തിരുവനന്തപുരം: ഒൻപതാം ക്ലാസിൽ തോൽക്കുന്ന കുട്ടികൾക്കായി സേ പരീക്ഷ നടത്താൻ അനുമതി നൽകി സംസ്ഥാന സർക്കാർ ഉത്തരവായി. സംസ്ഥാന ബാലാവകാശസംരക്ഷണ കമ്മീഷന്‍റെ ശിപാർശയെ ത്തുടർന്നാണ് നടപടി.ഇതനുസരിച്ച് ഒൻപതാം ക്ലാസ്സിൽ തോൽക്കുന്ന വിദ്യാർത്ഥികൾക്ക് മേയ് മാസത്തിൽ സേ പരീക്ഷ നടത്തി അർഹതപ്പെട്ടവർക്ക് ജൂണ്‍ മാസത്തിൽ തന്നെ പത്താം ക്ലാസിലേക്ക് സ്ഥാനക്കയറ്റം നൽകാമെന്നു പൊതുവിദ്യാഭ്യാസ ഡയറക്ടറും നിർദേശിച്ചിരുന്നു.
മലപ്പുറം:പെരിന്തൽമണ്ണയിൽ നിന്നും ഒരുകോടി പത്തുലക്ഷം രൂപയുടെ കുഴല്‍പ്പണം പോലീസ് പിടികൂടി. സംഭവത്തില്‍ കൈപ്പുറം സ്വദേശി സൈനുദ്ദീന്‍ എന്നയാള്‍ പിടിയിലായിട്ടുണ്ട്. തമിഴ്‌നാട്ടില്‍നിന്ന് പെരിന്തല്‍മണ്ണയിലേക്ക് പണം കൊണ്ടുവരുമ്പോഴാണ് ഇയാൾ പിടിയിലായത്.
തലശ്ശേരി:കണ്ണൂർ തലശേരിയിൽ അനധികൃതമായി കടത്താൻ ശ്രമിച്ച 600 കുപ്പി മദ്യവുമായി യുവാവിനെ എക്സൈസ് അറസ്റ്റ് ചെയ്തു. പാലക്കാട് സ്വദേശി മുഹമ്മദ് ഷർജിനെയാണ് എക്സൈസ് സംഘം പിടികൂടിയത്. ഇയാളെ ചോദ്യം ചെയ്തുവരികയാണ്. എങ്ങോട്ടേയ്ക്കു കടത്തുകയായിരുന്ന മദ്യമാണ് പിടിച്ചെടുത്തതെന്നു വ്യക്തമായിട്ടില്ല.
ന്യൂഡൽഹി:ഹോട്ടൽ ഭക്ഷണത്തിനുള്ള ജി എസ് ടി അഞ്ചു ശതമാനമാക്കി കുറച്ചു.ഇതോടെ ഹോട്ടൽ ഭക്ഷണത്തിന് വില കുറയും .ഇന്നലെ ഗുവാഹത്തിയിൽ ചേർന്ന ജി എസ് ടി കൗൺസിലിലാണ് ഇത് സംബന്ധിച്ചുള്ള തീരുമാനം ഉണ്ടായത്.പഞ്ചനക്ഷത്ര ഹോട്ടലുകൾക്ക് നികുതി 28 ശതമാനമായി തുടരും.നവംബർ 15 മുതൽ പുതുക്കിയ നിരക്ക് നിലവിൽ വരും.ജി എസ് ടി നിരക്കിൽ വലിയ വിമർശനങ്ങൾ നേരിടേണ്ടി വന്നതോടെ 117 ഉത്പന്നങ്ങളുടെ നികുതി 28 ശതമാനത്തിൽ നിന്നും 18 ശതമാനമായി കുറച്ചിട്ടുണ്ട്.ഇനി മുതൽ 28 ശതമാനം നികുതി 50 ഉത്പന്നങ്ങൾക്ക് മാത്രമാകും ബാധകമാവുക. അതേസമയം ഇത്രയധികം ഉത്പന്നങ്ങളുടെ നികുതി കുറയ്ക്കുന്നത് രാജ്യത്തിൻറെ വാർഷിക വരുമാനത്തിൽ വർഷം 20,000 കോടി രൂപയുടെ കുറവുണ്ടാക്കിയേക്കും.അതിനാൽ നികുതി ഘടന മാറ്റുന്നതിന് സമയമെടുക്കുമെന്ന് ജി എസ് ടി നെറ്റ്‌വർക്ക് സംബന്ധിച്ച മന്ത്രിതല സമിതിയുടെ കൺവീനറും ബീഹാർ ഉപമുഖ്യമന്ത്രിയുമായ സുശീൽ കുമാർ മോഡി പറഞ്ഞു.
