കൊച്ചി:പെൻഷൻ മുടങ്ങിയതോടെ ചികിത്സയ്ക്ക് പണമില്ലാതെ കെഎസ്ആർടിസി ജീവനക്കാരൻ മരിച്ചു.പുതുവൈപ്പ് വലിയപറമ്പിൽ വി.വി റോയ്(58) ആണ് മരിച്ചത്.34 വർഷം കെഎസ്ആർടിസി ജീവനക്കാരനായിരുന്ന റോയ് മൂന്നരവർഷം മുൻപാണ് വിരമിച്ചത്.ഈ സമയം ലഭിക്കേണ്ടിയിരുന്ന ആനുകൂല്യങ്ങൾ ഒന്നും ഇയാൾക്ക് ലഭിച്ചില്ലെന്ന് മാത്രമല്ല ആറുമാസമായി പെൻഷനും ലഭിച്ചിരുന്നില്ല.സര്വീസില് നിന്ന് പിരിയുമ്പോള് റോയി എറണാകുളം ബോട്ട് ജെട്ടി ഡിപ്പോയില് സ്റ്റേഷന്മാസ്റ്റര് ഇന്ചാര്ജായിരുന്നു.ഹൃദ്രോഗിയായ റോയ് സർക്കാർ ആശുപത്രികളിൽ ചികിത്സ തേടിയെങ്കിലും പെൻഷന് അർഹതയുള്ളതുകൊണ്ട് ചികിത്സ ഇളവുകളും ലഭിച്ചില്ല.പരിശോധനയിൽ ബൈപാസ് സർജറി വേണമെന്ന് ഡോക്റ്റർമാർ നിർദേശിച്ചിരുന്നെങ്കിലും പണമില്ലാത്തതിനാൽ സർജറിക്ക് വിധേയനാകാനും സാധിച്ചില്ല.തിങ്കളാഴ്ച രാത്രി നെഞ്ചുവേദന അനുഭവപ്പെട്ട റോയിയെ കൊച്ചിയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.
