കണ്ണൂർ:ചൊവ്വ,ബുധൻ ദിവസങ്ങളിൽ റേഷൻ കടകൾ അടച്ചിട്ട് റേഷൻ വ്യാപാരികൾ പണിമുടക്കും.വേതന പാക്കേജ് ഉടൻ നടപ്പിലാക്കണമെന്നും റേഷൻ വിതരണത്തിലെ അഴിമതി അവസാനിപ്പിക്കാൻ റേഷൻ കടകളിൽ ഇ-പോസ് യന്ത്രം സ്ഥാപിച്ച് കംപ്യുട്ടർവൽക്കരണം നടപ്പിലാക്കണമെന്നും ആവശ്യപ്പെട്ടാണ് സമരം.ഓൾ കേരള റീറ്റെയ്ൽ റേഷൻ ഡീലേഴ്‌സ് അസോസിയേഷൻ,ഓൾ ഇന്ത്യ റേഷൻ ഡീലേഴ്‌സ് അസോസിയേഷൻ എന്നീ സംഘടനകളാണ് സമരത്തിന് ആഹ്വാനം നൽകിയിരിക്കുന്നത്.മുഖ്യമന്ത്രി വേതന പാക്കേജ് അംഗീകരിച്ചു എങ്കിലും ഭക്ഷ്യവകുപ്പ് നടപ്പിലാക്കാത്തതിൽ പ്രതിഷേധിച്ചാണ് സമരം.
ബെംഗളൂരു:പ്രമുഖ മാധ്യമ പ്രവർത്തക ഗൗരി ലങ്കേഷിന്റെ കൊലയാളികളെ സംബന്ധിച്ച് സൂചന ലഭിച്ചതായി കർണാടക ആഭ്യന്തര മന്ത്രി രാമലിംഗ റെഡ്ഢി പറഞ്ഞു.കൂടുതൽ വിവരങ്ങൾ വെളിപ്പെടുത്താൻ കഴിയില്ലെന്നും തെളിവുകൾ ശേഖരിച്ചു വരികയാണെന്നും അദ്ദേഹം പറഞ്ഞു.സെപ്റ്റംബർ ആറിനാണ് പ്രമുഖ മാധ്യമ പ്രവർത്തകയായ ഗൗരി ലങ്കേഷ് ബെംഗളൂരു രാജേശ്വരി നഗറിലെ വസതിയിൽ വെടിയേറ്റ് മരിച്ചത്.കേസുമായി ബന്ധപ്പെട്ട് ഗൗരിയുടെ സഹോദരൻ ഇന്ദ്രജിത് ലങ്കേഷിനെ പ്രത്യേക അന്വേഷണ സംഘം ചോദ്യം ചെയ്തിരുന്നു.ഗൗരിയും സഹോദരനും തമ്മിൽ സ്വത്തു തർക്കം നിലനിന്നിരുന്നുവെന്ന കണ്ടെത്തലിനെ തുടർന്നാണിത്.
മഞ്ചേശ്വരം:ഓടിക്കൊണ്ടിരുന്ന ട്രെയിനിന് നേരെയുണ്ടായ കല്ലേറിൽ യുവാവിന് പരിക്കേറ്റു. ഇന്നലെ വൈകുന്നേരം മംഗളൂരുവിൽ നിന്നും തിരുവനന്തപുരത്തേക്ക് പോവുകയായിരുന്ന മലബാർ എക്സ്പ്രസിന് നേരെയാണ് കല്ലേറുണ്ടായത്.കല്ലേറിൽ പരിക്കേറ്റ ട്രെയിൻ യാത്രക്കാരൻ കാസർകോഡ് കുഡ്‌ലു സ്വദേശി രാജേഷിനെ ആശുപത്രിയിൽ പ്രവേശിപ്പിച്ചു.രാജേഷിന്റെ പരാതിയിൽ കാസർകോഡ് റെയിൽവേ പോലീസ് കേസെടുത്തു.