കൊച്ചി:ജല അതോറിറ്റി എംഡി ഷൈനാമോൾക്ക് അറസ്റ്റ് വാറണ്ട്.സംസ്ഥാന പോലീസ് മേധാവിക്കാണ് കോടതി നിർദേശം നൽകിയിരിക്കുന്നത്.ഈ മാസം പതിനഞ്ചിന് അറസ്റ്റ് ചെയ്തു കോടതിയിൽ ഹാജരാക്കാനാണ് നിർദേശം.ജല അതോറിട്ടി കരാർ എടുത്തിട്ടുള്ള ചെന്നൈ ആസ്ഥാനമായുള്ള ഇ പി ഐ എൽ എന്ന കമ്പനിയാണ് കോടതിയലക്ഷ്യ ഹർജി നൽകിയത്. കോടതിയിൽ നേരിട്ട് ഹാജരാകുന്നതിൽ നിന്നും ഇളവ് ലഭിക്കണമെന്ന് ആവശ്യപ്പെട്ട് ഷൈനാമോൾ സമർപ്പിച്ച ഹർജി തള്ളിക്കൊണ്ടാണ് കോടതി അറസ്റ്റ് വാറണ്ട് പുറപ്പെടുവിച്ചത്.ജല അതോറിറ്റിയുടെ കരാർ ജോലിയേറ്റ കമ്പനിയായ ഇ പി ഐ എൽ ന് ലേബർ ചിലവ് പുതുക്കി നൽകാനുള്ള ഹൈക്കോടതി നിർദേശം പാലിക്കാത്തതിനാലാണ് ഷൈനാമോൾക്കെതിരെ കോടതി നടപടി സ്വീകരിച്ചത്.വർധിച്ചുവരുന്ന ചിലവുകൾ കണക്കിലെടുത്ത് കരാറുകാർക്ക് ലേബർ കൂലി പുതുക്കി നൽകണമെന്ന് ഹൈക്കോടതി നേരത്തെ ഉത്തരവിട്ടിരുന്നു.എന്നാൽ ഇതിനെതിരെ സംസ്ഥാന ജല അതോറിട്ടി ഡിവിഷൻ ബെഞ്ചിൽ അപ്പീൽ നൽകിയെങ്കിലും തള്ളിപ്പോയി.എന്നിട്ടും കരാറുകാർക്ക് കൂലി പുതുക്കി നല്കാൻ ജല അതോറിട്ടി തയ്യാറായില്ല. ലേബർ ചാർജ് പുതുക്കി നൽകാമെന്ന് കമ്പനിയുമായുള്ള കരാറിൽ പറഞ്ഞിട്ടില്ലെന്നാണ് ജല അതോറിറ്റിയുടെ വാദം.ഇതിനെതിരെ എൻജിനീയറിങ് പ്രോജെക്ടസ് ഓഫ് ഇന്ത്യ ലിമിറ്റഡ് സീനിയർ മാനേജർ ശ്രീനേഷാണ് കോടതിയലക്ഷ്യ ഹർജി സമർപ്പിച്ചത്.
