ബെംഗളൂരു:കനത്ത മഴയിൽ ബെംഗളൂരുവിൽ അഞ്ചുപേർ മരിച്ചു.മഴക്കെടുതി മൂലം മരിച്ചവരുടെ കുടുംബങ്ങൾക്ക് അഞ്ചുലക്ഷം രൂപ അടിയന്തിര സഹായം നല്കാൻ കർണാടക സർക്കാർ ഉത്തരവിട്ടു.വെള്ളം കയറി മുങ്ങിക്കൊണ്ടിരുന്ന കാറിൽ നിന്നും ഒരു വനിതയെ രക്ഷിച്ചിട്ടുണ്ട്.വെള്ളിയാഴ്ച്ച വൈകിട്ട് മുതൽ ഈ പ്രദേശത്തു കനത്ത മഴയാണ് ലഭിച്ചത്.മഴമൂലം നഗരത്തിൽ ഗതാഗതക്കുരുക്ക് രൂക്ഷമാണ്.
ന്യൂഡൽഹി:ദിലീപ് വിഷയത്തിൽ പ്രധാന മന്ത്രിയുടെ ഓഫീസ് ഇടപെടുന്നു.നടിയെ ആക്രമിച്ച കേസിൽ ദിലീപിനെതിരെ ഗൂഢാലോചന നടന്നു എന്ന് പ്രധാന മന്ത്രിയുടെ ഓഫീസിനു പരാതി ലഭിച്ചു.ഇത് സംബന്ധിച്ച് അന്വേഷണം നടത്തി ഉടൻ റിപ്പോർട് നല്കാൻ പ്രധാനമന്ത്രിയുടെ ഓഫീസിൽ നിന്നും ചീഫ് സെക്രെട്ടറിക്ക് നിർദേശം ലഭിച്ചു.ഫെഫ്ക അംഗം സലിം ഇന്ത്യയുടെ പരാതിയിലാണ് നടപടി ഉണ്ടായിരിക്കുന്നത്.ദിലീപിന് അനുകൂലമായി പ്രധാനമന്ത്രിയുടെ ഓഫീസ് ഇടപെടുമെന്ന പ്രതീക്ഷ നേരത്തെ തന്നെ സലിം ഇന്ത്യ മുന്നോട്ട് വെച്ചിരുന്നു.
കണ്ണൂർ:ശ്രീകണ്ഠപുരത്ത് എസ്എഫ്ഐ നേതാക്കളെ ആക്രമിച്ച കേസിൽ എംഎസ്എഫ് പ്രവർത്തകൻ കസ്റ്റഡിയിൽ. ശ്രീകണ്ഠപുരം എസ്ഇഎസ് കോളജ് വിദ്യാർഥിയായ ഫവാസി (19) നെയാണ് ശ്രീകണ്ഠപുരം എസ്ഐ ഇ.നാരായണന്‍റെ നേതൃത്വത്തിലുള്ള പോലീസ് സംഘം ഇന്ന് പുലർച്ചെ ചെങ്ങളായിയിൽ വെച്ച് പിടികൂടിയത്.കഴിഞ്ഞ വ്യാഴാഴ്ചയാണ് എസ്എഫ്ഐ നേതാക്കൾക്കെതിരെ അക്രമം നടന്നത്. എസ്എഫ്ഐ ശ്രീകണ്ഠപുരം ഏരിയ പ്രസിഡന്‍റ് കെ.എ. സഹീർ (23), സെക്രട്ടറി എ. ശ്രീജിത്ത് (24) എന്നിവർക്ക് നേരെയാണ് അക്രമം നടന്നത്.
തിരുവനന്തപുരം: കേന്ദ്ര-സംസ്ഥാന സർക്കാരുകളുടെ ജനവിരുദ്ധ നയങ്ങൾക്കെതിരേ പതിനാറാം തീയതി യുഡിഎഫ് പ്രഖ്യാപിച്ചിരിക്കുന്ന ഹർത്താലിന് ഒരു മാറ്റവുമുണ്ടാകില്ലെന്ന് പ്രതിപക്ഷ നേതാവ് രമേശ് ചെന്നിത്തല അറിയിച്ചു.സമാധാനപരമായ ഹർത്താലായിരിക്കുന്ന നടക്കുക. സംസ്ഥാന-കേന്ദ്ര സർക്കാരുകളുടെ ജനവിരുദ്ധ നയങ്ങൾ കാരണം ഹർത്താൽ നടത്തി പ്രതിഷേധിക്കാൻ പ്രതിപക്ഷം നിർബന്ധിതരാവുകയായിരുന്നുവെന്നും രമേശ് ചെന്നിത്തല കൂട്ടിച്ചേർത്തു.ഹർത്താൽ നടത്തുന്നതിനെതിരെ രൂക്ഷ വിമർശനവുമായി കഴിഞ്ഞ ദിവസം ഹൈക്കോടതി രംഗത്തെത്തിയിരുന്നു.എന്തിന് വേണ്ടിയാണ് ഹർത്താലെന്ന് പ്രതിപക്ഷ നേതാവ് നേരിട്ടെത്തി വിശദീകരിക്കണമെന്ന് കോടതി ഉത്തരവിട്ടിരുന്നു. ഹർത്താലിനെതിരേ കോട്ടയം സ്വദേശി സമർപ്പിച്ച പൊതുതാത്പര്യ ഹർജി പരിഗണിച്ചായിരുന്നു കോടതി ഉത്തരവ്.
