Full Grid

ന്യൂഡൽഹി:ഹാദിയയുടെ വിവാഹം റദ്ദാക്കിയ ഹൈക്കോടതി വിധി സുപ്രീം കോടതി റദ്ദാക്കി. വിവാഹത്തിന് നിയമസാധുത ഉണ്ടെന്ന് സുപ്രീം കോടതി വ്യക്തമാക്കി.ഹേബിയസ് കോർപ്പസ് ഉപയോഗിച്ച് വിവാഹം റദ്ദാക്കിയ നടപടി തെറ്റാണെന്നും ഹാദിയയ്ക്ക് പഠനം തുടരാമെന്നും സുപ്രീം കോടതി പറഞ്ഞു. അതേസമയം ഷെഫിൻ ജഹാനെതിരായ എൻഐഎ അന്വേഷണം തുടരാമെന്നും സുപ്രീം കോടതി വ്യക്തമാക്കി.വിവാഹം റദ്ദാക്കിയ ഹൈക്കോടതി വിധിക്കെതിരെ ഷെഫിൻ ജഹാനാണ് സുപ്രീം കോടതിയെ സമീപിച്ചത്.ചീഫ് ജസ്റ്റിസ് ദീപക് മിശ്ര ഉൾപ്പെടെയുള്ള മൂന്നംഗ ബെഞ്ചാണ് വിവാഹം സാധുവാണെന്ന് പ്രഖ്യാപിച്ചത്.അതേസമയം താൻ ഹേബിയസ് കോർപ്പസ് ഫയൽ ചെയ്യുമ്പോൾ ഹാദിയ വിവാഹിതയായിരുന്നില്ലെന്ന് ഹദിയയുടെ പിതാവ് അശോകൻ പറഞ്ഞു.കോടതി നിർദേശ പ്രകാരം ഹാദിയയെ ഹാജരാക്കിയപ്പോഴാണ് വിവാഹം കഴിച്ചതായി അറിയിച്ചത്.അതുകൊണ്ടു തന്നെ ഇതൊരു തട്ടിക്കൂട്ട് കല്യാണം ആണെന്നും അശോകൻ പറഞ്ഞു. ഒരു തീവ്രവാദിക്കൊപ്പം മകളെ വിവാഹം ചെയ്ത് അയക്കാൻ ഏതൊരച്ഛനും വിഷമമുണ്ടാകും.പക്ഷെ കോടതി വിധിയെ വിമർശിക്കുന്നില്ല. റിവ്യൂ ഹർജി കൊടുക്കുന്നതിനെപ്പറ്റി ആലോചിക്കുമെന്നും അശോകൻ പറഞ്ഞു.