ന്യൂഡൽഹി:വിമർശനങ്ങൾക്ക് നടുവിൽ ചരക്കുസേവന നികുതിയിൽ മാറ്റങ്ങൾ വരുത്തി ജി എസ് ടി കൗൺസിൽ.117 ഇനങ്ങളുടെ ചരക്കു സേവന നികുതി (ജിഎസ്ടി) 28 ശതമാനത്തിൽനിന്നു 18 ശതമാനമായി കുറച്ചു. ഇന്നു ചേർന്ന ജിഎസ്ടി കൗണ്‍സിലിലാണ് ഇതുസംബന്ധിച്ച തീരുമാനം കൈക്കൊണ്ടത്. ചോക്കലേറ്റ്,ച്യുയിങ്ങ്ഗം,സോപ്പുപൊടി,ആഫ്റ്റർഷെവ് ലോഷൻ,മാർബിൾ, ഷേവിങ്ങ് സ്പ്രേകൾ,ഗ്രാനൈറ്റ്,മേക്കപ്പ് സാധനങ്ങൾ,ഷാംപൂ എന്നിവയ്ക്കാണ് പ്രധാനമായും വിലകുറയുക.പുകയില ഉത്പന്നങ്ങൾ, സിഗരറ്റ്, കോളകൾ, വാഷിംഗ് മെഷീൻ, റഫ്രിജറേറ്റർ, എയർകണ്ടീഷണർ, പെയിന്‍റ്, സിമന്‍റ് എന്നിവയുടെ നികുതിയിൽ മാറ്റമില്ല. ഇവയെ 28 ശതമാനം ജിഎസ്ടിയിൽ തന്നെ നിലനിർത്തി.50 ഉൽപ്പന്നങ്ങൾക്ക് മാത്രം ഇനി ഉയർന്ന നികുതി നൽകിയാൽ മതിയാകും.റിട്ടേണ്‍ ഫയലിംഗ് വൈകിയാലുള്ള പിഴ ദിവസം 200 രൂപയിൽനിന്നു 50 രൂപയായും കുറച്ചു.
കാസർകോഡ്:പോലീസ് സ്റ്റേഷനുകൾ ആക്രമിക്കാൻ മാവോയിസ്റ്റുകൾ പദ്ധതിയിടുന്നുണ്ടെന്ന കേന്ദ്ര രഹസ്യാന്വേഷണ ഏജൻസികളുടെ മുന്നറിയിപ്പിനെ തുടർന്ന് കാസർകോഡ് ജില്ലയിൽ ജാഗ്രത നിർദേശം നൽകി.കാസർകോഡ് പോലീസ് സബ് ഡിവിഷൻ പരിധിയിലുള്ള ആദൂർ, ഹൊസ്ദുർഗ്,ചിറ്റാരിക്കാൽ, വെള്ളരിക്കുണ്ട് എന്നീ സ്റ്റേഷനുകൾക്കാണ് ജാഗ്രതാ നിർദേശം നൽകിയിട്ടുള്ളത്.ആക്രമണ ഭീഷണി കണക്കിലെടുത്ത് ഏതെങ്കിലും തരത്തിൽ അക്രമണമുണ്ടായാൽ നേരിടുന്നതിനായി രക്ഷാമതിൽ പണികഴിപ്പിച്ചിട്ടുണ്ട്.മാവോയിസ്റ്റ് നേതാക്കളായ കുപ്പുസ്വാമിയും ലതയും കഴിഞ്ഞ വർഷം നവംബർ 24 ന് നിലബൂർ വനത്തിൽ വെടിയേറ്റ് മരിച്ചതിന്റെ ഒന്നാം വാർഷിക ദിനമായ നവംബർ 24 നോ അതിനു മുൻപോ ആക്രമണം ഉണ്ടാകാൻ സാധ്യതയുണ്ടെന്നായിരുന്നു ഇന്റലിജൻസ് റിപ്പോർട്ട്.കാസർകോഡ് ജില്ലയേക്കാൾ കൂടുതൽ ആക്രമണ ഭീഷണി കണ്ണൂർ,വയനാട് ജില്ലകളിലെ പോലീസ് സ്റ്റേഷനുകൾക്കാണ്.