ബെംഗളൂരു:പ്രമുഖ മാധ്യമ പ്രവർത്തക ഗൗരി ലങ്കേഷിന്റെ കൊലപാതകത്തിൽ മൂന്നു പ്രതികളെ അന്വേഷണ സംഘം തിരിച്ചറിഞ്ഞു.ഇവരിൽ രണ്ടുപേരുടെ രേഖാചിത്രം പോലീസ് പുറത്തുവിട്ടു.ഗൗരി ലങ്കേഷിന്റെ വീടിനു പുറത്തെ സിസിടിവിയിൽ പതിഞ്ഞ ദൃശ്യങ്ങളുടെ അടിസ്ഥാനത്തിലാണ് രേഖാ ചിത്രം തയ്യാറാക്കിയിരിക്കുന്നത്.മൂന്ന് ചിത്രങ്ങളാണ് തയ്യാറാക്കിയിരിക്കുന്നത്.ഇതിൽ രണ്ടു ചിത്രങ്ങൾ ഒരാളുടെതന്നെയാണ്.പ്രതിയെ കുറിച്ച് ലഭിച്ച വ്യത്യസ്തങ്ങളായ വിവരങ്ങളുടെ അടിസ്ഥാനത്തിലാണ് രണ്ട് ചിത്രങ്ങൾ തയ്യാറാക്കിയിരിക്കുന്നത്. ബെംഗളൂരുവിൽ നടന്ന വാർത്ത സമ്മേളനത്തിലാണ് രേഖാചിത്രങ്ങൾ പുറത്തു വിട്ടത്. കൊലപാതകത്തിന് മുൻപ് പ്രതികളിലൊരാൾ ഗൗരിയുടെ വീടിനു സമീപം നിരീക്ഷണം നടത്തിയിരുന്നു.ഇതിന്റെ സിസിടിവി ദൃശ്യങ്ങളും അന്വേഷണ സംഘം ഉടൻ തന്നെ പുറത്തു വിടും.പ്രതികളെ കുറിച്ച് വിവരം നൽകുന്നവർക്ക് സർക്കാർ പത്തുലക്ഷം രൂപ പാരിതോഷികം പ്രഖ്യാപിച്ചിട്ടുണ്ട്.സെപ്റ്റംബർ അഞ്ചിന് രാത്രിയാണ് മാധ്യമ പ്രവർത്തക ഗൗരി ലങ്കേഷ് വീടിനു വെളിയിൽ വെച്ച് വെടിയേറ്റ് മരിച്ചത്.
കണ്ണൂർ:കണ്ണൂർ സെൻട്രൽ ജയിലിലും വനിതാജയിലിലുമായി പതിനാലു വർഷത്തിലേറെയായി തടവിൽ കഴിയുന്ന 31 തടവുകാരെ വിട്ടയക്കാൻ ശുപാർശ.ജയിൽ ഡിജിപി ആർ ശ്രീലേഖ അധ്യക്ഷത വഹിച്ച യോഗത്തിലാണ് തീരുമാനം.യോഗത്തിൽ പരിഗണനയ്‌ക്കെത്തിയ 45 അപേക്ഷകളിൽ നിന്നാണ് 31 പേരെ തിരഞ്ഞെടുത്തത്.മുൻപ് ശിക്ഷ ഇളവുകൾ ലഭിക്കാത്തവരും പരോൾ പോലും ലഭിക്കാത്തവരെയുമാണ് വിട്ടയക്കാൻ ശുപാർശ ചെയ്തത്.സെൻട്രൽ ജയിലിൽ നിന്നുള്ള 29 പേരെയും വനിതാ ജയിലിൽ നിന്നുള്ള 2 പേരെയുമാണ് വിട്ടയക്കാൻ ശുപാർശ ചെയ്തത്.ഇക്കാര്യത്തിൽ അന്തിമ തീരുമാനമെടുക്കേണ്ടത് സർക്കാരാണ്.തടവുകാരെ വിട്ടയക്കുന്ന കാര്യത്തിൽ ഗവർണ്ണറുടെ തീരുമാനമാണ് അന്തിമം.
