Full Grid

കൊച്ചി:എറണാകുളം  കൊച്ചുകടവന്ത്രയിലെ ചിലവന്നൂർ കായൽ കയ്യേറി നടൻ ജയസൂര്യ ബോട്ടുജെട്ടിയും ചുറ്റുമതിലും നിർമിച്ചെന്ന പരാതിയിൽ വിജിലൻസ് കുറ്റപത്രം സമർപ്പിച്ചു. കായൽ തീരത്തെ നിർമാണ പ്രവർത്തനത്തിൽ തീരദേശനിയമവും കെട്ടിടനിർമാണ ചട്ടവും ലംഘിച്ചെന്ന് കണ്ടെത്തിയതോടെയാണ് കുറ്റപത്രം സമർപ്പിച്ചിരിക്കുന്നത്. ഇതോടെ കേസിൽ ജയസൂര്യ പ്രതിയാകും. നിർമാണ പ്രവർത്തനത്തിന് അനുമതി നൽകിയ കോർപറേഷൻ ഉദ്യോഗസ്ഥരെയും വിജിലൻസ് പ്രതിപ്പട്ടികയിൽ ഉൾപ്പെടുത്തിയിട്ടുണ്ട്.കളമശേരി സ്വദേശി ഗിരീഷ് ബാബു നൽകിയ പരാതിയിലാണ് മൂവാറ്റുപുഴ വിജിലൻസ് കോടതി ജയസൂര്യയ്ക്കെതിരേ അന്വേഷണം പ്രഖ്യാപിച്ചത്. കടവന്ത്രയിലെ ജയസൂര്യയുടെ വീടിന് സമീപം ബോട്ടുജെട്ടി നിർമിച്ചതും ചുറ്റുമതിൽ കെട്ടിയതും കായൽ പുറമ്പോക്ക് ഭൂമി കൈയേറിയാണെന്നായിരുന്നു പരാതിക്കാരന്‍റെ ആരോപണം. 3.7 സെന്‍റ് സ്ഥലമാണ് ഇത്തരത്തിൽ നടൻ കൈയേറിയത്. അന്വേഷണം പൂർത്തിയാക്കിയ വിജിലൻസ് സംഘം രണ്ടു ദിവസംമുൻപ്  മൂവാറ്റുപുഴ വിജിലൻസ് കോടതിയിൽ റിപ്പോർട്ട് സമർപ്പിച്ചു.ഒരു മാസത്തിനകം വിജിലൻസ് ഡയറക്ടർക്ക് റിപ്പോർട്ട് കൈമാറുമെന്നും അന്വേഷണം സംഘം കോടതിയെ അറിയിച്ചു. വിജിലൻസ് റിപ്പോർട്ട് കോടതി പിന്നീട് പരിശോധിക്കും.

തിരുവനന്തപുരം: കേരളത്തിൽ ലോട്ടറി വിൽപ്പനയ്ക്കില്ലെന്ന് മിസോറാം സർക്കാർ. ചീഫ് സെക്രട്ടറിയെ മിസോറാം സർക്കാർ ഇത് സംബന്ധിച്ചുള്ള നിലപാട് അറിയിച്ചു. മിസോറാം ലോട്ടറി അച്ചടി സംബന്ധിച്ച് ഗുരുതരമായ കണ്ടെത്തലുകളുള്ള സിഎജി റിപ്പോർട്ടിന്‍റെ അടിസ്ഥാനത്തിൽ മിസോറാം ലോട്ടറി നിരോധിക്കണമെന്ന് ആവശ്യപ്പെട്ട് നേരത്തെ കേന്ദ്രസർക്കാരിന് കേരളം കത്തു നൽകിയിരുന്നു.ബാർ കോഡ് പോലുള്ള സുരക്ഷാ മാനദണ്ഡങ്ങൾ പാലിക്കാതെയാണ് ടിക്കറ്റുകൾ അച്ചടിച്ചിരിക്കുന്നതെന്നും റിപ്പോർട്ടിൽ ചൂണ്ടിക്കാട്ടിയിരുന്നു.മിസോറാം സർക്കാരും ടീസ്റ്റാ ഡിസ്ട്രിബ്യൂട്ടേഴ്സും തമ്മിലുണ്ടാക്കിയ കരാർ നിയമവിരുദ്ധമാണെന്നും കേരളം ആരോപിച്ചിരുന്നു.

മലപ്പുറം:വേങ്ങര ഉപതിരഞ്ഞെടുപ്പിൽ മുസ്ലിം ലീഗ് ജില്ലാ സെക്രട്ടറി  കെ.എൻ.എ ഖാദർ യു.ഡി.എഫ് സ്ഥാനാർത്ഥിയാകും.ഇന്ന് രാവിലെ പാണക്കാട് ചേർന്ന പാർലമെന്ററി യോഗത്തിനു ശേഷമാണ് ശിഹാബ് തങ്ങൾ സ്ഥാനാർത്ഥിയെ പ്രഖ്യാപിച്ചത്.അഡ്വ.യു.എ ലത്തീഫ് ആകും യു.ഡി.എഫ് സ്ഥാനാർത്ഥിയെന്ന് നേരത്തെ റിപ്പോർട് ഉണ്ടായിരുന്നു.യു.എ ലത്തീഫിന് ഇപ്പോൾ ഖാദർ വഹിച്ചിരുന്ന മലപ്പുറം ജില്ലാ സെക്രട്ടറി ചുമതല നൽകി.ലത്തീഫിനെ സ്ഥാനാർത്ഥിയായി തീരുമാനിച്ചതോടെ കെ.എൻ എ ഖാദർ പ്രതിഷേധവുമായി പാണക്കാട്ട് എത്തിയിരുന്നു.യു.എ ലത്തീഫിന് വേണ്ടി പി.കെ കുഞ്ഞാലിക്കുട്ടിയും ശക്തമായ വാദവുമായി രംഗത്ത് എത്തിയിരുന്നെങ്കിലും ഫലമുണ്ടായില്ല.