ഏഴിമല:ഏഴിമല നാവിക അക്കാദമിയിൽ കുടിവെള്ള ക്ഷാമം രൂക്ഷമായതോടെ ചെറുപുഴ തടയണ തുറന്നു വിടണമെന്ന് കലക്റ്റർ ചെറുപുഴ പഞ്ചായത്തിനോട് ആവശ്യപ്പെട്ടു.എന്നാൽ ജലക്ഷാമം രൂക്ഷമായ ചെറുപുഴ,ഈസ്റ്റ് എളേരി പഞ്ചായത്തുകളിലെ നൂറുകണക്കിന് ആളുകളുടെ കുടിവെള്ളം മുട്ടിച്ച് തടയണ തുറന്നുവിടേണ്ടതില്ലെന്ന് നാട്ടുകാരുടെയും ജനപ്രതിനിധികളുടെയും യോഗം തീരുമാനിച്ചു.തടയണ തുറക്കുന്നതുമായി ബന്ധപ്പെട്ട് ഇവിടെ തർക്കം തുടങ്ങിയിട്ട് നാളുകളേറെയായി.പ്രശ്നം പഠിക്കാനായി ചെറുകിട ജലവിഭവ വകുപ്പധികൃതർ ചൊവ്വാഴ്ച തടയണ സന്ദർശിച്ചിരുന്നു.കാര്യങ്കോട് പുഴയിലെ കാക്കക്കടവ് ഭാഗത്ത് നിന്നുമാണ് ഏഴിമലയിലേക്ക് വെള്ളമെത്തിക്കുന്നത്.എന്നാൽ വേനൽ കനത്തതോടെ ആവശ്യത്തിന് വെള്ളം ലഭിക്കുന്നില്ല എന്നാണ് പരാതി.അതിനാൽ ചെറുപുഴ തടയണ തുറക്കണമെന്നാണ് അധികൃതർ ആവശ്യപ്പെടുന്നത്.അതേസമയം ചെറുപുഴ ഡാമിൽ നിന്നും ഏഴു കിലോമീറ്റർ അകലെയുള്ള കാക്കക്കടവിലേക്ക് ചെറുപുഴ ചെക്ക് ഡാം തുറന്നാലും വെള്ളം എത്തില്ലെന്നാണ് നാട്ടുകാർ പറയുന്നത്.ഇക്കാര്യം കളക്റ്ററെ നേരിട്ട് അറിയിക്കാനുള്ള തീരുമാനത്തിലാണ് ചെറുപുഴ, ഈസ്റ്റ് എളേരി പഞ്ചായത്തിലെ  ജനപ്രതിനിധികളും നാട്ടുകാരും.നാട്ടുകാരുടെ കുടിവെള്ളം കവർന്നെടുക്കാതെ സൈനിക കേന്ദ്രത്തിലെ മറ്റ് കുടിവെള്ള സ്രോതസ്സുകൾ ഉപയോഗിക്കണമെന്ന് നാട്ടുകാർ ആവശ്യപ്പെട്ടു.മഴവെള്ള സംഭരണികൾ നിർമിച്ച് വെള്ളം ശേഖരിക്കുകയും വേണം.അതേസമയം കുടിവെള്ള ക്ഷാമം രൂക്ഷമായതോടെ ഏഴിമലയിലെ സൈനികരുടെ കുടുംബാംഗങ്ങൾ നാട്ടിലേക്ക് മടങ്ങാൻ ആരംഭിച്ചു.വിദ്യാർത്ഥികളുടെ പരീക്ഷ കഴിയുന്നതോടെ ഭൂരിഭാഗം കുടുംബങ്ങളും സ്വദേശത്തേക്ക് മടങ്ങും.

തിരുവനന്തപുരം:വനിതാ ദിനം പ്രമാണിച്ച് ഇന്ന് സംസ്ഥാനത്തെ ഭൂരിഭാഗം പോലീസ് സ്റ്റേഷനുകളും വനിതകൾ ഭരിക്കും.വനിതാ എസ്‌ഐമാരായിരിക്കും ഇന്ന് എസ് എച് ഓമാരായി ചുമതല നിർവഹിക്കുക.വനിതാ ഇൻസ്പെക്റ്റർമാരോ സബ് ഇൻസ്പെക്റ്റർമാരോ ഇല്ലാത്ത സ്റ്റേഷനുകളിൽ വനിതാ സിവിൽ പോലീസ് ഉദ്യോഗസ്ഥയായിരിക്കും എസ് എച് ഒയുടെ നിർദേശപ്രകാരം സ്റ്റേഷൻ നിയന്ത്രിക്കുക. ഗാർഡ് ഡ്യൂട്ടി മുതൽ സ്റ്റേഷനിൽ വരുന്ന പരാതികൾ സ്വീകരിക്കുന്നതും മേൽനടപടികൾ സ്വീകരിക്കുന്നതും വനിതാ പോലീസ് ഉദ്യോഗസ്ഥയായിരിക്കും.

മൈസൂർ:മൈസൂരിൽ വാഹനാപകടത്തിൽ രണ്ട് കാസർകോഡ് സ്വദേശികൾ മരിച്ചു.ബുധനാഴ്ച പുലർച്ചെ മൈസൂർ-ബെംഗളൂരു റൂട്ടിൽ എൽവാൽ എന്ന സ്ഥലത്താണ് അപകടം നടന്നത്. കർണാടക ആർടിസി ബസ്സും പിക്കപ്പും കൂട്ടിയിടിക്കുകയായിരുന്നു.അപകടത്തിൽ കാസർകോഡ് സ്വദേശികളായ ജുനൈദ്(26),അസ്ഹറുദ്ധീൻ(26) എന്നിവരാണ് മരിച്ചത്.ചൊവ്വാഴ്ച രാത്രി പാർസൽ എടുക്കാനായി മൈസൂരിലേക്ക് പോയ യുവാക്കൾ മടങ്ങി വരുമ്പോൾ യുവാക്കൾ സഞ്ചരിച്ച പിക്കപ്പിൽ എതിരെ വരികയായിരുന്ന ബസ് ഇടിക്കുകയായിരുന്നു.ഇരുവരും അപകടസ്ഥലത്തുവെച്ചുതന്നെ മരിച്ചിരുന്നു.