തലശ്ശേരി:കായിക മികവിനായി സംസ്ഥാന സർക്കാർ ഏർപ്പെടുത്തിയ ജി വി രാജ സ്പോർട്സ് അവാർഡ് തലശ്ശേരി ബ്രെണ്ണൻ കോളേജിന്.അന്തർദേശീയ,ദേശീയ,സംസ്ഥാന സർവകലാശാല തലങ്ങളിൽ മികവ് പ്രകടിപ്പിച്ചതിനാണ് പുരസ്ക്കാരം.കഴിഞ്ഞ വർഷം ചൈനയിൽ നടന്ന ബ്രിക്സ് രാജ്യങ്ങളുടെ കായികമേളയിൽ വനിതാ വോളിബോൾ ടീമിൽ മത്സരിച്ചതിൽ മൂന്നുപേർ ബ്രണ്ണൻ കോളേജിൽ നിന്നായിരുന്നു.ലോക സർവകലാശാല ചാമ്പ്യൻഷിപ്പിൽ ഇന്ത്യൻ സർവ്വകലാശാലകളെ പ്രതിനിധീകരിച്ച് ഫെൻസിംഗിൽ പങ്കെടുത്ത ക്രിസ്റ്റി ജോസഫ് ബ്രണ്ണൻ കോളേജിലെ വിദ്യാർത്ഥിയാണ്.2015 ൽ നടന്ന ദേശീയ ഗെയിംസിൽ കേരളത്തിന് ലഭിച്ച 13 സ്വർണ മെഡലുകളിൽ ഒൻപതും നേടിയത് ബ്രണ്ണൻ കോളേജിലെ വിദ്യാർത്ഥികളാണ് ഈ ഒൻപതു പേർക്കും സർക്കാർ ഈ വർഷം ജോലിയും നൽകി.കഴിഞ്ഞ വർഷം മുതൽ കോളേജിലെ എല്ലാ വിദ്യാർത്ഥികൾക്കും അവരവരുടെ കായിക ക്ഷമത രേഖപ്പെടുത്തിയ ആരോഗ്യകാർഡ് കായികപഠന വിഭാഗം വിതരണം ചെയ്യുന്നു.പോലീസ്,മിലിട്ടറി തുടങ്ങിയ സേനാവിഭാഗങ്ങളിൽ കായിക ക്ഷമത പരിശോധനയ്ക്ക് പോകുന്ന എല്ലാ വിദ്യാർത്ഥികൾക്കും സൗജന്യ പരിശീലനം നൽകുന്ന പദ്ധതിയും കോളേജിലുണ്ട്.കൂടാതെ ബ്രെണ്ണനിൽ സ്പോർട്സ് അതോറിറ്റി ഓഫ് ഇന്ത്യ സ്ഥാപിക്കുന്ന സിന്തറ്റിക്ക് സ്റ്റേഡിയത്തിന് ഈ മാസം 29 ന് മുഖ്യമന്ത്രി ശിലാസ്ഥാപനം നിർവഹിക്കും.അദ്ധ്യാപകരുടെയും വിദ്യാർത്ഥികളുടെയും പി.ടി എയുടെയും കൂട്ടായ പ്രവർത്തനമാണ് പുരസ്‌ക്കാര നേട്ടത്തിന് പിന്നിലെന്ന് കോളേജ് കായിക വിഭാഗം മേധാവി കെ.പി പ്രശോഭിത്ത് പറഞ്ഞു.
തലശ്ശേരി:നഗരസഭയുടെ മാലിന്യം തള്ളിയിരുന്നു പുന്നോൽ പെട്ടിപ്പാലത്ത് പുനർജനി ആൾട്ടർനേറ്റീവ് എനർജി പാർക്ക് സ്ഥാപിക്കുന്നു.ഒൻപതു കോടി രൂപയാണ് ചിലവ് പ്രതീക്ഷിക്കുന്നത്.പെട്ടിപ്പാലം പ്രദേശം സൗന്ദര്യവൽക്കരണവും വൈദ്യുതി ഉൽപ്പാദനവുമാണ് ഇതിലൂടെ ലക്ഷ്യമിടുന്നത്.നഗരസഭയുടെ അധീനതയിലുള്ള 6.40 ഏക്കർ സ്ഥലത്താണ് പദ്ധതി വിഭാവനം ചെയ്യുന്നത്.സംസ്ഥാനത്തു നിരവധി പാർക്കുകൾ ഉണ്ടെങ്കിലും വൈദ്യുതി ഉൽപ്പാദനം ലക്ഷ്യമാക്കുന്ന സംരംഭം സംസ്ഥാനത്ത് ആദ്യമാണ്.വൈദ്യുത വകുപ്പ് മന്ത്രി എം.എം മണി സ്ഥലം സന്ദർശിച്ചു.പദ്ധതി റിപ്പോർട് അടുത്ത നഗരസഭാ കൗൺസിൽ യോഗത്തിൽ അവതരിപ്പിക്കും. കൗൺസിൽ അംഗീകാരം നൽകിയ ശേഷം സർക്കാർ അംഗീകാരത്തിനായി സമർപ്പിക്കും.
