തലശ്ശേരി:തലശ്ശേരിയിൽ ബിജെപി പ്രവർത്തകന് വെട്ടേറ്റു.ഓട്ടോറിക്ഷ ഡ്രൈവർ ചുണ്ടങ്ങാപ്പൊയിൽ സ്വദേശി കെ.എം സുധീഷിനാണ് വെട്ടേറ്റത്.ഇയാളെ തലശ്ശേരി ഇന്ദിരാഗാന്ധി ആശുപത്രിയിൽ പ്രവേശിപ്പിച്ചിരിക്കുകയാണ്.സുധീഷിനെ ഓട്ടോയിൽ നിന്നും പിടിച്ചിറക്കി ഇരുകാലുകളും വെട്ടി പരിക്കേൽപ്പിക്കുകയായിരുന്നു.സംഭവത്തിന് പിന്നിൽ സിപിഎം ആണെന്ന് ബിജെപി ആരോപിച്ചു.
കണ്ണൂർ:നാറാത്ത് ആയുധ പരിശീലന കേസിലെ മുഖ്യപ്രതി അസ്ഹറുദ്ധീൻ അറസ്റ്റിൽ. കാൺപൂരിൽ ഒളിവിൽ കഴിയുകയായിരുന്ന അസ്ഹറുദീനെ എൻ.ഐ.എ സംഘം അറസ്റ്റ് ചെയ്യുകയായിരുന്നു.ഇതോടെ കേസിൽ എല്ലാ പ്രതികളും പിടിയിലായി.കേസിൽ നേരത്തെ ഇരുപതുപേർ അറസ്റ്റിലായിരുന്നു.2013 ഏപ്രിലിലാണ് നാറാത്തെ അടച്ചിട്ട വീട്ടിൽ ആയുധ പരിശീലന കേന്ദ്രം പോലീസ് കണ്ടെത്തിയത്.തീവ്രവാദ പ്രവർത്തനങ്ങൾക്കായി യുവാക്കളെ റിക്രൂട്ട് ചെയ്യുക,ആയുധ പരിശീലനം നൽകുക തുടങ്ങിയ കുറ്റമാണ് ഇവർക്കെതിരെ ചുമത്തിയിരിക്കുന്നത്.അസ്ഹറുദീന്റെ മയ്യിൽ ടൗണിനടുത്തുള്ള ബാങ്ക് വഴിയാണ് ആയുധ പരിശീലനത്തിനും തീവ്രവാദ പ്രവർത്തനങ്ങൾക്കുമുള്ള പണം എത്തുന്നതെന്ന് എൻഐഎ നേരത്തെ കണ്ടെത്തിയിരുന്നു.അതേസമയം കേസിൽ കഴിഞ്ഞ ജനുവരിയിൽ വിചാരണ പൂർത്തിയാക്കി കോടതി വിധി പറഞ്ഞിരുന്നു.ഒന്നാം പ്രതിക്ക് ഏഴു വർഷം തടവും 5000 രൂപ പിഴയുമാണ് കോടതി വിധിച്ചത്.മറ്റു പ്രതികൾക്ക് അഞ്ചു വർഷം തടവും 5000 രൂപ പിഴയും കോടതി വിധിച്ചിരുന്നു.പിഴ അടച്ചില്ലെങ്കിൽ ആറുമാസം അധിക തടവ് അനുഭവിക്കേണ്ടിവരുമെന്നും കോടതി വ്യക്തമാക്കിയിരുന്നു. കേരളാ പോലീസ് അന്വേഷിച്ച കേസ് പിന്നീട് എൻഐഎ ഏറ്റെടുക്കുകയായിരുന്നു.