തിരുവനന്തപുരം:തിരുവതാംകൂർ ദേവസ്വം ബോർഡിന്റെ കാലാവധി രണ്ടു വർഷമാക്കി വെട്ടിച്ചുരുക്കി സർക്കാർ ഓർഡിനൻസ് പുറത്തിറക്കി.ഇന്ന് ചേർന്ന പ്രത്യേക മന്ത്രിസഭാ യോഗം ഓർഡിനൻസിന് അംഗീകാരം നൽകി. മന്ത്രിസഭ അംഗീകരിച്ച ഓർഡിനൻസ് ഗവർണറുടെ അംഗീകാരത്തിനായി അയച്ചു.സർക്കാർ ഓർഡിനൻസോടെ നിലവിലെ ഭരണ സമിതിക്ക് ഇന്നു കൂടി മാത്രമേ അധികാരത്തിൽ തുടരാൻ കഴിയൂ എന്ന സ്ഥിതിയായി. ശനിയാഴ്ച പ്രയാർ ഗോപാലകൃഷ്ണൻ പ്രസിഡന്‍റായ തിരുവതാംകൂർ ദേവസ്വം ബോർഡിന്റെ കാലാവധി തീരും. ദേവസ്വം ബോർഡ് അംഗങ്ങളുടെ സിറ്റിംഗ് ഫീസും ഓണറേറിയവും ഇനി സർക്കാരാണ് തീരുമാനിക്കുക. നിലവിൽ 8,000 രൂപ മാത്രമാണ് ഓണറേറിയവും സിറ്റിംഗ് ഫീസും ചേർന്ന് നൽകുന്നത്.
ബെംഗളൂരു:ടിപ്പു ജയന്തി ആഘോഷങ്ങളുടെ പശ്ചാത്തലത്തിലുള്ള സംഘർഷം കണക്കിലെടുത്ത് പോലീസ് കുടകിൽ നിരോധനാജ്ഞ പ്രഖ്യാപിച്ചു.ആഘോഷങ്ങൾക്കായി സംസ്ഥാനത്ത് കനത്ത സുരക്ഷയാണ് ഏർപ്പെടുത്തിയിരിക്കുന്നത്.നവമ്പർ പത്തിന് ടിപ്പു ജയന്തി ആഘോഷിക്കാനുള്ള കർണാടക സർക്കാരിന്റെ തീരുമാനത്തെ ബിജെപി ഇന്നലെയും എതിർത്തിരുന്നു.നിരോധനാജ്ഞ ലംഘിച്ച് കുടകിലും ഹൂബ്ലിയിലും പ്രതിഷേധ പ്രകടനം നടത്തിയ ബിജെപി പ്രവർത്തകരെ പോലീസ് അറസ്റ്റ് ചെയ്തു നീക്കി.ഇവിടെ സർക്കാർ ബസ്സുകൾക്ക് നേരെ കല്ലേറുണ്ടായി.ടിപ്പു സുൽത്താൻ രാജ്യ സ്നേഹിയായിരുന്നുവെന്നും ബ്രിടീഷുകാർക്കെതിരെ നിരവധി യുദ്ധങ്ങൾ ചെയ്തിട്ടുണ്ടെന്നും കോൺഗ്രസ് പറയുന്നു.എന്നാൽ ടിപ്പു നിരവധി കുടകരെ കൊന്നൊടുക്കിയ ക്രൂരനായ ഭരണാധികാരി ആയിരുന്നു എന്നാണ് ബിജെപി ആരോപിക്കുന്നത്.
കൂത്തുപറമ്പ്: കേസന്വേഷണത്തിനായി കൂത്തുപറമ്പിലെ സ്വകാര്യ ധനകാര്യ സ്ഥാപനത്തിലെത്തിയ പോലീസ് സംഘത്തിനു നേരേ അക്രമം. കതിരൂർ സ്റ്റേഷനിലെ എസ്ഐ ഉൾപ്പെടെ നാല് പോലീസുകാർക്ക് പരിക്കേറ്റു. ഇന്നലെ ഉച്ചയോടെ കൂത്തുപറമ്പ് ഗോകുലത്തെരുവിലെ ജാനകി ഫൈനാൻസിലാണ് സംഭവം. കതിരൂർ എസ്ഐ സി.ഷാജു (40) ജൂണിയർ എസ്ഐ പി.എം.സുനിൽകുമാർ (35), സീനിയർ സിവിൽ പോലീസ് ഓഫീസർ വി.സുനിൽ (34), സിവിൽ പോലീസ് ഓഫീസർ കെ.