കൊച്ചി:നടി ആക്രമിക്കപ്പെട്ട കേസിൽ നടൻ ദിലീപിനെതിരായ കുറ്റപത്രം വെള്ളിയാഴ്ച സമർപ്പിക്കും.ഈ മാസം എട്ടിന് ദിലീപ് അറസ്റ്റിലായി 90 ദിവസം പൂർത്തിയാകാനിരിക്കെ സ്വാഭാവിക ജാമ്യം കിട്ടുന്നത് തടയാനാണ് പോലീസ് വെള്ളിയാഴ്ച തന്നെ കുറ്റപത്രം സമർപ്പിക്കാൻ ഒരുങ്ങുന്നത്.ദിലീപിനെതിരെ നിർണായകമായ തെളിവുകൾ ഉണ്ടെന്നാണ് പോലീസ് നൽകുന്ന സൂചന.കേസിൽ ഇതുവരെ 21 പേരുടെ രഹസ്യമൊഴി പോലീസ് രേഖപ്പെടുത്തി കഴിഞ്ഞു.കുറ്റപത്രം സമർപ്പിക്കുന്നതിന് മുൻപായി നാലുപേരുടെ രഹസ്യമൊഴി കൂടി അന്വേഷണ സംഘം രേഖപ്പെടുത്തും.നടിയെ ആക്രമിക്കുന്ന ദൃശ്യങ്ങൾ അടങ്ങിയ രണ്ട് മെമ്മറി കാർഡ് പോലീസിന്റെ പക്കലുണ്ട്.ഇതിനോടൊപ്പം ചില നിർണായക മൊഴികളും കുറ്റപത്രത്തോടൊപ്പം ഉണ്ടാകുമെന്നു പോലീസ് പറയുന്നു.അതിനിടെ കേസിൽ ദിലീപ് സമർപ്പിച്ചിരിക്കുന്ന ജാമ്യാപേക്ഷയും ഹൈക്കോടതി ഈയാഴ്ച പരിഗണിക്കും.
മഥുര:മഥുരയിൽ മലയാളി നഴ്സിനെ മരിച്ച നിലയിൽ കണ്ടെത്തി.തിരുവനന്തപുരം കുന്നത്തുകാൽ സ്വദേശിനി എസ്.സൂര്യയാണ് മരിച്ചത്.താമസ സ്ഥലത്ത് അബോധാവസ്ഥയിൽ കണ്ടെത്തി എന്നാണ് ബന്ധുക്കൾക്ക് ലഭിച്ച വിവരം.എന്നാൽ ഞായറാഴ്ച രാവിലെ മരിച്ചു എന്ന് അറിയിക്കുകയായിരുന്നു.സൂര്യ ആത്മഹത്യ ചെയ്തു എന്നാണ് അറിയിച്ചത്.എന്നാൽ സൂര്യയുടെ മരണത്തിൽ ദുരൂഹതയുണ്ടെന്നാണ് ബന്ധുക്കളുടെ ആരോപണം.കൂടെ ജോലി ചെയ്യുന്ന കൊട്ടാരക്കര സ്വദേശിയായ ഒരു നഴ്‌സുമായി സൂര്യക്ക് ചില പ്രശ്നങ്ങൾ ഉണ്ടായിരുന്നു.ഇതാകാം മരണകാരണമെന്നാണ് ബന്ധുക്കളുടെ ആരോപണം.ഇതിനെ കുറിച്ച് അന്വേഷണം നടത്തണമെന്നും ബന്ധുക്കൾ ആവശ്യപ്പെട്ടു.
ന്യൂഡൽഹി:ഡൽഹിയിൽ ഐ.എല്‍.ബി.എസ് ആശുപത്രിയില്‍ നഴ്സുമാരുടെ സമരം തുടരുന്നു പിരിച്ച് വിട്ട നഴ്സ് ആത്മഹത്യ ചെയ്യാന്‍ ശ്രമിച്ചതിന് പിന്നാലെയാണ് നഴ്‌സുമാർ സമരം ആരംഭിച്ചത്. തൊഴില്‍ പീഡനം അവസാനിപ്പിക്കല്‍ അടക്കമുള്ള ആവശ്യങ്ങള്‍ അംഗീകരിക്കാതെ സമരത്തില്‍ നിന്ന് പിറകോട്ടില്ലെന്ന് നഴ്സുമാര്‍ വ്യക്തമാക്കി. യുണൈറ്റഡ് നഴ്സസ് അസോസിയേഷന്‍ ഡല്‍ഹി ഘടകത്തിന്‍റെ ഒദ്യോഗിക ഉദ്ഘാടനവും ഡല്‍ഹിയില്‍ നടന്നു.70 ശതമാനത്തോളം മലയാളി നഴ്സുമാരുള്ള ഡല്‍ഹി ഐഐല്‍ബിഎസ് ആശുപത്രിയിലാണ് സമരം തുടരുന്നത്. പോലീസ് ആവശ്യപ്പെട്ട പ്രകാരം ആശുപത്രി പരിസരത്ത് നിന്ന് നൂറ് മീറ്റര്‍ മാറിയാണ് ഇപ്പോഴത്തെ സമരം. പിരിച്ച് വിട്ട നഴ്സുമാരെ തിരിച്ചെടുക്കുക, തൊഴില്‍ ചൂഷണം അവസാനിപ്പിക്കുക തുടങ്ങിയ ആവശ്യങ്ങൾ ഉന്നയിച്ചാണ് സമരം.വിഷയത്തില്‍ ഇടപെടണമെന്നാവശ്യപ്പെട്ട് ഡല്‍ഹി സംസ്ഥാന ആരോഗ്യമന്ത്രി സത്യേന്ത്ര ജയ്ന് യു എന്‍ എ ഭാരവാഹികള്‍ നിവേദനം നല്‍കി.ഡല്‍ഹിയിലുള്ള മുഖ്യമന്ത്രി പിണറായി വിജയനുമായും യു.എന്‍.എ നേതൃത്വം വിഷയം ചര്‍ച്ച ചെയ്യും.