കുറ്റിപ്പുറം:കുറ്റിപ്പുറം റെയിൽവേ സ്റ്റേഷനിൽ നിന്നും 79 ലക്ഷം രൂപയുടെ കുഴൽപ്പണം പിടികൂടി.വേങ്ങര സ്വദേശികളായ രണ്ടുപേരിൽ നിന്നാണ് പണം പിടികൂടിയത്. ഉപതിരഞ്ഞെടുപ്പ് നടക്കുന്ന വേങ്ങരയിലേക്ക് കൊണ്ടുവരികയായിരുന്നു പണമെന്നു പോലീസ് പറഞ്ഞു.പണം കൈവശം വെച്ച വേങ്ങര സ്വദേശികളായ അബ്ദുൽ റഹ്മാൻ,സിദ്ധിക്ക് എന്നിവരെ പോലീസ് അറസ്റ്റ് ചെയ്തു.കുറ്റിപ്പുറം റെയിൽവേ സ്റ്റേഷനിൽ നിന്നും പണം കാർ മാർഗം വേങ്ങരയിലെത്തിക്കാനാണ് ഇവർ ശ്രമിച്ചത്.തിരഞ്ഞെടുപ്പുമായി ബന്ധപ്പെട്ട് നടത്തുന്ന പരിശോധനയിലാണ് പണം പിടികൂടിയത്.കഴിഞ്ഞ ദിവസം 9 ലക്ഷം രൂപയും പോലീസ് പിടികൂടിയിരുന്നു.പരിശോധനകൾ ഇനിയും തുടരുമെന്ന് പോലീസ് അറിയിച്ചു.
മാനന്തവാടി:വയനാട്ടിൽ വൻ സ്വർണവേട്ട.അനധികൃതമായി കടത്താൻ ശ്രമിച്ച മുപ്പതു കിലോ സ്വർണമാണ് തോൽപ്പെട്ടി ചെക്ക് പോസ്റ്റിൽ വെച്ച് എക്‌സൈസ് ഇന്റലിജൻസ് ഉദ്യോഗസ്ഥർ പിടികൂടിയത്.സംഭവത്തിൽ രാജസ്ഥാൻ സ്വദേശികളായ ആറുപേരെ പോലീസ് അറസ്റ്റ് ചെയ്തു.ഇന്ന് പുലർച്ചെ ബെംഗളൂരുവിൽ നിന്നും കോഴിക്കോടേക്ക്‌ പോവുകയായിരുന്ന സ്വകാര്യ ബസിൽ നിന്നാണ് സ്വർണം പിടികൂടിയത്.നാല് ബാഗുകളിലായി ബസിന്റെ പുറകിലെ സീറ്റിനടിയിലാണ് സ്വർണ്ണം ഒളിപ്പിച്ചുവെച്ചിരുന്നത്.കോഴിക്കോടുള്ള പ്രമുഖ ജ്വല്ലറിയിലേക്ക് കൊണ്ടുപോവുകയായിരുന്നു സ്വർണമെന്നാണ് പ്രാഥമിക വിവരം.നടപടികൾ പൂർത്തിയാക്കിയ ശേഷം ഇവരെ സെയിൽസ് ടാക്സ് ഉദ്യോഗസ്ഥർക്ക് കൈമാറുമെന്ന് എക്‌സൈസ് അധികൃതർ അറിയിച്ചു.
കണ്ണൂർ:കണ്ണൂർ കവിത തീയേറ്ററിന് സമീപം പ്രവർത്തിക്കുന്ന ബിജെപി ഓഫീസിനു സമീപത്തു നിന്നും ആയുധങ്ങൾ കണ്ടെത്തി.രണ്ട് വടിവാളുകളും ആറ് ഇരുമ്പ് ദണ്ഡുകളുമാണ് കണ്ടെത്തിയത്. ശുചീകരണം നടത്തുന്നതിനിടെ കോർപറേഷൻ തൊഴിലാളികളാണ് ആയുധങ്ങൾ കണ്ടെത്തിയത്.ഇവർ പോലീസിൽ വിവരമറിയിച്ചതിനെ തുടർന്ന് പോലീസ് സ്ഥലത്തെത്തി പരിശോധന ആരംഭിച്ചിരിക്കുകയാണ്.
