത്തിഹീനമായ ചുറ്റുപാട് രാജ്യത്തെ ദുർബല വിഭാഗത്തെയാണ് ഏറ്റവും ബാധിക്കുക.അവർക്കു വേണ്ടി നമുക്ക് ചെയ്യാവുന്ന ഏറ്റവും മഹിമയുള്ള സേവനം ശുചിത്വമുള്ള ചുറ്റുപാട് സമ്മാനിക്കുകയാണ്.വൻതോതിലുള്ള മാറ്റം കൊണ്ടുവരുന്നതിന് സിനിമയ്ക്ക് സാധിക്കും.ഏറെ ആരാധകരുള്ള നടനെന്ന നിലയ്ക്ക് മോഹൻലാലിന് ജനങ്ങളുടെ ജീവിതത്തിൽ ക്രിയാത്മകമായ മാറ്റങ്ങൾ കൊണ്ടുവരാനാകുമെന്നും കത്തിൽ പറയുന്നു.

ചട്ടഞ്ചാൽ:ചട്ടഞ്ചാൽ ടൗണിൽ നിർത്തിയിട്ട കണ്ടൈനർ ലോറിക്ക് പിന്നിൽ സ്വകാര്യ ബസിടിച്ച് നിരവധിപേർക്ക് പരിക്ക്.ബന്തടുക്കയിൽ നിന്നും കാസർകോഡ് ഭാഗത്തേക്ക് വരികയായിരുന്ന അക്ഷയ ബസാണ് ലോറിയിലിടിച്ചത്.ഡ്രൈവർക്കും ബസിന്റെ മുന്നിലിരുന്ന ഏതാനും പേർക്കും പരിക്കേറ്റിട്ടുണ്ട്.പരിക്കേറ്റവരെ ചെങ്കള നായനാർ ആശുപത്രിയിലും കാസർകോട്ടെ കെയർ വെൽ ആശുപത്രികളിലുമായി പ്രവശിപ്പിച്ചു.ബസ് മറ്റൊരു വാഹനത്തെ ഓവർടേക്ക് ചെയ്യുന്നതിനിടെ എതിരെ വന്ന വാഹനവുമായി കൂട്ടിയിടിക്കാതിരിക്കാൻ വെട്ടിച്ചപ്പോഴാണ് നിർത്തിയിട്ടിരുന്ന കണ്ടൈനർ ലോറിക്ക് പിന്നിലിടിച്ചത്.