Full Grid

കാഞ്ഞങ്ങാട്:കെഎസ്ആർടിസി ഡിപ്പോയിൽ നിർത്തിയിട്ട ബസ് നീങ്ങി മറ്റൊരു ബസ്സിനിടിച്ച് രണ്ടു മെക്കാനിക്ക് ജീവനക്കാർക്ക് പരിക്ക്.കൊടക്കാട് പൊള്ളപ്പൊയിലിലെ ദീപേഷ്,പയ്യന്നൂർ കാങ്കോലിലെ ബിജു എന്നിവർക്കാണ് പരിക്കേറ്റത്.ദീപേഷിനെ മംഗളൂരു ആസ്പത്രിയിലും ബിജുവിനെ കാഞ്ഞങ്ങാട് ജില്ലാ ആശുപത്രിയിലും പ്രവേശിപ്പിച്ചു. കാഞ്ഞങ്ങാട് കെഎസ്ആർടിസി ഡിപ്പോയിൽ വെള്ളിയാഴ്ച ഉച്ചയോടെയാണ് അപകടം.അറ്റകുറ്റപ്പണിക്കിടെ ജാക്കി തെന്നി നീങ്ങിയതാണ് ബസ് നീങ്ങാൻ കാരണമെന്നു പറയുന്നു.രണ്ടാമത്തെ ബസിന്റെ മുൻഭാഗത്ത് കിടന്നു ഗിയർ ബോക്സ് നന്നാക്കുന്ന ജോലി ചെയ്യുകയായിരുന്നു മെക്കാനിക്കുകൾ. ഇതിനിടെ ബസ് നീങ്ങുന്നത് ഇവർ കണ്ടില്ല.രണ്ടു ബസുകളും തമ്മിൽ കൂട്ടിയിടിച്ചപ്പോൾ ഇവർ ബസുകൾക്കിടയിൽ കുടുങ്ങി പോവുകയായിരുന്നു.ഇടിച്ച ബസിനെ പുറകോട്ട് നീക്കിയാണ് ഇവരെ പുറത്തെടുത്തത്.

കാസർകോഡ്:വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന അഞ്ചുവയസ്സുകാരന് തെരുവുനായയുടെ കടിയേറ്റു.തെക്കിൽ ഫെറി ഉക്രമ്പാടി ക്വാർട്ടേഴ്‌സിൽ ജാബിറിനെ മകൻ മുഹമ്മദ് ജമീലിനാണ് നായയുടെ കടിയേറ്റത്.ആക്രമണത്തിൽ തലയ്ക്ക് ഗുരുതരമായി പരിക്കേറ്റ കുട്ടിയെ കാസർകോഡ് ജനറൽ ആശുപത്രിയിൽ പ്രാഥമിക ചികിത്സയ്ക്ക് ശേഷം മംഗളൂരുവിലെ ആശുപത്രിയിലേക്ക് മാറ്റി.നെറ്റിയുടെ ഭാഗത്തെ തൊലി അറ്റു തൂങ്ങിയ നിലയിലായിരുന്നു.

നാദാപുരം:നാദാപുരത്ത് സ്കൂൾ വിദ്യാർത്ഥിക്ക് അദ്ധ്യാപകന്റെ ക്രൂരമർദനം.പെരിങ്ങത്തൂർ എൻഎഎം ഹൈസ്കൂൾ ഒൻപതാം ക്ലാസ് വിദ്യാർത്ഥിയായ റിജാസിനാണ് അദ്ധ്യാപകന്റെ മർദനമേറ്റത്.മർദനത്തിൽ പരിക്കേറ്റ വിദ്യാർത്ഥിയെ ആശുപത്രിയിൽ പ്രവേശിപ്പിച്ചു.സ്കൂളിലെ ഐടി അദ്ധ്യാപകനാണ് വിദ്യാർത്ഥിയെ ചൂരൽ കൊണ്ട് മർദിച്ചത്.അദ്ധ്യാപകൻ ക്ലാസ്സെടുക്കുന്നതിനിടെ ചിരിച്ച മറ്റു വിദ്യാർത്ഥികളെ കാണിച്ചുകൊടുത്തില്ല എന്നതിനാണ് റിജാസിനെ മർദിച്ചത്.സംഭവത്തിൽ പ്രതിഷേധിച്ച്  എസ്എഫ്ഐ പ്രവർത്തകരുടെ നേതൃത്വത്തിൽ അദ്ധ്യാപകനെതിരെ ശക്തമായ പ്രതിഷേധം നടക്കുകയാണ്. അദ്ധ്യാപകനെതിരെ നടപടി എടുക്കുന്നവരെ പ്രതിഷേധം തുടരുമെന്ന് എസ്എഫ്ഐ പറഞ്ഞു.