Full Grid

കൊച്ചി:നടൻ ദിലീപ് ഇന്ന് ദുബായിയിലെ കരാമയിലേക്ക് തിരിക്കും.ജാമ്യവ്യവസ്ഥയിൽ ഇളവ് ലഭിച്ച ദിലീപ് ഇന്ന് അങ്കമാലി കോടതിയിലെത്തി പാസ്പോർട്ട് കൈപ്പറ്റും.തന്റെ ഉടമസ്ഥതയിലുള്ള ദേ പുട്ട് എന്ന വ്യാപാരസ്ഥാപനത്തിന്റെ ദുബായ് കരാമയിലുള്ള ശാഖയുടെ ഉൽഘാടത്തിനായാണ് ദിലീപ് ദുബായിലേക്ക് പോകുന്നത്.ഇതിനായി നാല് ദിവസത്തെ പ്രത്യേക അനുമതിയാണ് കോടതി ദിലീപിന് നൽകിയിരിക്കുന്നത്.ദിലീപിനൊപ്പം മകൾ മീനാക്ഷിയും ഭാര്യ കാവ്യാ മാധവനും വിദേശത്തേക്ക് പോകുന്നുണ്ട്.ദിലീപിന്റെ സുഹൃത്തും നടനുമായ നാദിർഷായുടെ ഉമ്മയാണ് സ്ഥാപനത്തിന്റെ ഉൽഘാടനം നിർവഹിക്കുക.എന്നാൽ ദിലീപിന്റെ വിദേശയാത്രയെ പോലീസ് സംശയദൃഷ്ടിയോടെയാണ് കാണുന്നത്.ആക്രമിക്കപ്പെട്ട നടിയുടെ ദൃശ്യങ്ങളടങ്ങിയ മൊബൈൽ ഫോൺ വിദേശത്തേക്ക് കടത്തിയതായി പൊലീസിന് സംശയമുണ്ട്.കേസിലെ ഗൂഢാലോചന ദുബായിൽവെച്ചും നടന്നതായി പൊലീസിന് വിവരം ലഭിച്ചിട്ടുണ്ട്.ഈ സാഹചര്യത്തിൽ ദിലീപ് വീണ്ടും വിദേശത്തേക്ക് പോകുന്നത് കേസിനെ ബാധിക്കുമെന്നാണ്‌ പോലീസിന്റെ കണക്കുകൂട്ടൽ.

ശ്രീകണ്ഠപുരം:ഏരുവേശ്ശി സർവീസ് സഹകരണ ബാങ്ക് ഭരണം യുഡിഎഫിൽ നിന്നും എൽഡിഎഫ് പിടിച്ചെടുത്തു.തിരഞ്ഞെടുപ്പിനോടനുബന്ധിച്ച് ചെമ്പേരിയിലും പരിസര പ്രദേശങ്ങളിലും വ്യാപകമായ അക്രമം നടന്നിരുന്നു.വെള്ളിയാഴ്ച വൈകുന്നേരമുണ്ടായ അക്രമങ്ങൾക്ക് ശേഷം ചെമ്പേരിയിലേക്കുള്ള പ്രധാന റോഡുകളെല്ലാം സിപിഎം പ്രവത്തകരുടെ നിയന്ത്രണത്തിലായിരുന്നു.നിലവിൽ ബാങ്ക് ഭരിച്ചിരുന്ന യുഡിഎഫ് അംഗങ്ങൾക്കും വോട്ടർമാർക്കും വോട്ടെടുപ്പ് കേന്ദ്രമായ ചെമ്പേരി സ്കൂളിന് സമീപത്തുപോലും എത്താൻ സാധിച്ചില്ല.

തിരുവനന്തപുരം:മീസിൽസ്-റൂബെല്ല വാക്‌സിനേഷൻ കാലാവധി ഡിസംബർ ഒന്ന് വരെ നീട്ടി.നേരത്തെ നവംബർ 25 വരെയായിരുന്നു കാലാവധി.സർക്കാർ ലക്ഷ്യമിട്ടതിന്റെ 83 ശതമാനം മാത്രമാണ് കുത്തിവെയ്പ്പ് നടന്നത്.തിരുവനന്തപുരം,ആലപ്പുഴ,പത്തനംതിട്ട,കൊല്ലം, കോഴിക്കോട്,ഇടുക്കി എന്നീ ജില്ലകളിൽ മാത്രമാണ് 90 ശതമാനത്തിനു മുകളിൽ കുത്തിവെയ്പ്പ് നടന്നത്.സർക്കാർ മുൻകൈയെടുത്തു പ്രചാരണം നടത്തിയ മലപ്പുറം ജില്ലയിൽ 62 ശതമാനം മാത്രമാണ് കുത്തിവെയ്‌പ്പെടുത്തത്.ഈ സാഹചര്യത്തിലാണ് കുത്തിവെയ്പ്പ് കാലാവധി നീട്ടാനുള്ള തീരുമാനം സർക്കാർ കൈക്കൊണ്ടത്.