കണ്ണൂർ:സ്റ്റേറ്റ് ബാങ്ക് ഓഫ് ഇന്ത്യ ശാഖകൾ വ്യാപകമായി അടച്ചു പൂട്ടുന്നതിൽ പ്രതിഷേധിച്ച് ബാങ്ക് എംപ്ലോയീസ് ഫെഡറേഷൻ ഓഫ് ഇന്ത്യ (ബെഫി) കണ്ണൂർ ജില്ലാ കമ്മിറ്റി നാളെ രാവിലെ ഒൻപതു മുതൽ എസ്ബിഐ കണ്ണൂർ റീജനൽ ഓഫിസിനു മുന്നിൽ നിരാഹാര സത്യഗ്രഹം നടത്തും. സത്യാഗ്രഹം പി.ജയരാജൻ ഉദ്ഘാടനം ചെയ്യും. ബാങ്ക് ശാഖകൾ വ്യാപകമായി വെട്ടിക്കുറയ്ക്കുന്നതിന്റെ ഭാഗമായി കേരളത്തിൽ ആദ്യഘട്ടത്തിൽ 174 ശാഖകൾ അടച്ചുപൂട്ടാനാണ് തീരുമാനം.കണ്ണൂർ ജില്ലയിൽ 11 ശാഖകളാണ് പൂട്ടാൻ തീരുമാനിച്ചിരിക്കുന്നത്. പല ശാഖകളും പൂട്ടുന്നതിനെതിരെ ഉയർന്നു വന്ന ജനകീയ പ്രതിഷേധങ്ങളെ മുഖവിലയ്ക്കെടുക്കാത്ത എസ്ബിഐ മാനേജ്മെന്റിന്റെ നിലപാടുകൾക്കെതിരെ പ്രാദേശിക ജനകീയ സംരക്ഷണ സമിതികളും പ്രവർത്തിച്ചുവരുന്ന പശ്ചാത്തലത്തിലാണ് ബെഫിയുടെ നേതൃത്വത്തിൽ നിരാഹാര സത്യഗ്രഹം നടത്തുന്നത്.
കോഴിക്കോട്:കോഴിക്കോട് കരിപ്പൂർ വിമാനത്താവളത്തിൽ നിന്നും ഒരു കോടി രൂപ വിലമതിക്കുന്ന സ്വർണ്ണം പിടികൂടി.എയർ ഇന്ത്യ എക്സ്പ്രസ്സിന്റെ ദോഹ-കോഴിക്കോട് വിമാനത്തിലെത്തിയ കോഴിക്കോട് കുന്ദമംഗലം സ്വദേശി ഷഹീറിന്റെ(24) ബാഗേജിൽ നിന്നാണ് റെവന്യൂ ഇന്റലിജൻസ് വിഭാഗം സ്വർണ്ണം കണ്ടെടുത്തത്.വർക്ക്‌ ഷോപ്പുകളിൽ ഉപയോഗിക്കുന്ന ഇലക്ട്രോണിക് സ്പാനറിന്റെ അകത്തെ വെൽഡിങ്ങുകൾ മുറിച്ചു മാറ്റി പകരം സ്വർണത്തിന്റെ ബാറുകൾ മുറിച്ചുവെച്ച നിലയിലാണ് സ്വർണം കടത്താൻ ശ്രമിച്ചത്.ഒരു കിലോയുടെ മൂന്നു സ്വർണ ബാറുകളും മൂന്നു സ്വർണ ബിസ്‌ക്കറ്റുകളുമാണ് ഉണ്ടായിരുന്നത്. കള്ളക്കടത്തത്‌ മാഫിയയുടെ കണ്ണിയാണ് പിടിയിലായ ഷഹീർ.ദോഹയിലുള്ള കൊടുവള്ളി സ്വദേശിയാണ് ഇയാൾക്ക് സ്വർണ്ണം കൈമാറിയത്.ഇടപാടുകാർ സ്വർണമടങ്ങിയ ഉപകരണം ഷഹീറിന്റെ വീട്ടിലെത്തി കൈപറ്റുമെന്നാണ് അറിയിച്ചിട്ടുണ്ടായത്.
കൊട്ടിയൂർ:കൊട്ടിയൂരിൽ കഞ്ചാവുമായി യുവാവ് അറസ്റ്റിൽ.അമ്പായത്തോട് സ്വദേശി ബിബിൻ ജോർജ്(25) ആണ് അറസ്റ്റിലായത്.കൊട്ടിയൂരിൽ വ്യാപകമായി കഞ്ചാവ് ഉപയോഗം നടക്കുന്നുണ്ടെന്ന സൂചന ലഭിച്ചതിന്റെ അടിസ്ഥാനത്തിൽ പേരാവൂർ എക്‌സൈസ് സംഘം നടത്തിയ അന്വേഷണത്തിലാണ് ബൈക്കിൽ നിന്നും 20 ഗ്രാം കഞ്ചാവ് പിടികൂടിയത്.ചോദ്യം ചെയ്യലിൽ വീരാജ്പേട്ടയിൽ നിന്നാണ് കഞ്ചാവ് വാങ്ങിയതെന്നാണ് ബിബിൻ പറഞ്ഞത്. സംഭവത്തിൽ കൂടുതൽ അന്വേഷണം നടത്തുമെന്ന് പ്രിവന്റീവ് ഓഫീസർ പറഞ്ഞു.പ്രതിയെ കൂത്തുപറമ്പ് കോടതി റിമാൻഡ് ചെയ്തു.