കൂത്തുപറമ്പ്:ടിപ്പർ ലോറി വീടിനു മുകളിലേക്ക് മറിഞ്ഞു.അപകടത്തിൽ ഡ്രൈവർക്ക് പരിക്കേറ്റു.ഇന്നലെ വൈകിട്ട് അഞ്ചുമണിയോടെ കാര്യാട്ടുപുറം കൊളത്തുപറമ്പിലാണ് അപകടം.കരിങ്കല്ല് കയറ്റി പോവുകയായിരുന്ന ലോറി ക്വാറിക്ക് സമീപത്തെ ദുർഘടമായ റോഡിലൂടെ പോകുമ്പോൾ തലകീഴായി വീടിനു മുകളിലേക്ക് മറിയുകയായിരുന്നു. കുന്നുംബ്രോൻ ശാന്തയുടെ വീടിനു മുകളിലേക്കാണ് മറിഞ്ഞത്.വീട്ടിൽ ശാന്തയുടെ മരുമകളും മൂന്നു കുട്ടികളും ഉണ്ടായിരുന്നു.സാധാരണയായി കുട്ടികൾ കളിക്കാറുള്ള സ്ഥലത്തേക്കാണ് ലോറി മറിഞ്ഞത്.ഇന്നലെ മഴയായതിനാൽ കുട്ടികൾ വീടിനു പുറത്തിറങ്ങാത്തതിനാൽ വൻ ദുരന്തമാണ് ഒഴിവായത്.ഗുരുതരമായി പരിക്കേറ്റ ലോറി ഡ്രൈവർ നരവൂർ സ്വദേശി രാജനെ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അപകടത്തിൽ ലോറിയുടെ ക്യാബിനിൽ കുടുങ്ങിയ രാജനെ അഗ്‌നിശമനസേനയും നാട്ടുകാരും ചേർന്ന് ഒരുമണിക്കൂറോളം പ്രയത്നിച്ചാണ് പുറത്തെടുത്തത്.
കൊച്ചി:കോളേജ് ക്യാമ്പസുകളിൽ സമരമോ സത്യാഗ്രഹമോ ധർണയോ നടത്താൻ അനുവദിക്കാനാകില്ലെന്ന് ഹൈക്കോടതി.പഠനം തടസ്സപ്പെടുത്തുന്ന വിധത്തിൽ സമരം നടത്തുന്ന വിദ്യാർത്ഥികളെ താൽക്കാലികമായി പുറത്താക്കാൻ പ്രിൻസിപ്പലിനും മറ്റ് അധികാരികൾക്കും അവകാശമുണ്ടെന്നും ചീഫ് ജസ്റ്റിസ് അധ്യക്ഷനായ ഡിവിഷൻ ബെഞ്ച് ഉത്തരവിട്ടു.വിദ്യാഭ്യാസ സ്ഥാപനങ്ങൾ പഠിക്കാനുള്ളതാണെന്നും അവിടെ സമരത്തിന് സ്ഥാനമില്ലെന്നും കോടതി വ്യക്തമാക്കി.വിദ്യാർത്ഥി സമരത്തെ തുടർന്ന് പോലീസ് സംരക്ഷണം നൽകണമെന്ന ഉത്തരവ് നടപ്പായില്ലെന്ന് പരാതിപ്പെട്ട പൊന്നാനി എംഇഎസ് കോളേജ് സമർപ്പിച്ച കോടതിയലക്ഷ്യ ഹർജിയിലാണ് ഹൈക്കോടതി ഉത്തരവ്.കോളേജുകൾക്കകത്തും പുറത്തും സമരപന്തലുകൾ സ്ഥാപിച്ചാൽ അവ പൊളിച്ചു നീക്കണമെന്നും കോടതി പോലീസിനോട് നിർദേശിച്ചു. നിയമാനുസൃതം ലഭിക്കില്ലെന്ന് ഉറപ്പുള്ള കാര്യങ്ങൾക്കു വേണ്ടിയാണ് വിദ്യാർഥികൾ സമരങ്ങളും ധർണകളും നടത്തുന്നത്.കോടതിയിലോ ബന്ധപ്പെട്ട അധികാരികളിൽ നിന്നോ അവകാശങ്ങൾ നേടിയെടുക്കുന്നതിന് ശ്രമിക്കാതെ സമരങ്ങളും മറ്റും നടത്തുന്നത് ന്യായീകരിക്കാനാകില്ലെന്നും കോടതി ഉത്തരവിൽ പറഞ്ഞു.