Full Grid

കണ്ണൂർ:സർക്കാർ ജീവനക്കാർക്ക് ജോലിക്ക് തടസ്സം നേരിടാതെ ഡോക്റ്ററുടെ സേവനം ലഭ്യമാക്കുന്ന പദ്ധതിയായ ഡോക്റ്റർ അറ്റ് ഓഫീസ് പദ്ധതിക്ക് കണ്ണൂരിൽ തുടക്കം.ദേശീയ ആരോഗ്യ മിഷന്റെ നേതൃത്വത്തിലാണ് ഈ പദ്ധതി നടപ്പിലാക്കുന്നത്.പദ്ധതിയുടെ സംസ്ഥാനതല ഉൽഘാടനം കണ്ണൂർ കളക്റ്ററേറ്റ് ഓഡിറ്റോറിയത്തിൽ ആരോഗ്യമന്ത്രി കെ.കെ ശൈലജ നിർവഹിച്ചു.ആദ്യഘട്ടമായി കണ്ണൂർ സിവിൽ സ്റ്റേഷനും അനുബന്ധ ഓഫീസുകൾക്കും ഡോക്റ്ററുടെ സേവനവും മരുന്നും ലഭ്യമാക്കുന്ന സ്ഥിരം മെഡിക്കൽ യുണിറ്റ് പ്രവർത്തനമാരംഭിച്ചു. രാവിലെ ഒന്പതുമണി മുതൽ വൈകിട്ട് അഞ്ചുമണി വരെ ഈ കേന്ദ്രത്തിൽ സേവനം ലഭ്യമാകും.രാവിലെ ഒന്പതുമണി മുതൽ ഉച്ചയ്ക്ക് ഒരുമണിവരെയാണ് ഡോക്റ്ററുടെ സേവനം ലഭ്യമാകുക.രോഗ പരിശോധന,മരുന്ന് വിതരണം, നെബുലൈസേഷൻ, ഡ്രസിങ്,സ്യുച്ചറിങ്,ഇസിജി എന്നീ  സേവനങ്ങൾ ഈ കേന്ദ്രത്തിൽ ലഭ്യമാകും.കളക്റ്ററേറ്റിലും പരിസരത്തുമായി ജോലി ചെയ്യുന്ന മൂവായിരത്തോളം ജീവനക്കാർക്ക് ഈ സേവനം ലഭിക്കും.

കൂത്തുപറമ്പ്:കതിരൂരിൽ തെരുവുനായയുടെ ആക്രമണത്തിൽ പതിനെട്ടുപേർക്ക് പരിക്ക്. വ്യാഴാഴ്ച വൈകിട്ട് മൂന്നുമണിക്ക് ശേഷം കാരക്കുന്ന്,പുല്ല്യോട്, അഞ്ചാംമൈൽ, കുറ്റ്യേരിച്ചാൽ, പൊക്കായിമുക്ക്എന്നിവിടങ്ങളിൽവെച്ചാണ് നായയുടെ ആക്രമണമുണ്ടായത്. കുറ്റ്യേരിച്ചാൽ സ്വദേശികളായ വി.രാജൻ(65),മാധവി(85),കതിരൂരിലെ റമീസ്(25),രാഘവൻ(75),മോഹനൻ(55),അജിത(45),അതുല്യ(17),മിനാൻ (15),പുല്ല്യോട് സ്വദേശി പ്രവീണ (35),കാരക്കുന്ന് സ്വദേശികളായ മുഹമ്മദ്(68),അഫ്സത്ത്(60),സി.കെ രാധ (53),ഷാഹിന(30),ഷാമിൽ(12),കെ.പി നിർമല(48),സതി(69),ബംഗാൾ സ്വദേശിയായ ബാബു സേട്ട്(20),മേലെ ചൊവ്വ കോട്ടനാട്ടിൽ ബാബു(60) എന്നിവർക്കാണ് നായയുടെ ആക്രമണത്തിൽ പരിക്കേറ്റത്.ഇവർ തലശ്ശേരി ജനറൽ ആശുപത്രിയിൽ ചികിത്സ തേടി.മുഖത്തു കടിയേറ്റ മാധവിയെയും രാഘവനെയും കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.മുറ്റത്തും വഴിയിലും വെച്ചാണ്  എല്ലാവർക്കും കടിയേറ്റത്. പെയിന്റിങ് തൊഴിലാളിയായ ബാബു സേട്ടിന് പണിസ്ഥലത്തുവെച്ചാണ് കടിയേറ്റത്.നായയെ പിന്നീട് നാട്ടുകാർ തല്ലിക്കൊന്നു.