പി.സന്തോഷ് (33)എന്നിവർക്കാണ് പരിക്കേറ്റത്.അതെ സമയം സ്ഥാപനത്തിലെത്തിയ പോലീസ് സംഘം അതിക്രമം നടത്തിയെന്ന് സ്ഥാപനമുടമ ആരോപിച്ചു.സ്ഥാപനമുടമയുടെ രണ്ടു സഹോദരങ്ങളെ പരിക്കേറ്റ് ആശുപത്രിയിൽ പ്രവേശിപ്പിച്ചു.ഒരാഴ്ച മുമ്പ് കതിരൂർ പോലീസ് സ്റ്റേഷൻ പരിധിയിലെ നായനാർ റോഡിൽ വച്ചു പോലീസ് പരിശോധനയ്ക്കിടെ ഒരു ബൈക്ക് പോലീസ് കൈകാണിച്ചിട്ടും നിർത്താതെ പോയിരുന്നു. തുടർന്ന് ബൈക്കിന്‍റെ നമ്പർ കേന്ദ്രീകരിച്ച് പോലീസ് അന്വേഷണം നടത്തുകയും ഉടമസ്ഥനെ കണ്ടെത്തുകയും ചെയ്യുകയും ഉടമയോട് സ്റ്റേഷനിൽ വരാൻ ആവശ്യപ്പെടുകയും ചെയ്തിരുന്നു. എന്നാൽ ഒരാഴ്ചയായിട്ടും ഇയാൾ സ്റ്റേഷനിലെത്താത്തതിനാൽ ഫോണിൽ ബന്ധപ്പെട്ടപ്പോൾ ഫോൺ സ്വിച്ച് ഓഫായിരുന്നു. ഇയാളെ കുറിച്ച് അന്വേഷിക്കാൻ കൂത്തുപറമ്പിലെ ജാനകി ഫൈനാൻസിൽ ഫോണിൽ ബന്ധപ്പെട്ടപ്പോൾ സ്ഥാപനത്തിലെ ജീവനക്കാരനായ ബിനോയ് പോലീസിനെ അസഭ്യം പറയുകയായിരുന്നുവെന്നുമാണ് പോലീസ് നല്കുന്ന വിവരം .ബിനോയിയെ അന്വേഷിച്ചാണ് കതിരൂർ എസ്ഐ.യുടെ നേതൃത്വത്തിൽ പോലീസ് സംഘം ഇന്നലെ ഉച്ചയോടെ ജാനകി ഫൈനാൻസിൽ എത്തിയത്. എന്നാൽ ഫൈനാൻസ് ജീവനക്കാർ തങ്ങളെ ആക്രമിക്കുകയായിരുന്നുവെന്നാണ് പോലീസ് പറയുന്നത്. അതേ സമയം, ബിനോയിയെ അന്വേഷിച്ച് സ്ഥാപനത്തിൽ അതിക്രമിച്ചു കയറിയ പോലീസ് സംഘം തങ്ങളെ മർദ്ദിക്കുകയായിരുന്നുവെന്നും ഓഫീസ് അടിച്ചു തകർക്കുകയാണുണ്ടായതെന്നും സ്ഥാപന അധികൃതർ പറയുന്നു.സംഭവവുമായി ബന്ധപ്പെട്ട് സ്ഥാപനത്തിലെ ജീവനക്കാരായ രണ്ടു പേരെ കൂത്തുപറമ്പ് പോലീസ് കസ്റ്റഡിയിലെടുത്തു. എന്നാൽ അകാരണമായി കസ്റ്റഡിയിലെടുത്തതിൽ പ്രതിഷേധിച്ചും ഇവരെ വിട്ടയക്കണമെന്നാവശ്യപ്പെട്ട് കൊണ്ടും ബിജെപി പ്രവർത്തകർ കൂത്തുപറമ്പ് പോലീസ് സ്റ്റേഷൻ ഉപരോധിച്ചു. പോലീസ് സ്റ്റേഷൻ ഉപരോധിച്ചതിൽ കണ്ടാലറിയുന്ന അൻപതോളം പേർക്കെതിരെ പോലീസ് കേസെടുത്തു.പോലീസിനെ മർദിച്ചതിലും കൃത്യ നിർവഹണം തടസ്സപ്പെടുത്തിയതിലും ജാനകി ഫിനാന്സിയേഴ്സ് ഉടമ ടി.ബൈജു,പി.വിപിൻ എന്നിവരെ കൂത്തുപറമ്പ് പോലീസ് അറസ്റ്റ് ചെയ്തു.