പയ്യന്നൂർ:അമ്മയോടിച്ച സ്കൂട്ടറിൽ ബസിടിച്ച് അഞ്ചാം ക്ലാസ്സുകാരൻ മരിച്ചു.വെള്ളൂർ കിഴക്കുമ്പാട് ജനകീയ കലാസമിതി പരിസരത്തെ കനേരി ചന്ദ്രൻ-ശ്രീലജ ദമ്പതികളുടെ മകൻ അഭിനന്ദാണ് മരിച്ചത്.ശ്രീലജയുടെ വീട്ടിൽ പോയി മടങ്ങിവരവേ ഇന്നലെ വൈകുന്നേരം നാലുമണിയോടെ വൈപ്പിരിയം മദർ സ്കൂളിനെ സമീപത്തു വെച്ച് ഇവരുടെ സ്കൂട്ടറിൽ ബസ് ഇടിക്കുകയായിരുന്നു. ഇടിയുടെ ആഘാതത്തിൽ തെറിച്ചു വീണ അഭിനന്ദ് ബസിനടിയിൽപെടുകയായിരുന്നു.ബസ് അമിത വേഗതയിലായിരുന്നുവെന്നു നാട്ടുകാർ പറഞ്ഞു.സംസ്കാരം തിങ്കളാഴ്ച ഉച്ചയ്ക്ക് വള്ളൂരിൽ.
കണ്ണൂർ:സംസ്ഥാനത്തെ 14 ജില്ലാ സഹകരണ ബാങ്കുകളിലേക്കുള്ള ഭരണസമിതി തിരഞ്ഞെടുപ്പ് ഡിസംബറിൽ നടക്കും.ഇതിന്റെ ഭാഗമായി മലപ്പുറം ഒഴികെയുള്ള ജില്ലാ സഹകരണ ബാങ്കുകൾ പൊതുയോഗം വിളിച്ച് നിയമസഭാ പാസാക്കിയ ഭേദഗതി അംഗീകരിച്ചു.പ്രാഥമിക സഹകരണ സംഘങ്ങൾ,സഹകരണ റൂറൽ ബാങ്കുകൾ,ലൈസൻസുള്ള സഹകരണ അർബൻ ബാങ്കുകൾ എന്നിവയ്ക്ക് മാത്രമായി വോട്ടവകാശം പരിമിതപ്പെടുത്തുന്നതാണ് ഭേദഗതി.നിലവിൽ വനിതാ സൊസൈറ്റികൾ,സ്കൂൾ സഹകരണ സൊസൈറ്റികൾ,കൺസ്യുമർ സംഘങ്ങൾ,മാർക്കറ്റിങ് സംഘങ്ങൾ തുടങ്ങിയവയ്ക്ക് വോട്ടവകാശമുണ്ട്.ഇവരെ ഒഴിവാക്കിയശേഷമുള്ള വോട്ടർ പട്ടിക അടുത്ത ദിവസം പ്രസിദ്ധപ്പെടുത്തും.മലപ്പുറം ഒഴികെയുള്ള എല്ലാ ബാങ്കുകളും നേടാമെന്നതാണ് എൽ ഡി എഫ് പ്രതീക്ഷിക്കുന്നത്.മലപ്പുറത്ത് പ്രാഥമിക ബാങ്കുകളിലും ഭൂരിപക്ഷം യുഡിഎഫിനായതിനാലാണ് ഭേദഗതി പാസാക്കാൻ കഴിയാതിരുന്നത്.കേരളാ ബാങ്ക് രൂപീകരിക്കുന്ന സാഹചര്യത്തിൽ ജില്ലാ സഹകരണ ബാങ്കുകളിലേക്ക് തിരഞ്ഞെടുപ്പ് നടത്തേണ്ടതില്ലെന്നായിരുന്നു ആദ്യം സർക്കാർ തീരുമാനിച്ചിരുന്നത്.എന്നാൽ കേരളാ ബാങ്ക് നിലവിൽ വരാൻ ഇനിയും ഒരു വർഷം കൂടി വേണം.ഡിസംബറിൽ തിരഞ്ഞെടുപ്പ് നടത്തി അധികാരത്തിലെത്തുന്ന ഭരണസമിതിക്ക് കേരളാ ബാങ്ക് വരുന്നതോടെ ഒഴിവാക്കേണ്ടി വരും.