തലശ്ശേരി:പാലയാട് ജാനകി നിലയത്തിൽ രവീന്ദ്രന്റെ വീടിനു നേരെ ബോംബേറുണ്ടായി. തിങ്കളാഴ്ച പുലർച്ചെ രണ്ടുമണിയോടെയാണ് സംഭവം.ബോംബേറിൽ കിടപ്പുമുറിയുടെ ചുമരിനും ജനൽ പാളികൾക്കും കേടുപാടുണ്ടായി.ബോംബിന്റെ ചീളുകളും ജനൽ ചില്ലുകളും മുറിക്കകത്തേക്ക് തെറിച്ചു വീണു.രവീന്ദ്രന്റെ മകൻ വിലോജ് ബിജെപി പ്രവർത്തകനാണ്. ആക്രമണത്തിന് പിന്നിൽ സിപിഎം ആണെന്ന് ബിജെപി ആരോപിച്ചു.രവീന്ദ്രന്റെ പരാതിയിൽ ധർമടം പോലീസ് കേസെടുത്തു.ഞായറാഴ്ച രാത്രി പാലയാട് ബിജെപി പ്രവർത്തകർ സ്ഥാപിച്ച ഫ്ളക്സ് ബോർഡുകൾ നശിപ്പിക്കാനെത്തിയ സിപിഎം പ്രവർത്തകരെ പിടികൂടാൻ ബിജെപി പ്രവർത്തകർ ശ്രമിച്ചിരുന്നു.ഇതിനെതിരെ ധർമടം പോലീസ് പരാതി നൽകുകയും ചെയ്തിരുന്നു. ഇതിനു ശേഷമാണ് വിലോജിന്റെ വീടിനു നേരെ അക്രമണമുണ്ടായതെന്നു ബിജെപി പ്രവർത്തകർ പറഞ്ഞു.
കാടാച്ചിറ:കടമ്പൂരിൽ കോൺഗ്രസ് ഓഫീസ് ആക്രമിക്കുകയും വനിതാ പ്രവർത്തകയെ മർദിക്കുകയും ചെയ്ത സംഭവത്തിൽ രണ്ടു ബിജെപി പ്രവർത്തകരെ പോലീസ് അറസ്റ്റ് ചെയ്തു.മേലൂരിലെ തെക്കൻ വളപ്പിൽ ഹൗസിൽ സുമീഷ്,കുന്നുമ്മൽ ഹൗസിൽ പ്രദീഷ് എന്നിവരാണ് അറസ്റ്റിലായത്.എടക്കാട് എസ് ഐ മഹേഷ് കണ്ടമ്പേത്തിന്റെ നേതൃത്വത്തിലുള്ള അന്വേഷണ സംഘമാണ് ഇവരെ അറസ്റ്റ് ചെയ്തത്.കോടതിയിൽ ഹാജരാക്കിയ ഇവരെ രണ്ടാഴ്ചത്തേക്ക് റിമാൻഡ് ചെയ്തു.എന്നാൽ ആക്രമണത്തിൽ ബിജെപിക്കോ ആർഎസ്എസിനോ പങ്കില്ലെന്ന് ബിജെപി പഞ്ചായത്ത് കമ്മിറ്റി പ്രസിഡന്റ് ആർ ഷാജിത് പ്രസ്താവനയിൽ അറിയിച്ചു. അതേസമയം ആക്രമണത്തിൽ പ്രതിഷേധിച്ച് കോൺഗ്രസ് കടമ്പൂരിൽ ആഹ്വാനം ചെയ്ത ഹർത്താൽ പൂർണമായിരുന്നു.കടകമ്പോളങ്ങൾ അടഞ്ഞു കിടന്നു.സ്കൂളുകളും പ്രവർത്തിച്ചില്ല.