Full Grid

കൊച്ചി:നടി ആക്രമിക്കപ്പെട്ട കേസുമായി ബന്ധപ്പെട്ട് കാവ്യാ മാധവൻ സമർപ്പിച്ച മുൻകൂർ ജാമ്യാപേക്ഷയിൽ ഹൈക്കോടതി തീർപ്പാക്കി.കാവ്യയുടെ അറസ്റ്റിനു സാധ്യതയില്ലാത്തതിനാൽ മുൻ‌കൂർ ജാമ്യാപേക്ഷയ്ക്ക് പ്രസക്തിയില്ലെന്ന് കോടതി വ്യക്തമാക്കി.കേസിൽ കാവ്യയെ പ്രതി ചേർത്തിട്ടില്ലെന്ന് പോലീസ് കോടതിയെ അറിയിച്ചു.അതേസമയം നാദിർഷായുടെ മുൻ‌കൂർ ജാമ്യാപേക്ഷ പരിഗണിക്കുന്നത് ഒക്ടോബർ നാലിലേക്ക് മാറ്റി.കേസിൽ അറസ്റ്റിലായി ജയിലിൽ കഴിയുന്ന ദിലീപിനെതിരെ മൊഴി നല്കാൻ അന്വേഷണ സംഘം  സമ്മർദ്ദം ചെലുത്തുന്നുവെന്നും തന്നെ പ്രതിയാക്കാൻ ശ്രമിക്കുന്നു എന്നുമുള്ള വാദവുമായാണ് നാദിർഷ മുൻ‌കൂർ ജാമ്യാപേക്ഷ സമർപ്പിച്ചത്.ഇതിനു പിന്നാലെ അന്വേഷണ ഉദ്യോഗസ്ഥർ  ഭീഷണിപ്പെടുത്തുന്നു എന്ന് കാണിച്ചു കാവ്യാമാധവനും മുൻ‌കൂർ ജാമ്യാപേക്ഷ സമർപ്പിക്കുകയായിരുന്നു.എന്നാൽ നിലവിൽ ഇരുവരെയും പ്രതിചേർക്കാൻ ഉദ്ദേശിക്കുന്നില്ലെന്ന് അന്വേഷണസംഘം കോടതിയെ അറിയിക്കുകയായിരുന്നു.

കണ്ണൂർ:കണ്ണൂരിൽ സി ജി എച് എസ് ഡിസ്‌പെൻസറി സ്ഥാപിക്കുന്നതിനെതിരെ തിരുവനന്തപുരം ലോബി.തിരുവനന്തപുരത്ത് പ്രവർത്തിക്കുന്ന മൂന്നു ഡിസ്പെൻസറികളിലൊന്ന് കണ്ണൂരിലേക്ക് മാറ്റാനുള്ള കേന്ദ്ര നീക്കത്തിനെതിരെയാണ് തിരുവനന്തപുരത്തു നിന്നും സമ്മർദ്ദമുണ്ടായത്.കേന്ദ്ര സർക്കാർ ജീവനക്കാർക്കും പെൻഷൻകാർക്കും കുടുംബാംഗങ്ങൾക്കും സൗജന്യ ചികിത്സ ലഭ്യമാക്കുന്നവയാണ് സി ജി എച് എസ് ഡിസ്‌പെൻസറി.ഇവിടെ മരുന്നുകളും സൗജന്യമായിരിക്കും. കേരളത്തിൽ അനുവദിച്ചിട്ടുള്ള മൂന്നു ഡിസ്പെൻസറികളും തിരുവനന്തപുരത്താണ് ഉള്ളത്.ഇതിലൊന്ന് കണ്ണൂരിലേക്ക് മാറ്റി സ്ഥാപിക്കണമെന്ന് കെ.കെ രാഗേഷ് എം.പി നേരത്തെ കേന്ദ്ര ആരോഗ്യമന്ത്രിയോട് ആവശ്യപ്പെട്ടിരുന്നു.ഈ ആവശ്യം പരിഗണിക്കാമെന്ന് മന്ത്രി ഉറപ്പുനൽകുകയും ചെയ്തിരുന്നു.ഈ നീക്കത്തിനെതിരെയാണ് തിരുവനന്തപുരത്ത്  നിന്നും എതിർപ്പുണ്ടായിരിക്കുന്നത്.ഡിസ്‌പെൻസറി കണ്ണൂരിൽ നിലവിൽ വന്നാൽ കണ്ണൂർ,കോഴിക്കോട്,കാസർകോഡ് എന്നിവിടങ്ങളിലുള്ള കേന്ദ്ര ഗവ.ജീവനക്കാർക്കും പെൻഷൻകാർക്കും ദീർഘയാത്ര ഒഴിവാക്കാനുള്ള അവസരം ലഭിക്കും.സൗജന്യ ചികിത്സ,മരുന്ന്,മൂന്നു കിലോമീറ്ററിനുള്ളിൽ വീട്ടിലെത്തിയുള്ള ചികിത്സ എന്നിവയും ഡിസ്‌പെൻസറി നിലവിൽ വന്നാൽ ലഭ്യമാകും.

ചിറ്റാരിക്കാൽ:യുവതിയെ ചായയിൽ വിഷം കലർത്തി കൊലപ്പെടുത്താൻ ശ്രമം.സംഭവത്തിൽ യുവതിയുടെ ഭർതൃപിതാവിനെ പോലീസ് അറസ്റ്റ് ചെയ്തു.ലോഡിങ് തൊഴിലാളിയായ ചിറ്റാരിക്കാൽ മനോജിന്റെ ഭാര്യ പ്രസീദയുടെ പരാതിയിലാണ് പോലീസ് മനോജിന്റെ അച്ഛൻ നാരായണനെതിരെ കേസെടുത്തത്.ഈ മാസം 23 നാണ് സംഭവം നടന്നത്.പ്രഭാത ഭക്ഷണം കഴിച്ചുകൊണ്ടിരുന്ന പ്രസീത ചായ കുടിച്ചയുടനെ കുഴഞ്ഞു വീഴുകയായിരുന്നു.ഉടൻ തന്നെ മനോജ് പ്രസീതയെ ആശുപത്രിയിലെത്തിച്ചു.ആശുപത്രിയിൽ നടത്തിയ പരിശോധനയിലാണ് യുവതിയുടെ ശരീരത്തിൽ മാരകമായ വിഷം ചെന്നെത്തിയതായി തെളിഞ്ഞത്. ഗുരുതരാവസ്ഥയിലായ യുവതിയെ ഉടൻ തന്നെ പരിയാരം മെഡിക്കൽ കോളേജിലേക്ക് മാറ്റി.ബോധം വീണ്ടുകിട്ടിയ യുവതിയിൽ നിന്നും പോലീസ് മൊഴി രേഖപ്പെടുത്തി.ഭർതൃപിതാവ് താൻ കുടിച്ച ചായയിൽ വിഷം ചേർത്തതാണെന്നും ചായ കുടിച്ച മറ്റാർക്കും  കുഴപ്പമൊന്നുമില്ലായിരുന്നെന്നും ഇയാൾ തന്നെ മാനസികമായി പീഡിപ്പിക്കുകയും കൊല്ലുമെന്ന് ഭീഷണിപ്പെടുത്താറുണ്ടെന്നും യുവതി പൊലീസിന് മൊഴിനൽകി.തുടർന്നാണ് പോലീസ് നാരായണനെതിരെ കേസെടുത്തത്.