അഹമ്മദാബാദ്: ഗോരക്പുർ സംഭവത്തിനു പിന്നാലെ വീണ്ടും ആശുപത്രിയിൽ കൂട്ടശിശുമരണം.ഇത്തവണ ബിജെപി ഭരിക്കുന്ന ഗുജറാത്തിലെ അഹമ്മദാബാദിലായിരുന്നു സംഭവം. വെള്ളിയാഴ്ച അർധരാത്രി അഹമ്മദാബാദിലെ സിവിൽ ആശുപത്രിയിൽ ഒമ്പത് നവജാത ശിശുക്കളാണ് മരിച്ചത്.ഇതിൽ ആറു കുട്ടികളെ ലുണാവാട,സുരേന്ദ്രനഗർ,വീരമംഗം,ഹിമ്മത്‌നഗർ എന്നിവിടങ്ങളിലെ ആശുപത്രിയിൽ നിന്ന് വിദഗ്ദ്ധ ചികിത്സയ്ക്കായി അഹമ്മദാബാദിലെ ആശുപത്രിയിൽ എത്തിച്ചതാണ്.അഞ്ചു കുട്ടികൾ തീവ്രപരിചരണ വിഭാഗത്തിൽ ചികിത്സയിലാണ്. ഈ കുട്ടികളുടെ നിലയും ഗുരുതരമാണ്. സംഭവത്തെ തുടർന്ന് ആശുപത്രിയിൽ വലിയ പോലീസ് സുരക്ഷയാണ് ഏർപ്പെടുത്തിയിരിക്കുന്നത്.തൂക്കക്കുറവ്,ശ്വാസതടസ്സം തുടങ്ങിയ ഗുരുതര ആരോഗ്യ പ്രശ്നങ്ങൾ നേരിടുന്ന കുട്ടികളെ യാണ് ഇവിടെ ചികിത്സയ്ക്കായി കൊണ്ടുവന്നത്. തിരഞ്ഞെടുപ്പുകാലത്തു ബിജെപി സർക്കാരിന് കനത്ത വെല്ലുവിളിയാണ് ശിശുമരണങ്ങൾ.
