Full Grid

കണ്ണൂർ:താഴെചൊവ്വ,നടാൽ റെയിൽവേ മേൽപ്പാലം പണി ഉടൻ ആരംഭിക്കാൻ തീരുമാനം. ഇതുമായി ബന്ധപ്പെട്ട് പി.കെ ശ്രീമതി വിളിച്ചു ചേർത്ത യോഗത്തിലാണ് തീരുമാനം.സാങ്കേതിക നടപടികൾ പൂർത്തിയാക്കി ഉടൻ പണി തുടങ്ങണമെന്ന് ശ്രീമതി എം.പി യോഗത്തിൽ അറിയിച്ചു. കേന്ദ്രസർക്കാരിന്റെ സേതുഭാരതം പദ്ധതിയിൽ ഉൾപ്പെടുത്തി അംഗീകരിച്ചവയാണ് ഈ രണ്ടു മേൽപ്പാലങ്ങളും.പാപ്പിനിശ്ശേരി അടിപ്പാത,താവം റെയിൽവേ മേൽപ്പാലം,തലശ്ശേരി-വളവുപാറ റോഡ്,എന്നിവയെക്കുറിച്ചും യോഗത്തിൽ ചർച്ച നടന്നു.പാപ്പിനിശ്ശേരി അടിപ്പാതയുടെ നിർമാണത്തിന് ആവശ്യമായ എൻ ഓ സിക്കുള്ള അപേക്ഷ റെയിൽവേക്ക് ഉടൻ നൽകും. പണിയുടെ മാറ്റത്തിനുള്ള അംഗീകാരം ലഭിക്കാത്തതാണ് താവം പാലം പണി പൂർത്തീകരിക്കാനുള്ള തടസ്സമെന്ന് കെ.എസ്.ടി.പി അധികൃതർ വിശദീകരിച്ചു.

ചെറുപുഴ:ചെറുപുഴ കാനംവയലിൽ കാട്ടാനക്കൂട്ടം കൃഷി നശിപ്പിച്ചു.കർണാടക വനത്തിൽ നിന്നെത്തിയ കാട്ടാനക്കൂട്ടമാണ് കാനംവയൽ ഇടക്കോളനിയിലെ കൃഷിയിടത്തിൽ വ്യാപക നാശം വരുത്തിയത്.ചൊവ്വാഴ്ച രാത്രി കോളനിയിലെത്തിയ കാട്ടാനക്കൂട്ടം കമുക്,തെങ്ങ്,വാഴ, റബ്ബർ തുടങ്ങിയവ നശിപ്പിച്ചു. പതിനാലുകുടുംബങ്ങളാണ് ഇവിടെ താമസിക്കുന്നത്.ഇതിൽ ഏഴുകുടുംബങ്ങൾ പട്ടികവർഗ വിഭാഗത്തിൽപ്പെട്ടവരാണ്.ഇവർ താമസിക്കുന്ന സ്ഥലത്തിന്റെ ഒരതിര് കർണാടക ഫോറെസ്റ്റും മറുവശം കാര്യങ്കോട് പുഴയുമാണ്.ഇവിടെ കാട്ട് മൃഗങ്ങളിൽ നിന്നും രക്ഷനേടാൻ സ്ഥാപിച്ച സൗരോർജവേലികൾ കാടുകയറി നശിച്ച നിലയിലാണ്.

പത്തനംതിട്ട:കൊച്ചിയിൽ നടി ആക്രമിക്കപ്പെട്ട കേസിൽ ജാമ്യത്തിലിറങ്ങിയ നടൻ ദിലീപ് ശബരിമലയിൽ ദർശനം നടത്തി.ഇന്ന് പുലർച്ചെ ആറുമണിയോടെയാണ് ദിലീപ് സന്നിധാനത്ത് എത്തിയത്.സോപാനത്തും മാളികപ്പുറത്തും ദർശനം നടത്തിയ ശേഷം മേൽശാന്തിയെ കണ്ടതിനു ശേഷമാണ് ദിലീപ് മടങ്ങിയത്.സഹോദരൻ അനൂപ്,സഹോദരി ഭർത്താവ്,ഗണേഷ് കുമാറിന്റെ പി.എ എന്നിവരോടൊപ്പമാണ് ദിലീപ് ശബരിമലയിലെത്തിയത്.അതേസമയം ദിലീപിനെ ഒന്നാം പ്രതിയാക്കി കുറ്റപത്രം സമർപ്പിക്കാനുള്ള ഒരുക്കത്തിലാണ് അന്വേഷണ സംഘം.ഇതിന്റെ മുന്നോടിയായി അന്വേഷണ സംഘത്തിന്റെ പ്രത്യേക യോഗവും ഇന്ന് ചേരുന്നുണ്ട്.

കാഞ്ഞങ്ങാട്:കാഞ്ഞങ്ങാട് നഗരത്തിലെ ഐസ്ക്രീം പാർലറിൽ തീപിടുത്തം.ബസ്സ്റ്റാൻഡ് പരിസരത്തെ കൂൾ ലാൻഡ് ബേക്കറി ആൻഡ് ഐസ്ക്രീം പാർലറിലാണ് തീപിടുത്തം ഉണ്ടായത്.ഇന്ന് രാവിലെ എട്ടുമണിയോട് കൂടി ഐസ്ക്രീം പാർലറിന്റെ അടച്ചിട്ട ഷട്ടറിലൂടെ പുക ഉയരുന്നത് കണ്ട നാട്ടുകാർ അഗ്നിശമന സേനയെ വിവരമറിയിക്കുകയായിരുന്നു. അസിസ്റ്റന്റ് സ്റ്റേഷൻ ഓഫീസർ ഗോപാലകൃഷ്ണൻ മാവിലയുടെ നേതൃത്വത്തിലെത്തിയ അഗ്നിശമനസേന കടയുടെ പൂട്ട് തകർത്ത് അകത്തു കയറി രക്ഷാപ്രവർത്തനം നടത്തുകയായിരുന്നു. കടയിലെ രണ്ടു ഫ്രീസറുകൾ കത്തിനശിച്ചു.ഫ്രീസറിൽ നിന്നുള്ള ഷോർട് സർക്യുട്ടാണ് തീപിടുത്തത്തിന് കാരണമെന്ന് സംശയിക്കുന്നു.