Full Grid

തിരുവനന്തപുരം:വളർത്തു മുയലിനെ കശാപ്പുചെയ്യുന്നത് നിരോധിച്ചുകൊണ്ടുള്ള ഉത്തരവിൽ കേന്ദ്ര ഭക്ഷ്യ സുരക്ഷാ ഗുണനിലവാര അതോറിറ്റി ഭേദഗതി വരുത്തി.ഇറച്ചിക്കായി വളർത്തുന്ന മുയലുകളെ കൊല്ലാൻ അനുമതിയായി.2014 ലാണ് അതോറിറ്റി ആട്,പന്നി,കാള,പോത്ത് എന്നീ വർഗങ്ങളിൽ പെട്ടവയല്ലാതെ ഒരുമൃഗത്തെയും ഇറച്ചിക്കായി കൊല്ലാൻ പാടില്ല എന്ന ഉത്തരവിറക്കിയത്.കേരളത്തിൽ ഇത് ഏറ്റവും കൂടുതൽ ബാധിച്ചത് മുയൽ കർഷകരെയാണ്. ആയിരക്കണക്കിന് കർഷകർ നബാർഡിൽ നിന്നും മറ്റും വായ്പ്പയെടുത്ത് മുയൽ കൃഷി നടത്തുന്നുണ്ട്.ഉത്തരവ് ഇറങ്ങിയതോടെ പല യൂണിറ്റുകളും പൂട്ടിപ്പോവുകയും ചെയ്തു.ഈ സാഹചര്യത്തിലാണ് തിരൂരിലെ ആഷിയാന മുയൽ ഫാമിന്റെ ഉടമ ഡോ.മിഗ്ദാദ് പ്രധാനമന്ത്രിക്കും കേന്ദ്ര ഭക്ഷ്യ സുരക്ഷാ അതോറിറ്റിക്കും കത്തയച്ചത്.ഇന്ത്യയിൽ കശാപ്പിനായി ഉപയോഗിക്കുന്നത് ഇറക്കുമതി ചെയ്ത വിദേശയിനം മുയലുകളെയാണെന്നും ഇന്ത്യൻ വനങ്ങളിൽ കണ്ടുവരുന്ന വംശനാശ ഭീഷണി മുയലുകളെ അല്ല എന്നും അദ്ദേഹം അറിയിച്ചു.കർഷകരുടെ അപേക്ഷ പ്രകാരം കേരള സർക്കാരും ചില നീലക്കങ്ങൾ നടത്തി.ഇതേ തുടർന്നാണ് പുതുക്കിയ വിജ്ഞാപനത്തിൽ  കശാപ്പുചെയ്യാൻ അനുമതിയുള്ള മൃഗങ്ങളുടെ പട്ടികയിൽ മുയലിനെക്കൂടി ചേർത്തത്.

കല്യാശ്ശേരി:മാങ്ങാട്ട് എ ടി എം കൗണ്ടർ തകർത്ത് പണം കവർന്നു.ദേശീയപാതയ്ക്കരികിലുള്ള ഫെഡറൽ ബാങ്കിന്റെ ഇന്ത്യ വൺ എ ടി എം കൗണ്ടർ തകർത്താണ് പണം കവർന്നത്.20,000 രൂപയോളം നഷ്ട്ടപ്പെട്ടതായാണ് കരുതുന്നത്.ഗ്യാസ് കട്ടർ ഉപയോഗിച്ചാണ് എ ടി എം കൌണ്ടർ തകർത്തത്.തിങ്കളാഴ്ച രാവിലെ എ ടി എം കൗണ്ടറിന്റെ ഷട്ടർ പകുതിയോളം തുറന്ന നിലയിൽ കണ്ടതിനെ തുടർന്ന്  കെട്ടിടമുടമ ബാങ്ക് ഉദ്യോഗസ്ഥരെ വിവരമറിയിക്കുകയായിരുന്നു.തുടർന്ന് ബാങ്ക് ഉദ്യോഗസ്ഥർ പോലീസിൽ വിവരമറിയിച്ചു.പോലീസ് നടത്തിയ പരിശോധനയിലാണ് കവർച്ച നടന്നതായി കണ്ടെത്തിയത്.വളരെ കുറച്ചു തുക മാത്രമേ ഈ എ ടി എം കൗണ്ടറിൽ നിറയ്ക്കാറുള്ളു.ഒക്ടോബർ 21 ന് 60,000 രൂപയാണ് ഇവിടെ നിറച്ചത്.അതിൽ 40,000 രൂപ പിൻവലിച്ചിരുന്നു.ബാക്കി തുകയാണ് നഷ്ടപ്പെട്ടത്.തിങ്കളാഴ്ച പുലർച്ചയോടെ ഒരു നാഷണൽ പെർമിറ്റ് ലോറി എ ടി എം കൗണ്ടറിനു മുൻപിൽ വളരെനേരം നിർത്തിയിട്ടിരുന്നതായി ചിലർ പോലീസിൽ അറിയിച്ചിട്ടുണ്ട്. ഇതിനെ തുടർന്ന് എ ടി എം കൗണ്ടറിനു മുകളിലുള്ള പാപ്പിനിശ്ശേരി സഹകരണ ബാങ്കിന്റെ സിസിടിവി ദൃശ്യങ്ങൾ പോലീസ് പരിശോധിച്ചു.ഫോറൻസിക് വിദഗ്ദ്ധരും തെളിവെടുത്തിട്ടുണ്ട്.

തളിപ്പറമ്പ്:കീഴാറ്റൂർ ബൈപാസിനെതിരെ നടന്ന ഒന്നാം ഘട്ട സമരം അവസാനിച്ചുവെങ്കിലും പ്രശ്നനങ്ങൾ ഇനിയും ഒഴിവായിട്ടില്ല.സമരം മുമ്പത്തേതിനേക്കാൾ ശക്തമാക്കാനുള്ള ഒരുക്കമാണ് നടക്കുന്നത്.വയൽക്കിളികൾക്കൊപ്പം ഇപ്പോൾ പ്രദേശത്തെ നാട്ടുകാരും ബൈപ്പാസിനെതിരെ ശക്തമായി രംഗത്തു വന്നിരിക്കുകയാണ്.തങ്ങളുടെ പ്രദേശത്തെ തോടും വയലും റോഡിനായി വിട്ടുതരില്ല എന്നാണ് പ്രതിഷേധക്കാർ പറയുന്നത്.രണ്ട് ആരാധനാലയങ്ങളും ഇതിനായി തകർക്കപ്പെടുമെന്ന ഭീതിയും ഇവർക്കുണ്ട്.വയൽ നികത്തുന്നതിനെതിരെ ഈ മാസം 24 ന് വൈകിട്ട് നാലുമണിക്ക് കീഴാറ്റൂർ വയൽക്കരയിൽ പ്രതിഷേധജ്വാല തെളിയിക്കും.തുടർന്ന് ഭാവി പരിപാടികൾ ആസൂത്രണം ചെയ്യും.ഇതേ ദിവസം വൈകുന്നേരം അഞ്ചുമണിക്ക് സമരപ്പന്തലിനു സമീപം മനുഷ്യച്ചങ്ങല തീർത്ത് വയൽക്കിളികൾ രണ്ടാംഘട്ട സമരത്തിന് തുടക്കമിടും. നാട്ടുകാരുടെ ഈ പ്രതിഷേധങ്ങളെ എങ്ങനെ നേരിടുമെന്ന് അറിയാതെ വിഷമിക്കുകയാണ് ജനപ്രതിനിധികളും ഉദ്യോഗസ്ഥരും.