കണ്ണൂർ:ദേശീയ സന്നദ്ധ രക്തദാന ദിനത്തിന്റെ സംസ്ഥാനതല ഉൽഘാടനം കണ്ണൂരിൽ കെ.കെ ശൈലജ നിർവഹിച്ചു.കണ്ണൂരിൽ രക്തദാനം നടത്തിയ ജില്ലാ പോലീസ് സേനയെയും സന്നദ്ധപ്രവർത്തകരെയും മന്ത്രി അഭിനന്ദിച്ചു.പ്രഥമ ശുശ്രൂഷകൾ നൽകുന്നതിനുള്ള പരിശീലനം സ്കൂൾ തലങ്ങളിൽ കുട്ടികൾക്ക് നൽകണമെന്നും മന്ത്രി പറഞ്ഞു.ജില്ലാ പഞ്ചായത്ത് കാര്യാലയത്തിന് മുൻപിൽ സജ്ജമാക്കിയ സഞ്ചരിക്കുന്ന രക്തബാങ്കിൽ പോലീസ് ഉദ്യോഗസ്ഥർ,വിദ്യാർഥികൾ,സന്നദ്ധപ്രവർത്തകർ,തുടങ്ങി നിരവധിപേർ രക്തം ദാനം ചെയ്തു.2016-17 വർഷത്തിൽ ഏറ്റവും കൂടുതൽ സന്നദ്ധ രക്തദാന ക്യാമ്പുകൾ സംഘടിപ്പിച്ച പെരിന്തൽമണ്ണ ഗവ.ആശുപത്രി,തിരുവനന്തപുരം ജനറൽ ആശുപത്രി,പാലക്കാട് ജില്ലാ ആശുപത്രി,കോട്ടയം മെഡിക്കൽ കോളേജ് ആശുപത്രി എന്നിവിടങ്ങളിലെ രക്തബാങ്കുകൾക്ക് കേരള സംസ്ഥാന എയ്ഡ്സ് നിയന്ത്രണ സൊസൈറ്റിയുടെ ഉപഹാരം മന്ത്രി വിതരണം ചെയ്തു.
തളിപ്പറമ്പ്:തളിപ്പറമ്പ് ദേശീയ പാതയിൽ കുറ്റിക്കോൽ പാലത്തിനു സമീപം മരംകയറ്റിയ ലോറി സ്‌കൂട്ടറിലിടിച്ച് സ്കൂട്ടർ യാത്രക്കാരൻ മരിച്ചു.ബക്കളം കാനൂലിലെ കെ.വി ഗോവിന്ദനാണ്(61) മരിച്ചത്.ഇദ്ദേഹത്തിന്റെ ഭാര്യ സരോജിനി,ലോറി ഡ്രൈവർ തിരുനെൽവേലി സ്വദേശി ശങ്കരനാരായണൻ എന്നിവരെ പരിക്കുകളോടെ പരിയാരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.ഇന്നലെ വൈകിട്ടാണ് കൂറ്റൻ മരത്തടികളുമായി കണ്ണൂരിൽ നിന്നും തളിപ്പറമ്പ് ഭാഗത്തേക്ക് പോവുകയായിരുന്ന ലോറി ബക്കളം ഇറക്കത്തിൽ അപകടത്തിൽ പെട്ട് മറിഞ്ഞത്.ഇടിയുടെ ആഘാതത്തിൽ സ്കൂട്ടർ യാത്രക്കാർ റോഡരികിലെ താഴ്ചയിലേക്ക് തെറിച്ചു വീഴുകയായിരുന്നു.ലോറിയിൽ നിന്നും വീണ മരത്തടികൾ റോഡിൽ ചിതറിയതിനെ തുടർന്ന് ഈ ഭാഗത്ത് ഏറെനേരം ഗതാഗതം തടസ്സപ്പെട്ടു.പോലീസും നാട്ടുകാരുമെത്തിയാണ് ഗതാഗതം പുനഃസ്ഥാപിച്ചത്.അപകടത്തിൽപെട്ട ലോറി അമിതവേഗതയിലായിരുന്നു എന്ന് നാട്ടുകാർ പറഞ്ഞു.