തിരുവനന്തപുരം:ഓഖി ചുഴലിക്കാറ്റിനെ തുടർന്ന് വിഴിഞ്ഞം,പൂന്തുറ,വലിയതുറ തുടങ്ങിയ പ്രദേശങ്ങളിൽ നിന്നും മൽസ്യബന്ധനത്തിനുപോയ നൂറോളം മൽസ്യത്തൊഴിലാളികൾ തിരിച്ചെത്തിയില്ല.29 വള്ളങ്ങളിലായി  നൂറ്റമ്പതോളംപേർ കടലിൽ പോയിട്ടുണ്ടെന്നാണ് കൺട്രോൾ റൂമിലെ കണക്ക്.അതേസമയം പൂന്തുറയിൽ നിന്നും പോയ പതിമൂന്നുപേർ വ്യാഴാഴ്ച രാത്രിയോടെ തീരത്ത് തിരിച്ചെത്തിയിരുന്നു.ഓഖി ചുഴലിക്കാറ്റിന്റെ ഉൾക്കടലിലെ സ്ഥിതി അതിഭീകരമാണെന്ന് രക്ഷപ്പെട്ട മൽസ്യത്തൊഴിലാളികളായ മുത്തപ്പൻ,ശെൽവൻ എന്നിവർ പറഞ്ഞു.തങ്ങൾക്കൊപ്പമുണ്ടായിരുന്ന രണ്ടുപേർക്ക് രക്ഷപെടാൻ കഴിഞ്ഞില്ല. കന്യാകുമാരിയിൽനിന്നുള്ള ബോട്ടുകളാണ് തങ്ങളെ കരയ്‌ക്കെത്തിച്ചത്.മറ്റുള്ളവരെ കുറിച്ച് ഒന്നുമറിയില്ലെന്നും ഇവർ പറഞ്ഞു. കടലിൽ പലരും നീന്തിപ്പോകുന്നത് കണ്ടതായും കന്നാസിലും മറ്റും പിടിച്ച് കടലിൽ പൊങ്ങിക്കിടക്കാൻ പലരും ശ്രമിക്കുന്നതായും രക്ഷപ്പെട്ടവർ പറഞ്ഞു.നാവികസേനയുടെ നാല് കപ്പലുകളും രണ്ടു ഹെലികോപ്റ്ററുകളും ഡോണിയർ വിമാനങ്ങളും കോസ്റ്റ് ഗാർഡും തിരച്ചിൽ ശക്തമാക്കിയിട്ടുണ്ട്. Read more

തിരുവനന്തപുരം:ഓഖി ചുഴലിക്കാറ്റിലും പേമാരിയിലും പെട്ട് തിരുവനന്തപുരത്ത് 150ഓളം മത്സ്യത്തൊഴിലാളികൾ കടലിൽ കുടുങ്ങി.കാണാതായ മൽസ്യത്തൊഴിലാളികൾക്കായി തിരച്ചിൽ ഊർജിതമാക്കി.ആറ് മൽസ്യബന്ധന ബോട്ടുകളെയും മറൈൻ എൻജിനീയറിങ് കപ്പലിനെയുമാണ് കാണാതായിരിക്കുന്നത്.നാവികസേനാ കപ്പലുകളായ ഷാർദുൽ,നിരീക്ഷക്, കബ്രാ,കൽപ്പേനി എന്നിവയുടെ  സഹായത്തോടെയാണ് രക്ഷാപ്രവർത്തനം നടത്തുന്നത്.